باستاپقىدا شتات اسسامبلەياسى مۇشەسىنىڭ قاراپايىم باستاماسى رەتىندە باستالعان بۇل ناۋقان قىسقا ۋاقىت ىشىندە تاريحي جەڭىستەرگە ۇلاستى. مامداني تاۋەلسىز كانديدات رەتىندە قاتىسقان بۇرىنعى نيۋ-يورك شتاتىنىڭ گۋبەرناتورى ەندريۋ كۋومونى باستاپقى سايلاۋدا جانە نەگىزگى سايلاۋدا دا جەڭىپ شىقتى.
سەيسەنبى كۇنى كەشكى ساعات 9:00-دە سايلاۋ ۋچاسكەلەرى جابىلدى. بۇل سايلاۋ قالا تاريحىنداعى ەڭ جوعارى داۋىس بەرۋ بەلسەندىلىگىمەن ەرەكشەلەندى. 2 ميلليوننان استام تۇرعىن داۋىس بەرىپ ۇلگەرگەنىن جازادى الەمدىك باق.
زوحران كۆامە مامداني (Zohran Kwame Mamdani) 1991 جىلدىڭ 18 قازانىندا تۋعان. دەموكراتيالىق پارتيا مەن امەريكا دەموكراتيالىق سوتسياليستەرىنىڭ مۇشەسى. 2021 جىلدان بەرى نيۋ-يورك شتاتى اسسامبلەياسىنىڭ 36-شى وكرۋگىنەن, ياعني كۋينس اۋدانىنىڭ استوريا بولىگىنەن سايلانعان دەپۋتات بولىپ قىزمەت ەتىپ كەلگەن.
قالانىڭ جاڭا مەرى ۋگاندادا ءۇندى وتباسىندا دۇنيەگە كەلگەن. ونىڭ اناسى اتاقتى كينورەجيسسەر ميرا ناير, اكەسى ۇندىستاندىق ۋگاندا اكادەميگى ماحمۋد مامداني. زوحران مامداني 7 جاسىندا نيۋ-يورككە وڭتۇستىك افريكادان قونىس اۋدارعان. ال اقش ازاماتتىعىن 2018 جىلى العان.
ءمامدانيدىڭ ساياسي مانسابى 2020 جىلى نيۋ-يورك شتاتىنىڭ اسسامبلەياسىنا سايلانعان تۇستان باستالعان. ول 2024 جىلى دەموكراتيالىق پارتيادان 56,4 پايىز داۋىسپەن پرايمەريزدى جەڭىپ, مەرلىككە كانديدات رەتىندە ەنگەن بولاتىن.
