سۋرەتتى تۇسىرگەن – اقادىل رىسماحان
ۇلكەن ساحنادا اسقار توقپانوۆتىڭ بەينەسى كورسەتىلىپ, جاساندى ينتەللەكت ارقىلى قايتا جاڭعىرعان داۋسى كوپشىلىكتىڭ نازارىنا ۇسىنىلدى. ءىس-شاراعا ارنايى ازىرلەنگەن مينياتيۋرالار مەن كورىنىستەر كورەرمەندى ايرىقشا اسەرگە بولەدى. تەاتر تويىنا ارنايى قاتىسقان ءوڭىر باسشىسى ەربول قاراشوكەەۆ قازاق ساحاراسىنىڭ ءار بۇرىشىنان كەلگەن مەيماندارعا قۇرمەت كورسەتتى.
«ەلىمىزدە ونەر مەن مادەنيەتكە, سونىڭ ىشىندە تەاتر سالاسىنا تۇراقتى تۇردە قولداۋ كورسەتىلىپ كەلەدى. ويتكەنى تەاتر ساحناسىندا كوتەرىلگەن ءاربىر ماسەلە – قوعامنىڭ بۇگىنگى تىنىسى. مۇندا قويىلىم عانا ەمەس, ءومىردىڭ ءوزى ورىلەدى.
پرەزيدەنتىمىز ءوز سوزىندە: «تاۋەلسىزدىك جىلدارىندا مادەنيەت سالاسىندا كوپ جۇمىس اتقارىلدى. ساحنا ونەرىنە قۇشتار جاستاردىڭ كوبەيۋى – قۋانىشتى جايت. اسىرەسە ايماقتاردا تەاترلاردى سالۋعا جانە دامىتۋعا ەرەكشە ءمان بەرۋ كەرەك», – دەپ اتاپ وتكەن بولاتىن. بۇل باستاما وڭىرىمىزدە كوپتەن بەرى كوتەرىلىپ جۇرگەن ماسەلەنىڭ ءبىرى – جاستار تەاترىنىڭ اشىلۋىنا تۇرتكى بولدى. حالىق سۇرانىسىن ەسكەرە وتىرىپ, «تاراز» جاستار تەاترى ستۋدياسى اشىلىپ, ءوڭىردىڭ مادەني ومىرىنە جاڭا سەرپىن بەردى», دەگەن ەربول شىراقپاي ۇلى مادەنيەتكە قىزمەت ەتكەن بىرقاتار ازاماتتى «وبلىسقا سىڭىرگەن ەڭبەگى ءۇشىن» بەلگىسىمەن, قۇرمەت گراموتاسىمەن جانە العىسحاتپەن ماراپاتتادى.
كسرو جانە قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆ, قازاقستاننىڭ حالىق ءارتىسى, تەاتر قايراتكەرلەرى وداعىنىڭ توراعاسى تۇڭعىشباي جامانقۇلوۆ جۇرەك تورىندە ساقتالعان ەستى ەستەلىكتەرىن ايتىپ, اسقار توقپانوۆتىڭ قازاق ونەرىندەگى ورنى تۋرالى تولعامدى ويلارىمەن ءبولىستى.
فەستيۆال شىمىلدىعى مەيرام ءحابيبۋلليننىڭ قويۋىمەن س.قوجامقۇلوۆ اتىنداعى ۇلىتاۋ وبلىستىق قازاق مۋزىكالىق دراما تەاترى ساحنالاعان گەورگ بيۋحنەردىڭ «ۆويتسەك» دراماسىمەن اشىلدى. ا.توقپانوۆ اتىنداعى وبلىستىق قازاق دراما تەاترى فەستيۆالدان تىس, قوناقتارعا ارناپ مىرجاقىپ دۋلات ۇلىنىڭ «باقىتسىز جامال» تراگيفارسىن قويسا, ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق تەاترى عابيت مۇسىرەپوۆتىڭ «قوزى مەن بايان» تراگەدياسىن ۇيعىر تىلىندە كورەرمەن نازارىنا ۇسىندى.
اتىراۋ وبلىستىق ماحامبەت اتىنداعى اكادەميالىق قازاق دراما تەاترى قويعان مۇحتار اۋەزوۆتىڭ «قورعانسىزدىڭ كۇنى» تراگەدياسىندا اق پەن قارا, مەيىرىم مەن قاتىگەزدىك ۇعىمدارى كورىنىس تاپتى. رەجيسسەرى گۇلناز قامىسباەۆا بولعان قويىلىمنىڭ ءبىر ەرەكشەلىگى – مۇندا تەك نازىكجاندار عانا ونەر كورسەتتى. ر.سەيىتمەتوۆ اتىنداعى تۇركىستان سازدى دراما تەاترى ءالديحان قالدىباەۆتىڭ «جالعىز جەلكەن» شىعارماسىن ساحنالادى. رەجيسسەرى – ايدار ناۋرىزباەۆ. مۇندا سىبايلاس جەمقورلىقپەن كۇرەس – وقيعانىڭ نەگىزگى وزەگى. ءتىپتى ۇلكەن لاۋازىم يەسى ەشقانداي كەدەرگىگە قاراماستان جەمقورلىقتىڭ تامىرىن ۇزبەكشى بولادى. فەستيۆال شىمىلدىعى ب.ريموۆا اتىنداعى تالدىقورعان دراما تەاترى ساحنالاعان الەكساندر ءۆولوديننىڭ «كەزدەسۋ مەن قوشتاسۋ» اتتى دراماسىمەن جابىلدى.
رەسپۋبليكالىق تەاتر فەستيۆالىنىڭ قازىلار القاسىنا مۇحتار اۋەزوۆ اتىنداعى قازاق ۇلتتىق تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى ەركىن جۋاسبەك توراعالىق ەتتى. قازاقستاننىڭ حالىق ءارتىسى تۇڭعىشباي ءال-تارازي, ونەرتانۋ عىلىمدارىنىڭ كانديداتى باقىت نۇرپەيىس, «قۇرمەت» وردەنىنىڭ يەگەرى, رەجيسسەر قۋاندىق قاسىموۆ, تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ پروفەسسورى مەرۋەرت جاقسىلىقوۆا قازىلار قۇرامىنان تابىلدى.
«ۇزدىك اكتەرلىك دۋەت» اتالىمى ب.ريموۆا اتىنداعى تالدىقورعان دراما تەاترى ۇسىنعان «كەزدەسۋ مەن قوشتاسۋ» دراماسىنداعى اكتەر امان قوجابەكوۆ پەن اكتريسا عاليا تەمىرباەۆاعا بەرىلدى. «ۇزدىك ەر ادام بەينەسى» ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترىنىڭ «قوزى مەن بايان» تراگەدياسىنداعى قاراباي ءرولىن سومداعان ءدىلشات امانباەۆقا, «ۇزدىك ايەل ادام بەينەسى» س.قوجامقۇلوۆ اتىنداعى ۇلىتاۋ وبلىسىنىڭ قازاق مۋزىكالىق دراما تەاترىنىڭ «ۆويتسەك» دراماسىنداعى اكتريسا گۇلدەن سەيتكەنوۆاعا تاپسىرىلدى.
«ۇزدىك رەجيسسۋرا» اتالىمىنا رەجيسسەر مەيرام حابيبۋللين, «اسقار توقپانوۆ اتىنداعى ارنايى سىيلىق» اتالىمى اسقار توقپانوۆ اتىنداعى وبلىستىق قازاق دراما تەاترى «باقىتسىز جامال» سپەكتاكلى, «ەڭ ۇزدىك قويىلىم» اتالىمىنا س.قوجامقۇلوۆ اتىنداعى ۇلىتاۋ وبلىسىنىڭ قازاق مۋزىكالىق دراما تەاترى «ۆويتسەك» تۋىندىسىمەن يە بولدى. بارلىق اتالىم ءۇشىن ديپلوم جانە قارجىلاي سىيلىقتار تابىس ەتىلدى.
تاراز
