فوتو: qazdauiri.kz
قازىر ەلىمىزدىڭ سپورت ينفراقۇرىلىمىمەن قامتىلۋ دەڭگەيى – 55,1 پايىز. مينيسترلىك كورسەتكىشتى 2029 جىلعا قاراي 65 پايىزعا جەتكىزۋدى كوزدەپ وتىر.
وسى ماقساتتا بيىلعى 9 ايدا 35 سپورت نىسانى پايدالانۋعا بەرىلگەن, جىل سوڭىنا دەيىن تاعى 67 نىساننىڭ قۇرىلىسىن اياقتاۋ جوسپارلانعان.
بۇل قاتارداعى ءىرى جوبالاردىڭ تىزىمىندە تۇركىستان قالاسىنداعى حالىقارالىق دەڭگەيدەگى ەسۋ ارناسى مەن استاناداعى ۇلتتىق سپورت ۋنيۆەرسيتەتى بار. ۋنيۆەرسيتەت ءبىلىم بەرۋ, عىلىمي جانە سپورتتىق باعىتتاردى بىرىكتىرىپ, سالا ماماندارىن دايارلاۋ مەن زەرتتەۋ جۇمىستارىن جۇرگىزەتىن ماڭىزدى ورتالىققا اينالماق.
جاڭا فۋتبول الاڭدارىنىڭ دا قاتارىن قالىڭداتۋ ماقساتى قويىلعان. استانادا 3 600 ورىندىق ستاديوننىڭ قۇرىلىسى قارقىن العان. سونىمەن قاتار وڭىرلەردە تاعى 14 جاڭا ستاديونعا ارنالعان جوبالىق-سمەتالىق قۇجاتتاما ازىرلەنگەن.
«ينفراقۇرىلىمنىڭ بالالار مەن مۇمكىندىگى شەكتەۋلى ازاماتتار ءۇشىن قولجەتىمدى بولۋىنا ەرەكشە نازار اۋدارىلۋدا. ماسەلەن, ورال قالاسىندا Freedom شاپاعات قورىنىڭ قولداۋىمەن زاماناۋي سپورت زالى اشىلدى. ال اقتوبە مەن تالدىقورعاندا كۇرەس زالدارى, باسسەيندەر جانە فيتنەس ورتالىقتارى بار جاڭا كەشەندەردىڭ قۇرىلىسى ءجۇرىپ جاتىر. ەلىمىزدە سپورتقا بەيىم دارىندى بالالارعا ارنالعان مامانداندىرىلعان سپورت مەكتەپ-ينتەرناتتارىنىڭ جەلىسى جۇيەلى تۇردە دامىپ كەلەدى. قازىرگى تاڭدا وسىنداي 14 وقۋ ورنى جۇمىس ىستەيدى, الداعى ۋاقىتتا ولاردىڭ سانىن بارلىق وڭىردە ارتتىرۋ جوسپارلانعان», دەدى ەربول مىرزابوسىنوۆ.
ۆەدومستۆو دەرەگىنشە, سالاعا بيۋدجەت قاراجاتىنان بولەك «قازاقستان حالقىنا» قوعامدىق قورىنىڭ رەسۋرستارى دا تارتىلىپ وتىر. ولاردىڭ قولداۋىمەن اۋىلدىق جەرلەردە بالالار مەن جاسوسپىرىمدەر سپورت مەكتەپتەرىن, سپورت كەشەندەرى مەن مودۋلدىك زالداردى سالۋعا باعىتتالعان ونداعان جوبا جۇزەگە اسىرىلىپ جاتىر.
