ع.سۇگىراليەۆ مەركى اۋدانىنداعى كاسىپتىك كوللەدجدە ستۋدەنتتەرگە ساباق بەرەدى. ول سوم تەمىردى قيىستىرىپ قانا قويمايدى. ءسانىن كەلتىرىپ دانەكەرلەيدى, ءتىپتى بىرنەشە قۇراستىرمالى قۇرىلعىلاردىڭ دا اۆتورى اتانىپ ۇلگەرىپتى. اپتال ازامات كەيىنگى تولقىن ىنىلەرىنىڭ وسى ماماندىقتى ءبىر كىسىدەي مەڭگەرگەنىن قالايدى. سودان دا بولسا كەرەك, بار بىلگەنىن شاكىرتتەرىنە ىنتا-شىنتاسىمەن ۇيرەتىپ جاتادى.
ء«ار ادام ءوز جۇمىسىن جانىنداي جاقسى كورۋى كەرەك. ءوز باسىم قانداي دا ءبىر جوبانى قولعا العاندا باسقا شارۋانىڭ ءبارىن ۇمىتىپ كەتەمىن. ويتكەنى ىستەپ جاتقان جۇمىستى بارىنشا ساپالى ورىنداۋ قاجەت. وعان جىلدار بويى جيناعان تاجىريبە ازدىق ەتەدى. جان جۇرەگىڭمەن سەزىنىپ, جان-تانىڭمەن بەرىلىپ جۇمىس ىستەگەندە عانا ويعا العاڭ جوباڭ ايتارلىقتاي ءساتتى شىعادى. ەڭ ءبىرىنشى كەزەكتە تەمىر جونۋشى سىزبانى جازباي تانۋى, سەزىنۋى كەرەك. ويتكەنى ول – باستى قۇجات. قۇجاتتاعى سىزبادان ەشقاشان اۋىتقۋعا بولمايدى. ءسال قيىس كەسسەڭ, اتقارعان جۇمىسىڭ تەككە كەتەدى. ءبارىن قايتا باستاۋعا تۋرا كەلەدى. سوندىقتان دا بارلىق جۇمىسقا بايىپتىلىقپەن, سالقىنقاندىلىقپەن قاراعان ابزال. جەتى رەت ولشەپ, ءبىر رەت كەسكەن ادام ەشقاشان ەشتەڭەدەن ۇتىلمايدى. ومىرلىك تاجىريبەمدە وسىنى انىق ءتۇسىندىم. كەيىنگى جاستاردىڭ مۇنى ەشقاشان قاپەردەن شىعارماعانى ءجون», دەيدى مامان.
بار شارۋا ستۋدەنتتەرگە ءدارىس وقۋمەن بىتپەيدى. ولار تەمىردەن ءتۇيىن ءتۇيۋدىڭ قىر-سىرىن تەرەڭىرەك مەڭگەرگىسى كەلەدى. سول تۇرعىدا ع.سۇگىراليەۆتىڭ شەبەرحاناسىنا بارىپ, تەوريانى تاجىريبەمەن ۇشتاستىرۋعا دەن قوياتىندار دا جەتكىلىكتى. ءوز اۋلاسى ماڭىنان شەبەرحانا اشىپ العان ع. سۇگىراليەۆ جىلدار بويى جيناعان ءبىلىمىن شاكىرتتەرىنىڭ بويىنا دارىتۋدان ەش جالىققان ەمەس. قايتا ادال ەڭبەكپەن ناپاقا تاپقىسى كەلەتىن جاستاردىڭ تالابىنا ءدان ريزا.
«شىن شەبەردىڭ ءدارىسىن تىڭداۋ مەن تاجىريبەسىنە تەرەڭ بويلاۋدىڭ ءوز ارتىقشىلىعى بار. ول كىسى بىزگە تەمىردىڭ سان ءتۇرىن جىكتەپ, تالداپ ايتىپ وتىرادى. سول تەمىرمەن قالاي جۇمىس ىستەۋ كەرەكتىگىن ۇيرەتىپ ءجۇر. ءبىز دە قولدان كەلگەنشە ۇيرەنىپ جاتىرمىز. ازىرگە بىلگەنىمىز اسا كوپ ەمەس. سوندىقتان دا ءبىز مەڭگەرۋگە ءتيىس دۇنيە ءالى دە جەتكىلىكتى. بىلىكتى ماماننان ءتالىم الىپ جۇرگەنىمىزدى قاي كەزدە دە ماقتان تۇتامىز. ويتكەنى بۇل كىسى ءوزى تەرەڭ ىزدەنىپ قانا قويماي, شاكىرتتەرىن دە ەڭبەكقورلىققا, توزىمدىلىككە باۋلىپ ءجۇر. ءوز ءىسىنىڭ بىلگىرىنەن العان ءبىلىمىمىز بولاشاقتا كادەگە جارايتىنىنا سەنىم مول. الدىڭعى تولقىننىڭ ىسكەرلىگى, ومىرلىك تاجىريبەسى, جۇمىسقا اسقان جاۋاپكەرشىلىكپەن قارايتىن قاسيەتى – بىزگە ۇلگى. جاۋاپكەرشىلىك بار جەردە جۇمىس العا جىلجيدى, ناقتى ناتيجە شىعادى», دەيدى عالەكەڭنىڭ شاكىرتى بايرام بايراموۆ.
قاي كەزدە دە جاڭاشىلدىققا ۇمتىلعان مامان قازىرگى كەزدە ەسكى تراكتوردى جونگە كەلتىرىپ, ەگىس دانىنە ارنالعان ارنايى ەلەك قۇراستىرىپ جاتىر. تۇقىم تازالايتىن قۇرىلعى قوزعالتقىشىن كىر جۋاتىن ماشينا موتورىنان ازىرلەپتى.
«ەڭبەك ادام بالاسىن تاربيەلەيدى. سوندىقتان دا جاستار تەمىردەن قايمىقپاۋى كەرەك. قايتا ونىڭ سىرىنا تەرەڭىرەك قانىعىپ, جاڭا دۇنيەلەردى جاساۋعا تىرىسقان ابزال. سوندا عانا قولعا العان ءىسىڭ ونەدى, كوڭىلدەن شىعادى. ادام شابىتپەن جۇمىس ىستەگەندە عانا ويداعىداي ناتيجەگە قول جەتكىزەدى. كەيىنگى تولقىن وسىنى جەتە تۇسىنگەنى ءجون», دەيدى ول.
ءوز جۇمىسىن جانىنداي سۇيگەن ازاماتتىڭ ەڭبەكقورلىعى ءتانتى ەتپەي قويمايدى. تەمىر جونۋدىڭ قىر-سىرىن تولىق مەڭگەرگەن ماماننىڭ كەيىنگى ۇرپاققا بەرەرى مول. وسىنى تۇسىنگەن جاستاردىڭ بۇل ماماندىقتى يگەرۋگە دەگەن تالپىنىسى كوڭىل توعايتادى.
جامبىل وبلىسى,
مەركى اۋدانى
