قالالىق «ونەر» مادەنيەت سارايىندا «ەرتىس-بايان» تەاترى ەسىگىن ايقارا اشتى. جاس شىعارماشىلىق ۇجىمنىڭ تاريحى اقيىق اقىن مۇقاعالي ماقاتاەۆ شىعارماسىنىڭ جەلىسىمەن ساحنالانعان «قوش, ماحاببات» سپەكتاكلىنىڭ پرەمەراسىمەن باستالدى.
تۋىندىنى جاس ءارى تالانتتى رەجيسسەر بيبياجار ديحان ساحنالادى. پوەزيا ءتىلى ارقىلى ادام سەزىمىنىڭ تەرەڭدىگىن, ماحابباتتىڭ كۇشىن, تاعدىر دراماسىن جەتكىزە بىلگەن قويىلىم كورەرمەندەردى شىنايىلىعىمەن باۋرادى.
ەكىباستۇزدا تەاتر اشۋ يدەياسى بىرنەشە جىلدان بەرى تالقىلانىپ كەلگەن. جوبا ءوڭىر باسشىسىنىڭ تاپسىرماسى بويىنشا 2024 جىلدىڭ شىلدەسىندە قولعا الىنىپتى. سول كەزدە ەكىباستۇزدىڭ باي مادەني ءداستۇرى مەن بەلسەندى شىعارماشىلىق ورتاسى تەاتر اشۋعا بارلىق العىشارت بار ەكەنىن بايقاتقان. «قاينار» ورتالىعى جانىندا 20 جىلدان استام ۋاقىت بويى «ماسكا» تەاتر ستۋدياسى تابىستى ەڭبەك ەتىپ ءجۇر. قاتىسۋشىلارى بىرنەشە مارتە رەسپۋبليكالىق فەستيۆالدەردىڭ لاۋرەاتى اتاندى. ال 2020 جىلى «ونەر» مادەنيەت سارايىندا «بويتۇمار» جاستار مۋزىكالىق-تەاتر ۇيىرمەسى قۇرىلدى. مۇنىڭ بارلىعى كاسىبي تەاتردىڭ قۇرىلۋىنا نەگىز بولدى.
«ەرتىس-بايان» تەاترىن قۇرۋعا بيۋدجەتتەن شامامەن 50 ميلليون تەڭگە بولىنگەن. ۇجىمدا ازىرشە 18 قىزمەتكەر ەڭبەك ەتەدى, ولاردىڭ 12-ءسى – استانا, الماتى, تۇركىستان, اقتوبە قالالارىنان شاقىرىلعان كاسىبي ارتىستەر. باسىم بولىگى ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ تۇلەكتەرى سونداي-اق تەاتر قويىلىمدارىنا جۇسىپبەك ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترىنىڭ ارتىستەرى دە قاتىسادى.
قازاق تەاترىنىڭ سالتاناتتى اشىلۋ راسىمىنە وبلىس اكىمى اسايىن بايحانوۆ قاتىسىپ, ەكىباستۇزدىقتاردى ايتۋلى وقيعامەن قۇتتىقتادى.
– بولاشاقتا تەاتر ءۇشىن جەكە عيمارات سالۋ جوسپاردا بار. ەكىباستۇز تەك كومىر مەن ەنەرگيانىڭ عانا ەمەس, رۋحانيات پەن ونەردىڭ دە ورداسىنا اينالادى, – دەدى اكىم.
«قوش, ماحاببات» سپەكتاكلىنىڭ پرەمەراسى جاڭا شىعارماشىلىق ۇجىمنىڭ دەبيۋتى عانا ەمەس, شاھارداعى جاڭا تەاتر ماۋسىمىنىڭ اشىلۋىنداي سەزىلدى.
اتاپ وتەرلىگى, تەاتر جەتەكشىسى تالعات ساعىنتاەۆ ۇلكەن ۇيىمداستىرۋشىلىق جۇمىس اتقاردى. الماتىداعى م.اۋەزوۆ اتىنداعى قازاق ۇلتتىق دراما تەاترىنىڭ تاربيەسىن كورگەن تانىمال اكتەر بۇگىندە «ونەر» مادەنيەت ورتالىعىنىڭ باسشىسى بولىپ قىزمەت ەتىپ ءجۇر.
