ەكسپوزيتسياعا پوليتسيا قىزمەتىنىڭ ءبىر ءساتىن بەينەلەيتىن 25 سۋرەت قويىلعان. ينتەرنەت-الاياقتاردى ۇستاۋ, ساپتىق بايقاۋ, پاندەميا كەزىندەگى بلوك-بەكەتتەردەگى ۇيقىسىز تۇندەر, بالالاردى قۇتقارۋ وپەراتسيالارى – ءبارى وسى فوتوكادرلاردا كورىنىس تاپقان. ەرەكشە نازار اۋدارعان فوتوسۋرەتتەر 2024 جىلعى رەكوردتىق سۋ تاسقىنى كەزىندە پوليتسەيلەردىڭ قاجىرلى ەڭبەگىنە ارنالعان.
وندا ادامدار مەن ءۇي جانۋارلارىن ەۆاكۋاتسيالاۋ, قايىقتارمەن جانە اتتارمەن تاۋلىك بويى پاترۋلدە ءجۇرۋ جانە ت.ب كورىنىستەر بار. تاعى ءبىر كادر 2021 جىلدىڭ اقپانىنداعى بوراندا 17 جانە 7 جاستاعى ەكى اعايىندى بالانى قۇتقارۋ ساتىنەن تۇسىرىلگەن. اعاسى ءىنىسىن ءوز كيىمىنە وراپ جۇرگەن اقتۇتەكتە ولاردى 70-تەن استام ادام ىزدەپ, اقىرى قۇتقارعان قۋانىشتى كورىنىس كورەرمەندەردى تەبىرەنتپەي قويمايدى.
پەتروپاۆل
