گيدروەنەرگەتيكالىق جوبالار: وڭتۇستىك كورەيا قازاقستانعا قالاي كومەكتەسپەك؟

ەنەرگەتيكا ۆەدومستۆوسىنىڭ مالىمەتىنشە, دەلەگاتسيا تەدجون قالاسىندا كورەيانىڭ سۋ رەسۋرستارى كورپوراتسياسى (K-water) دايىنداعان تەحنيكالىق باعدارلاماعا قاتىستى. باعدارلاماعا سۋ-رەسۋرستىق ساياسات ماسەلەلەرى, گيدروەنەرگەتيكانىڭ زاماناۋي تەحنولوگيالارى, سونداي-اق ورتا گەس جوبالارىن ىسكە اسىرۋ جانە قارجىلاندىرۋ تاسىلدەرى كىردى.

ساپار اياسىندا K-water ينتەگراتسيالانعان سۋ رەسۋرستارىن باسقارۋ ورتالىعىنا جانە تەدجون كوپ ماقساتتى بوگەتىنە (Daecheong Dam) تانىستىرۋ ساپارلارى ۇيىمداستىرىلدى.

سونىمەن قاتار Korea Midland Power Co., Ltd. (KOMIPO), Korea South-East Power Co., Ltd. (KOEN), Korea Hydro & Nuclear Power Co., Ltd. (KHNP) جانە Korea Overseas Infrastructure & Urban Development Corporation (KIND) كومپانيالارىمەن كەزدەسۋلەر ءوتتى. تاراپتار قازاقستاننىڭ وڭتۇستىك-شىعىسىندا كاسكادتى گيدروەنەرگەتيكالىق جوبانى بىرلەسىپ ىسكە اسىرۋ پەرسپەكتيۆالارىن تالقىلادى.

اتالعان ساپار قازاقستاننىڭ تازا, سەنىمدى, تۇراقتى ەنەرگەتيكالىق جۇيە قۇرۋ جونىندەگى جۇمىستارىنا قوسىمشا سەرپىن بەرىپ, حالىقارالىق ىنتىماقتاستىقتى نىعايتا تۇسەدى.