الماتىدا مۇگەدەكتەردىڭ جايىن ەسكەرگەن قانشا نىسان بار؟

2023-2027 جىلدار ارالىعىندا ينتەراكتيۆتى قولجەتىمدىلىك كارتاسىنا ەنگىزىلگەن 43 مىڭنان استام نىسانعا دا قاجەتتى جاعداي جاساۋ كوزدەلگەن. 

ەڭبەك جانە حالىقتى الەۋمەتتىك قورعاۋ مينيسترلىگى جىل سايىن وسىنداي وبەكتىلەردىڭ 20 پايىزىن بەيىمدەۋدى جوسپارلاعان.

2023 جىلى كارتاداعى وبەكتىلەردىڭ  – 20%, 2024 جىلى – 40%, 2025 جىلى – 60% قاجەتتى جوندەۋ جۇمىستارى جۇرگىزىلگەن. 2026 جىلى – 80%, 2027 جىلى – 100%-ى نىساندى بەيىمدەۋ كوزدەلگەن. سالالىق مينيسترلىكتىڭ مالىمەتىنشە, قازىر ەل بويىنشا 24 216 نىسان تولىقتاي بەيىمدەلگەن.

ونىڭ ىشىندە الماتى قالاسىندا 4323 نىساندا قولايلى جاعداي جاسالعان. 2027 جىلدىڭ سوڭىنا دەيىن 5611 نىساندى بەيىمدەۋ جوسپارلانىپ وتىر.

سالالار بويىنشا مۇگەدەكتىگى بار ادامدارعا جاعداي جاسالعان نىساندار سانى: 

- دەنساۋلىق ساقتاۋ نىساندارى– 972;

- ءبىلىم بەرۋ نىساندارى – 800;

- مادەنيەت نىساندارى – 42;

- مەملەكەتتىك جانە كۆازيمەملەكەتتىك ۇيىمدار – 115;

- سپورت نىساندارى – 23;

- الەۋمەتتىك قورعاۋ نىساندارى – 8;

- كولىك ينفراقۇرىلىمى نىساندارى – 3;

- ويىن-ساۋىق جانە دەمالىس ورىندارى – 21;

- قوعامدىق تاماقتانۋ – 347;

- ساۋدا نىساندارى مەنويىن-ساۋىق ورتالىقتارى – 1 925; 

- باسقادا نىساندار – 67.

بيىل الماتى قالاسى بويىنشا الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتى الەۋمەتتىك كودەكسىنىڭ تالاپتارىنىڭ ورىندالۋىن تەكسەرۋ ماقساتىندا 77 تەكسەرىس جۇرگىزگەن. ونىڭ ىشىندە پروفيلاكتيكالىق باقىلاۋ اياسىندا – 9, جوسپاردان تىس – 58, پروكۋراتۋرا ورگاندارىنىڭ باستاماسىمەن – 10 تەكسەرىس جۇزەگە اسىرىلعان.

تەكسەرۋ ناتيجەسىندە مۇگەدەكتىگى بار ادامداردى الەۋمەتتىك قورعاۋ جانە ارنايى الەۋمەتتىك قىزمەتتەر كورسەتۋ سالاسىندا انىقتالعان زاڭبۇزۋشىلىقتاردى جويۋ جونىندە 48 نۇسقاما بەرىلگەن. سونداي-اق جالپى سوماسى 5 ملن 308,2 مىڭ تەڭگە بولاتىن 13 اكىمشىلىك ايىپپۇل سالىنعان. بىرلەسكەن تەكسەرۋلەردىڭ قورىتىندىسى بويىنشا پروكۋراتۋراعا 10 قورىتىندى ۇسىنىلعان.