فوتو: كولىك مينيسترلىگى
اشىلۋ سالتاناتىنا كولىك ۆيتسە-ءمينيسترى تالعات لاستاەۆ, SCAT اۋە كومپانياسىنىڭ پرەزيدەنتى ۆلاديمير دەنيسوۆ, سەربيانىڭ قازاقستانداعى توتەنشە جانە وكىلەتتى ەلشىسى ۆلاديمير يوۆچيچ جانە ن.نازارباەۆ اتىنداعى حالىقارالىق اۋەجاي باسقارما توراعاسىنىڭ ءبىرىنشى ورىنباسارى رۋسلان پىشتانوۆ قاتىستى.
اتالعان ەلدىڭ باس شاھارى بەلگرادقا كەلگەننەن كەيىن قازاقستان دەلەگاتسياسىن سەربيا پرەزيدەنتى الەكساندر ءۆۋچيچتىڭ تاپسىرماسىمەن سەربيا ۇلتتىق جينالىسىنىڭ سپيكەرى انا برنابيچ جانە كولىك ءمينيسترىنىڭ ورىنباسارى ۆەريكا ەچمەنيتسا قارسى الدى.
«استانا مەن بەلگراد اراسىنداعى تىكەلەي رەيستەردىڭ اشىلۋى قازاقستان مەن سەربيا اراسىنداعى بايلانىستى نىعايتۋداعى ماڭىزدى قادام بولىپ تابىلادى. جاڭا باعىت ەكى ەل اراسىنداعى بيزنەس, تۋريزم جانە مادەني ىنتىماقتاستىق ءۇشىن جاڭا جول اشادى», دەپ اتاپ ءوتتى كولىك ۆيتسە-ءمينيسترى تالعات لاستاەۆ.
كولىك مينيسترلىگىنىڭ مالىمەتىنشە, قازاقستان مەن سەربيا اراسىندا ۆيزاسىز رەجيم قولدانىلادى. ۇشۋ ۇزاقتىعى 5 ساعات 40 مينۋت. بۇل باعىت بويىنشا جولاۋشىلار تاراپىنان جوعارى سۇرانىس كۇتىلىپ وتىر. العاشقى رەيستە 92 جولاۋشى بولعان.
استانا-بەلگراد-استانا رەيستەرى اپتاسىنا ەكى رەت (دۇيسەنبى جانە بەيسەنبى) زاماناۋي Boeing 737 ۇشاقتارىمەن ورىندالادى.
