پرەمەرا 500-دەن استام بالا مەن اتا-انالاردىڭ قاتىسۋىمەن اشىق اسپان استىندا ۇلكەن LED-ەكراندا ءوتتى.
انيماتسيالىق جوبا وسكەلەڭ ۇرپاقتىڭ قۇقىقتىق مادەنيەتىن قالىپتاستىرۋعا, كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋعا جانە "زاڭ مەن ءتارتىپ" يدەولوگياسىن ىلگەرىلەتۋگە باعىتتالعان. ءفيلمنىڭ نەگىزگى ماقساتى – بالالارعا زاڭنىڭ, ادىلدىكتىڭ جانە قوعامدىق ءتارتىپتىڭ ماڭىزىن قىزىقتى ءارى تۇسىنىكتى تۇردە جەتكىزۋ, سونداي-اق زاڭعا قۇرمەت پەن ادالدىقتىڭ – مىقتى ءارى جاۋاپتى ازامات بولۋدىڭ كەپىلى ەكەنىن كورسەتۋ.
ءمۋلتفيلمنىڭ باستى كەيىپكەرى – قازاقستاننىڭ تاۋەلسىزدىگى مەن قايسار رۋحىن بەينەلەيتىن بارىس. ول بالالارعا ادالدىق, ادىلدىك, دوستىق پەن ءوزارا سىيلاستىقتىڭ قۇندىلىعىن تۇسىندىرەدى. كورسەتىلىم جىلى ءارى مەرەكەلىك اتموسفەرادا ءوتتى. بالالار ءۇشىن جول قوزعالىسى ەرەجەلەرىنە ارنالعان ۆيكتورينالار, كينولوگتار مەن ارنايى جاساقتىڭ تانىستىرىلىمدارى ۇيىمداستىرىلدى. سونداي-اق كريميناليستەردىڭ جۇمىسى كورسەتىلىپ, پوليتسيا قىزمەتىنە ارنالعان فوتوكورمە قويىلدى.
مەرەكەلىك شارا قۋىرشاق تەاترى مەن شىمكەنت تسيركى ارتىستەرىنىڭ قويىلىمدارىمەن تولىقتى. جول قوزعالىسىنىڭ جاس ينسپەكتورلارى جول قاۋىپسىزدىگى تۋرالى شاعىن كورىنىس كورسەتىپ, كورەرمەندەردىڭ ىقىلاسىنا بولەندى. ءىس-شارا سوڭىندا كونتسەرتتىك باعدارلاما ۇسىنىلىپ, قاتىسۋشىلار ىزگى نيەتتىڭ سيمۆولى رەتىندە ءتۇرلى-ءتۇستى شارلاردى اسپانعا ۇشىردى.
جوبا اۆتورلارىنىڭ ايتۋىنشا, "BalaZan" تەك مۋلتفيلم عانا ەمەس, بالالارعا زاڭنىڭ, ادىلدىكتىڭ جانە ءوزارا قۇرمەتتىڭ ماڭىزىن جارقىن بەينەلەر مەن قىزىقتى وقيعالار ارقىلى جەتكىزەتىن تاربيەلىك باستاما بولىپ تابىلادى.
— ءبىز ءار بالانىڭ زاڭدى قورعان ءارى ادىلدىك نىشانى رەتىندە ءتۇسىنۋىن ماقسات ەتەمىز. ەگەر بالا كەزدەن زاڭعا قۇرمەت سەزىمىن قالىپتاستىرساق, ادىلدىكتى باعالايتىن, ءتارتىپتى ۇستاناتىن ۇرپاق وسەدى, — دەدى پوليتسيا دەپارتامەنتىنىڭ وكىلدەرى.
ايتا كەتەيىك, انيماتسيالىق جوبا جالعاسىن تابادى. كەلەسى بولىمدەردە بارىس بالالارعا قاۋىپسىزدىك, ادالدىق جانە جاۋاپكەرشىلىك تۋرالى جاڭا وقيعالار ارقىلى ساباق بەرمەك.
