– ءبىز بۇگىن قالانىڭ كەلبەتىنە كورىك قوسىپ, تاريحي سيپاتىن بايىتا تۇسەتىن وزگەشە نىساندى پايدالانۋعا بەرگەلى وتىرمىز. بۇل – تۇرعىنداردىڭ دەمالىپ, سەرۋەندەۋىنە ارنالعان جاڭا الاڭ. ساياباقتىڭ بيىكتەن تۇسىرىلگەن سۋرەتىنە كوز سالساق, كيىز ءۇيدىڭ بەينەسى بەدەرلەنگەن. الداعى ۋاقىتتا وسى جەرگە مەملەكەتتىك ءرامىزىمىز – تۋىمىزدى ورناتامىز. قالامىز كۇننەن-كۇنگە كوركەيىپ كەلەدى. «ۇشاقتار كەنتىندە» دە وسىنداي ساياباق سالىنىپ جاتىر. ونى دا تولىق اياقتاپ, حالىقتىڭ دەمالىس ورنىنا, قوعامدىق كەڭىستىككە اينالدىرامىز, – دەدى وبلىس اكىمى.
سونىمەن قاتار ءوڭىر باسشىسى جاڭا اشىلعان ساياباققا «رەسپۋبليكا ساياباعى» دەگەن اتاۋ بەرۋ كەرەكتىگىن دە ايتتى.
– حالىق يگىلىگىنە قىزمەت ەتەتىن ساياباقتى قالا زيالىلارى مەن قوعامدىق كەڭەس وكىلدەرى «رەسپۋبليكا الاڭى», «رەسپۋبليكا ساياباعى» دەپ اتاۋدى ۇسىنىپ وتىر. مەن ءوز تاراپىمنان بۇل اتاۋدىڭ جاڭا قوعامدىق ورىنعا جاراسىمدى ەكەنىن ايتقىم كەلەدى. ويتكەنى ەلىمىزدىڭ ەڭ ۇلىق مەرەكەسى رەسپۋبليكا كۇنىندە حالىق يگىلىگىنە پايدالانۋعا بەرىلىپ وتىر. ازاماتتاردىڭ تالاپ-تىلەگىن قولداي وتىرىپ, مەملەكەتتىك ونوماستيكا كوميسسياسىنا وسى اتاۋدى ۇسىنامىز, – دەدى.
بۇگىندە جاڭا ساياباقتىڭ قۇرىلىسى تولىق اياقتالىپ, اۋماعى اباتتاندىرىلعان. كوگالداندىرۋ جۇمىستارى اياسىندا مىڭعا جۋىق قاراعاي مەن شىرشا كوشەتتەرى, 9 500-دەن استام ءساندى بۇتالار مەن 8 000-عا جۋىق كوپجىلدىق گۇلدەر ەگىلدى. جالپى اۋماعى شامامەن 53 مىڭ شارشى مەتردى قۇرايتىن ساياباقتا سەرۋەن جولدارى, دەمالىس ايماقتارى, ساحنا, مادەني-كوپشىلىك ءىس-شارالارعا ارنالعان اشىق الاڭدار قاراستىرىلعان.
از ۋاقىت ىشىندە بوي كوتەرگەن قوعامدىق نىسان تۇرعىندار الاڭسىز ءارى قاۋىپسىز دەمالاتىن ورىن. ساياباقتى سالۋ بارىسىندا 24 مىڭ شارشى مەتر اۋماق كوگالداندىرىلدى. 20 370 شارشى مەتر جەرگە توسەمتاس, 20 480 شارشى مەتر اۋماققا اسفالت توسەلدى. ساياباقتىڭ باستى نىساندارىنىڭ ءبىرى – التىن ادام ەسكەرتكىشى. ۇلتتىق تاريحقا تاعزىم رەتىندە ورناتىلعان ەسكەرتكىش ساياباقتىڭ كوركىن كەلتىرىپ تۇر.
سالتاناتتى ءىس-شارا سوڭىندا «الاتاۋ سەرىلەرى» توبى, امىرە قاشاۋباەۆ اتىنداعى وبلىستىق فيلارمونيا انشىلەرى ونەر كورسەتىپ, جينالعان قاۋىمعا كوتەرىڭكى كوڭىل كۇي سىيلادى.
اباي وبلىسى
