فوتو: gov.kz
3 قاراشادان باستاپ «ناۋرىز» جانە «ناۋرىز جۇمىسكەر» جەڭىلدەتىلگەن يپوتەكالىق باعدارلامالارىنا ءوتىنىم قابىلدانادى.
«ناۋرىز» باعدارلاماسىمەن باسپانالى بولۋعا ۇمىتتىلەر ءوتىنىمدى 3 قاراشا – 1 جەلتوقسان ارالىعىندا بەرۋى ءتيىس.
باعدارلاماعا «وتباسى بانكىنىڭ» سالىمشىلارى, دەپوزيتى جانە شوتىندا كەمى 2 ميلليون جيناعى بار ازاماتتار قاتىسا الادى. ۇمىتكەردىڭ جانە وتباسى مۇشەلەرىنىڭ اتىنا كەيىنگى 5 جىلدا ءۇي رەسىمدەلمەگەن بولۋى شارت.
تازا ارلەنگەن جاڭا تۇرعىن ءۇي ءۇشىن باستاپقى جارنا – 10 پايىز, ارلەنبەگەن باستاپقى نەمەسە قايتالاما تۇرعىن ءۇي ءۇشىن – 20 پايىز بەلگىلەنگەن.
وڭىردەگى ازاماتتار ءۇشىن باسپانا باعاسىنىڭ ەڭ جوعارعى سوماسى – 30 ميلليون بولسا, استانا مەن الماتى قالالارىنىنان باسپانا ساتىپ الۋشىلار ءۇشىن - 36 ميلليون تەڭگە.
ءوتىنىمدى Baspana Market پورتالى ارقىلى بەرۋگە بولادى. نەسيەنى وتەۋ مەرزىمى – 19 جىل.
ونەركاسىپ جانە قۇرىلىس, ەنەرگەتيكا, اۋىل شارۋاشىلىعى مەن سۋ رەسۋرستارى جانە يرريگاتسيا ماماندارى «ناۋرىز جۇمىسكەر» باعدارلاماسىنا ء وتىنىمدى 3 قاراشادان باستاپ بەرە الادى. باعدارلاما اياسىندا بيىل 50 ملرد. كولەمىندە 2000 نەسيە بەرۋ جوسپارلانعان.
ءوتىنىم بەرۋشىنىڭ كەيىنگى 6 ايداعى رەسمي تابىسى, ءوزى مەن وتباسى مۇشەلەرىنىڭ (زايىبى, كامەلەتكە تولماعان بالالارى) اتىندا كەيىنگى 5 جىلدا باسپانا بار-جوعى تەكسەرىلەدى. سونداي-اق ۇمىتكەردىڭ «وتباسى بانكىندە» شوتى اشىلىپ, وندا 2 ميلليون تەڭگە بولۋى ءتيىس.
نەسيە شارتتارى مەن باستاپقى جارنا مولشەرى مەن نەسيە مەرزىمى «ناۋرىز» باعدارلاماسىمەن بىردەي.
ميگرانتتاردى تىركەۋ ءتارتىبى جەڭىلدەتىلەدى
2025 جىلدىڭ 1 قاراشاسىنا دەيىن كوشى – قون پروتسەستەرىن ەسەپكە الۋدىڭ بىرىڭعاي تسيفرلىق پلاتفورماسى ىسكە قوسىلادى. ول قاراشادان باستاپ بارلىق ءراسىمدى ءبىر سەرۆيستە بىرىكتىرىپ, مەملەكەتتىك ورگاندار مەن كەلۋشىلەر اراسىنداعى ءوزارا ءىس-قيمىلدى جەڭىلدەتەدى.
جاساندى ينتەللەكت جانە تسيفرلىق دامۋ ءمينيسترى جاسلان ماديەۆتىڭ ايتۋىنشا, جاڭا مودەل ميگرانت ساپارىنىڭ ماقساتىن الدىن الا بىلۋگە, تەكسەرۋلەردى اۆتوماتتاندىرۋعا جانە كوشى – قون اعىندارىن بولجاۋعا مۇمكىندىك بەرەدى.
سۋبسيديالاناتىن جۇمىس ورىندارىنا وتىنىمدەردى قابىلداۋ باستالادى
وسى جىلدىڭ 1 – قاراشاسىنان 31 – جەلتوقسانىنا دەيىن جۇمىس بەرۋشىلەر 2026 جىلعا سۋبسيديالاناتىن جۇمىس ورىندارىن ۇيىمداستىرۋعا ءوتىنىم بەرە الادى. وتىنىمدەر Enbek.kz ارقىلى ەلەكتروندىق فورماتتا قابىلدانادى.
ماگيستراتۋرا مەن دوكتورانتۋراعا تۇسۋگە ىنتالى ءبىلىم الۋشىلار ءۇشىن 28 – قازان باستالعان قۇجات قابىلداۋ ءراسىمى قاراشا ايىندا دا جالعاسادى.
ماگيستراتۋرا ءۇشىن –14 قاراشا;
دوكتورانتۋرا ءۇشىن – 27 قاراشا.
تەستىلەۋ قۇنى:
ماگيستراتۋرا –14 693 تەڭگە;
دوكتورانتۋرا – 21 072 تەڭگە.
ال ءوتىنىش عىلىم جانە جوعارى ءبىلىم مينيسترلىگىنە قاراستى ۇلتتىق تەستىلەۋ ورتالىعىنىڭ app.testcenter.kz سايتىندا تولتىرىلادى.
