2025 جىلعى 15 قىركۇيەكتەن باستاپ كۇشىنە ەنگەن جاڭا ەرەجەلەرگە سايكەس, جۇرگىزۋشىلەر جول ساپاسى نورماتيۆتەرىنە ساي كەلمەيتىن ۋچاسكەلەر ءۇشىن اقى تولەمەيدى. الايدا ءالى كۇنگە دەيىن قاي جولداردا ءجۇرۋ تەگىن بولاتىنى رەسمي تۇردە جاريالانعان جوق.
ۇلتتىق كومپانيانىڭ مالىمەتىنشە, ارنايى كوميسسيا بارلىق اقىلى جولداردى تەكسەرىپ جاتىر. قۇراستىرىلعان اكتىلەر كولىك مينيسترلىگىنە جولدانادى, ال مينيسترلىك تولەم مولشەرىن وزگەرتۋ تۋرالى بۇيرىق دايىندايدى. اقاۋى بار جول ۋچاسكەلەرىنىڭ ءتىزىمى وسى جىلدىڭ قاراشا ايىنىڭ سوڭىنا دەيىن جاريالانۋى ءتيىس.
– مىسالى, ەگەر كوميسسيا 100 كم جولدىڭ ىشىندە كەم دەگەندە 10 كم نورماتيۆكە ساي ەمەس دەپ تاپسا, ءبىز ءتيىستى وزگەرىستەر ەنگىزەمىز. تولەم تەك قالعان 90 كم ءۇشىن الىنادى. اقاۋلار جويىلعاننان كەيىن بۇل ۋچاسكەنى قايتادان اقىلى جولدار قاتارىنا قوسۋ قۇقىعىن ساقتايمىز. كوميسسيا 10 قاراشاعا دەيىن بارلىق اقىلى جولداردى تەكسەرىپ ءبىتىرۋى ءتيىس. 25–30 قاراشا ارالىعىندا كولىك مينيسترلىگى بۇيرىق شىعارىپ, قاي ۋچاسكەلەر ءۇشىن تولەم الىنبايتىنىن حابارلايمىز, – دەدى "قازاۆتوجول" ۇك" اق باسقارما توراعاسى دارحان يماناشەۆ.
كولىك مينيسترلىگى جۇرگىزۋشىلەر جول قوزعالىسىنىڭ قاۋىپسىزدىگى مەن جايلىلىعىنا كەدەرگى كەلتىرەتىن اقاۋلار انىقتالعان ۋچاسكەلەر ءۇشىن اقى تولەمەيتىنىن مالىمدەگەن. الايدا ۆەدومستۆو ناقتى قاي جولدار تۋرالى ءسوز بولىپ وتىرعانىن جانە بۇل جاڭاشىلدىقتىڭ قالاي رەتتەلەتىنىن ناقتىلاماعان.
