عىلىم جانە جوعارى ءبىلىم مينيسترلىگى ءتىل ساياساتى كوميتەتى مەن Maqsut Narikbayev University وتكىزگەن بۇل سايىسقا بىرنەشە جوعارى وقۋ ورنىنىڭ ستۋدەنتتەرى قاتىستى. ولار قۇقىق سالاسىنداعى ءتۇرلى تاپسىرمانى ورىنداپ, زاڭ تۇرعىسىنان تالداۋ جاسادى. اسىرەسە شىعارماشىلىق كەزەڭ ەرەكشە تارتىستى ءوتتى. بۇل كەزەڭدە ستۋدەنتتەر زاڭ تاقىرىپتارىن زاماناۋي الەۋمەتتىك جاعدايلارمەن بايلانىستىرا وتىرىپ, ۇتقىر جاۋاپ بەرۋگە تىرىستى. بايقاۋ بارىسىندا قازاق جانە ورىس تىلىندە بەرىلگەن زاڭ باپتارى ءوزارا سالىستىرىلىپ, سايكەسسىزدىكتەر انىقتالدى, سونداي-اق كوماندالار تاراپىنان ۇسىنىستار ايتىلدى. وسىلايشا, ستۋدەنتتەر زاڭنىڭ حالىققا قىزمەت ەتۋى ءۇشىن ونىڭ ءماتىنى دۇرىس ءارى تۇسىنىكتى بولۋىنا تاعى ءبىر مارتە كوز جەتكىزدى.
«بۇل بايقاۋ ۇلكەن تاجىريبە الاڭى بولدى. تەوريالىق ءبىلىمىمىزدى ناقتى زاڭ نورمالارى ارقىلى تالداپ, ونى كوپشىلىككە ۇعىنىقتى ەتىپ جەتكىزۋگە تىرىستىق. اسىرەسە اۋدارىلعان زاڭ ماتىندەرىن تۇپنۇسقامەن سالىستىرۋ بارىسىندا ءبىر ءسوزدىڭ ءوزى ۇلكەن ءرول وينايتىنىن, ونىڭ مۇلدەم باسقا ماعىناعا اينالىپ كەتەتىنىن تەرەڭ سەزىندىك. جۇمىس داعدىلارىمىز ارتتى, ءوز ويىمىزدى دالەلمەن ايتۋعا ماشىقتاندىق. مۇنداي بايقاۋلار بولاشاقتا كاسىبي تۇرعىدان وسۋىمىزگە ايرىقشا سەرپىن بەرەدى», دەدى سايىسقا قاتىسۋشى احمەت ءادىل.
بايقاۋ ناتيجەسىندە 3-ورىنعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «كۇلتەگىن» توبى, 2-ورىنعا اكادەميك ە.ا.بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىنىڭ «ZaŋOne» توبى يە بولسا, ال Maqsut Narikbayev University-ءنىڭ «كەمەل زاڭگەر» توبى جەڭىمپاز اتاندى.
