كونفەرەنتسيانى ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى-رەكتور جانسەيىت تۇيمەباەۆ اشىپ, قاتىسۋشىلاردى رەسپۋبليكا كۇنىمەن قۇتتىقتادى. رەكتور ۇلتتىق بىرلىكتىڭ سيمۆولىنا اينالعان بۇل كۇندى مەرەكەلەۋ ماقتانىش پەن بولاشاققا دەگەن سەنىممەن اتاپ وتىلەتىنىنە توقتالدى. ايتۋىنشا, اكادەميكتەر سۇلتان سارتاەۆ پەن سالىق زيمانوۆ سىندى ۇلت زيالىلارىنىڭ ەڭبەكتەرىن ەرەكشە اتاپ ءوتىپ, ولاردىڭ ەسىمدەرى ەلىمىزدىڭ كونستيتۋتسيوناليزم تاريحىندا ماڭگىلىككە جازىلىپ قالدى.
– قازىرگى تاڭدا قازاقستان تسيفرلىق تەحنولوگيالار مەن جاساندى ينتەللەكت داۋىرىندە جاڭا بەلەسكە قادام باستى. پرەزيدەنت قاسىم-جومارت توقاەۆتىڭ باسشىلىعىمەن ەلىمىز «زاڭ جانە ءتارتىپ» قاعيداتتارىنا نەگىزدەلگەن جاڭعىرۋ ستراتەگياسىن تابىستى ىسكە اسىرىپ جاتىر. بۇل باعىت ادىلەتتىلىك, اشىقتىق جانە جاۋاپكەرشىلىك قۇندىلىقتارىن تۇراقتى دامۋدىڭ باستى ۇستانىمىنا اينالدىردى», – دەدى رەكتور.
ءىس-شارا بارىسىندا پارلامەنت ءماجىلىسىنىڭ دەپۋتاتى يرينا سميرنوۆا, زاڭ عىلىمىنىڭ دوكتورى, پروفەسسور يگور روگوۆ, الماتى قالاسى پروكۋرورىنىڭ ورىنباسارى دامير قاتاەۆ جانە وزگە دە قاتىسۋشىلار قۇتتىقتاۋ ءسوز سويلەپ, جيىن پلەنارلىق وتىرىستاردا جالعاستى.
ەلىمىزدىڭ كورنەكتى عالىمدارى مەن ساراپشىلارى قازاقستاننىڭ ەگەمەندىگى مەن مەملەكەتتىلىگىنىڭ قالىپتاسۋى, ساياسي جۇيەنىڭ دامۋى, الەۋمەتتىك-ەكونوميكالىق جانە قۇقىقتىق جاڭعىرۋ ۇدەرىستەرى جونىندە مازمۇندى بايانداما جاسادى.
كونفەرەنتسيانىڭ سەكتسيالىق وتىرىستارىندا «ەگەمەن مەملەكەت رەتىندەگى قازاقستاننىڭ كونستيتۋتسيالىق-قۇقىقتىق دامۋى», «مەملەكەتتىك ەگەمەندىك – قۇندىلىق رەتىندە: سىن-قاتەرلەر مەن بولاشاققا پانارالىق كوزقاراس», «ەكونوميكالىق ساياسات جانە تۇراقتى دامۋدىڭ كونستيتۋتسيالىق قاعيداتتارى» جانە تاعى باسقا تاقىرىپتار كەڭىنەن تالقىلاندى.
القالى جيىنعا ەلىمىزدىڭ جانە شەتەلدىڭ بەدەلدى عالىمدارى, مەملەكەت جانە قوعام قايراتكەرلەرى, ۋنيۆەرسيتەت باسشىلىعى, بەلگىلى عالىمدار, پروفەسسورلار, وقىتۋشىلار مەن ستۋدەنتتەر قاتىستى.
الماتى
