ەلىمىزدىڭ دۇنيەجۇزىلىك ساۋدا ۇيىمىمەن كەلىسسوزدەرى اياقتالۋعا جاقىن

استانا. 19 اقپان. قازاقستاننىڭ دۇنيەجۇزىلىك ساۋدا ۇيىمىنا كىرۋ جونىندەگى كەلىسسوزدەرى ءساۋىر-مامىر ايلارىندا تولىق اياقتالادى. بۇل تۋرالى egemen.kz حابارلادى. ۇلتتىق ەكونوميكا ءمينيسترى ەربولات دوساەۆتىڭ ايتۋىنشا, بۇگىندە دۇنيەجۇزىلىك ساۋدا ۇيىمىنا كىرۋ پروتسەستەرى بويىنشا كەلىسسوزدەر سوڭعى كەزەڭگە شىققان. «وتكەن جىلدىڭ نەگىزگى قورىتىندىسى قازاقستاننىڭ ۇيىمعا كىرۋدەگى باستى كەلىسسوزشىلەرىنىڭ ءبىرى – ەۋروپالىق وداقپەن ەكىجاقتى كەلىسسوزدەردى اياقتاۋى بولدى. ءبىز كەلىسىمگە قول قويدىق», – دەدى مينيستر. سونداي-اق, ول اقش-پەن كەلىسسوزدەر بويىنشا نەگىزگى ماسەلەلەردە ۋاعدالاستىققا قول جەتكىزىلگەنىن تىلگە تيەك ەتتى. قازىرگى ۋاقىتتا اقش ساۋدا وكىلدەرىمەن فيتوسانيتاريا تالاپتارىمەن بايلانىستى كەلىسسوزدەر قارقىندى جۇرگىزىلۋدە. «ءبىزدىڭ جوسپارىمىز – ءساۋىر-مامىر ايلارىندا سايكەسىنشە كەلىسسوزدەردى تولىعىمەن اياقتاۋ», – دەگەن ە.دوساەۆ اتالعان نورمالار بويىنشا الماتىدا ەۋروپالىق وداقپەن قوسىمشا كەلىسىمدەر جۇرگىزىلەتىنىن اتاپ ءوتتى. جولدىباي بازار. دەرەك: egemen.kz. سۋرەت: matritca.kz.