قازاقستان بوكسشىلارى ريودا 2 التىن مەدالعا ءۇمىت ارتادى

استانا. 19 اقپان. قازاقستان بوكسشىلارى 2016 جىلى برازيليانىڭ ريو-دە-جانەيرو قالاسىندا وتەتىن وليمپيادادا ەكى التىن مەدال جەڭىپ الۋدى العا جوسپارلاعالى وتىر. بۇل تۋرالى بۇگىن بوكس فەدەراتسياسىنىڭ فۋنكتسيونەرلەرى ايتقان سوزگە سۇيەنگەن «راديوتوچكا» حابارلادى. ءدال قازىرگى تاڭدا قازاقستان بوكسى سپورتتىڭ بۇل ءتۇرى بويىنشا الەم رەيتينگىسىندە ءبىرىنشى ساتىدا تۇر. ەلىمىزدىڭ بىلعارى قولعاپ شەبەرلەرى حالىقارالىق تۋرنيرلەردىڭ بارلىعىندا ءساتتى ونەر كورسەتىپ ءجۇر. ونداي جارىستاردان جاستار مەن جاسوسپىرىمدەرىمىز دە قۇرقول قايتىپ جۇرگەن جوق. ال ايەلدەر اراسىنداعى الەم چەمپيوناتىندا نازگۇل قىزايباي ءوز قۇربىلارى ىشىنەن ءبىرىنشى بولىپ ەڭ بيىك تۇعىرعا كوتەرىلدى. بيىلعى جىل – وليمپيادا الدىنداعى جىل. جىگىتتەر ريودا بولاتىن بوكس تۋرنيرىنە العاشقى ليتسەنزيالاردى كاتار استاناسى – دوحا قالاسىندا وتەتىن تۋرنيردە جەڭىپ الۋعا ءتيىس. ال بۇكىلالەمدىك بوكس سەرياسىندا 60 كيلوعا دەيىنگى سالماقتاعى بەرىك ءابدىراحمانوۆ قازىردىڭ وزىندە وسى جولداماعا قول جەتكىزىپ ۇلگەردى. بۇل دودادا تاعى 3 بوكسشىمىز ازىرگە ءساتتى ونەر كورسەتىپ كەلەدى. تۇتاستاي العاندا, 2015 جىلى قازاقستان قۇراماسىنىڭ بوكسشىلارى 29 حالىقارالىق تۋرنيرگە قاتىسىپ, 13 وقۋ-جاتتىعۋ جيىنىن وتكىزبەكشى. «بىزدە الەم چەمپيوناتىنا قاتىساتىندار اراسىندا ليدەرلەر بار. ءبىز ولاردان جوعارى ناتيجە كۇتەمىز», - دەدى وسى ورايدا قۇرامانىڭ باس جاتتىقتىرۋشىسى مىرزاعالي ايتجانوۆ. دامير قوجامقۇل.