قازاقستان تاۋەلسىزدىك العانعا دەيىن ەلىمىزدە كاسىبي اپاتتىق-قۇتقارۋ قىزمەتى بولماعان ەدى. سول جىلدارى ادامداردى جانە قوعامدى اپاتتىق جاعدايلاردان قۇتقارۋ ىسىمەن كوبىنە قوعامدىق ۇيىمدار مەن ەرىكتى قۇتقارۋ بەكەتتەرى اينالىسقان. ال بۇل مىندەتتىڭ ءبىر بولىگى ميليتسيا قىزمەتكەرلەرىنە جۇكتەلدى.
مەملەكەتتىك دەڭگەيدە ماڭىزدى بۇل قىزمەت جۇيەسىن قالىپتاستىرۋ ماقساتىندا 1995 جىلى ەلىمىزدىڭ توتەنشە جاعدايلار جونىندەگى مەملەكەتتىك كوميتەتى قۇرىلدى. وسى تاريحي شەشىمنىڭ ناتيجەسىندە 19 قازان – قۇتقارۋشىلار كۇنى بولىپ بەلگىلەندى.
توتەنشە جاعدايلار سالاسى — ۇلكەن جاۋاپكەرشىلىكتى, تەمىردەي ءتارتىپ پەن رۋحاني بەرىكتىكتى تالاپ ەتەتىن سالا. بۇل قىزمەتتىڭ وكىلدەرى كەز كەلگەن توسىن جاعدايدىڭ الدىن الىپ, زاردابىن جويۋعا بار كۇشىن سالادى. اپاتقا ۇشىراعان ادامداردى قۇتقارىپ, العاشقى مەديتسينالىق كومەك كورسەتەدى. سوندىقتان دا قۇتقارۋشىلار زاماناۋي قۇرال-جابدىقتارمەن جاراقتاندىرىلىپ, ۇنەمى كاسىبي, مەديتسينالىق جانە پسيحولوگيالىق تۇرعىدا دايىندىقتان ءوتىپ وتىرادى.
وسىنداي ەرلىك پەن تاباندىلىقتىڭ جارقىن ۇلگىسىن جامبىل وبلىسى توتەنشە جاعدايلار دەپارتامەنتىنىڭ ازاماتتىق قورعاۋ پودپولكوۆنيگى شىنبولات بەرىك ۇلى ازىمباەۆ كورسەتىپ كەلەدى.
ول 2007 جىلى كوكشەتاۋ تەحنيكالىق ينستيتۋتىن ءتامامداپ, سودان بەرى ءورت ءسوندىرۋ سالاسىندا تابان اۋدارماي ەڭبەك ەتىپ كەلەدى. قازىرگى تاڭدا جامبىل وبلىستىق دەپارتامەنتىندە جەدەل كەزەكشى قىزمەتىن اتقارادى.
ء«ورت ءسوندىرۋ ماماندىعىن تاڭداۋىما اكەم سەبەپ بولدى. ول دا ءومىر بويى وسى سالادا ەڭبەك ەتىپ, زەينەتكە شىققان. مەن اكەمنىڭ جولىن جالعاپ, وسى قىزمەتتى تاڭدادىم. ءتىپتى جۇبايىم دا بۇل سالادان الىس ەمەس — ول 112 نومىرىندە ديسپەتچەر بولىپ ىستەيدى», دەيدى قۇتقارۋشى.
بۇل ماماندىقتىڭ اۋىرتپالىعى از ەمەس. قۇتقارۋشى كۇن سايىن قاۋىپتى ورتاعا كىرىپ, ادام ءومىرىن اراشالاپ قالادى. دەگەنمەن, شىنبولات بەرىك ۇلى ءوز تاڭداۋى ءۇشىن ەش وكىنبەيدى.
«كەز كەلگەن توتەنشە جاعدايدا ءورت ءسوندىرۋشى ەڭ الدىمەن ءوز ءومىرىن ەمەس, ادامداردىڭ اماندىعىن, ءورتتىڭ تارالۋ قاۋپىن ويلايدى. ناعىز ءورت ءسوندىرۋشى باتىل, قىزمەتىنە ادال جانە قورقىنىشىن جەڭە بىلەتىن ادام بولۋى كەرەك», دەپ ويىن تۇيىندەدى ول.
2021 جىلى جامبىل وبلىسىنداعى ينجەنەرلىك وق-دارىلەر قويماسىندا بولعان جارىلىس كەزىندە ول اۋىر جاراقات العان ەكى قىزمەتكەردى وتتىڭ اراسىنان امان الىپ شىققان. سول وقيعا كەزىندە ءوزى دە جاراقات العانىمەن, قىزمەتىنەن باس تارتپادى. ال سوڭعى وقيعادا بەس قاباتتى تۇرعىن ۇيدەن شىققان ءورت كەزىندە ءۇش بالانى قۇتقارىپ, ولاردىڭ ءومىرىن ساقتاپ قالدى.
كورسەتكەن ەرلىگى ءۇشىن ول مەملەكەت باسشىسىنىڭ قولىنان ساعادات نۇرماعامبەتوۆ اتىنداعى I دارەجەلى «ايبىن» وردەنىمەن ماراپاتتالدى.
«بۇگىنگى ماراپات وتە كەرەمەت ءوتتى. پرەزيدەنت قاسىم-جومارت كەمەل ۇلىنىڭ قولىنان ماراپات العانىما, وتە قۋانىشتىمىن. بۇعان دەيىن مۇنداي ماراپات العان ەمەسپىن. پرەزيدەنتكە, مينيسترلىككە جانە تجد باسشىلىق قۇرامىنا ءبىزدىڭ ەڭبەگىمىزدى باعالاعانى ءۇشىن العىس ايتامىن», دەيدى شىنبولات بەرىك ۇلى.
قۇتقارۋشىلاردىڭ قىزمەتى — كوزگە كورىنبەيتىن, بىراق ەل ءومىرىنىڭ قاۋىپسىزدىگىن قامتاماسىز ەتەتىن ماڭىزدى تىرەك. ولار كۇننىڭ ىستىعى مەن سۋىعىنا, جەل مەن تۇتىنگە قاراماي, ء«تىلسىز جاۋمەن» كۇرەسىپ, ءار ادامنىڭ ءومىرى ءۇشىن ارپالىسىپ كەلەدى.
سوندىقتان قۇتقارۋشىلار كۇنى – بۇل جاي عانا كاسىبي مەرەكە ەمەس, ەل اماندىعى ءۇشىن ايانباي ەڭبەك ەتەتىن, ەرلىك پەن ادامگەرشىلىكتىڭ سيمۆولىنا اينالعان جانداردىڭ مەرەكەسى.
