قاتوننىڭ بالى ميلاننىڭ كورمەسىنە بارادى

استانا. 19 اقپان. شىعىس قازاقستان وبلىسى قاتون-قاراعاي اۋدانىنىڭ ەكولوگيالىق جاعىنان تازا بيورەزەرۆات ءونىمى بيىلعى 1 مامىردا يتاليانىڭ ميلان قالاسىندا باستالاتىن بۇكىلالەمدىك «EXPO-2015» كورمەسىنە قويىلادى. بۇل تۋرالى Altaynews.kz حابارلادى. كورمەنىڭ ءوزى «پلانەتانى اسىراۋ. ومىرگە كەرەكتى قۋات» دەگەن ايدارمەن وتەدى. قاتون-قاراعاي ۇلتتىق پاركى يۋنەسكو-نىڭ بيوسفەرا رەزەرۆاتى حالىقارالىق ستاتۋسىن العاننان بەرى ول دامۋدىڭ جاڭا مۇمكىندىكتەرىنە قول جەتكىزدى. وسىنىڭ تاعى ءبىر ايعاعى, پارك ميلاندا 1 مامىردان 31 قازانعا دەيىن وتەتىن «EXPO-2015» كورمەسىنە قاتىسۋ جونىندەگى ۇسىنىسىنا قولداۋ الدى. بۇل تۋرالى «قاتون-قاراعاي مەملەكەتتىك ۇلتتىق پاركى» رەسپۋبليكالىق مەملەكەتتىك باسقارماسى ەكولوگيالىق اعارتۋ جانە تۋريزم ءبولىمىنىڭ باستىعى الەكساندر كوبزارەۆ ايتتى. ميلانداعى حالىقارالىق كورمە ەكولوگيالىق جاعىنان تازا ونىمدارگە ارنالعان. مۇنداعى ءسوز تەك تاعام تۋرالى عانا ەمەس, سونىمەن قاتار كيىم-كەشەك پەن تۇرمىستىق تۇتىنىم زاتتارى تۋرالى دا بولىپ وتىر. الدىن الا مالىمەت بويىنشا, ءبىزدىڭ ادامدار يتالياعا قاتونىڭ بالىن اپارعالى وتىر. جەرگىلىكتى ەكولوگيا-تۋريزم ورتالىقتارىنىڭ ماماندارى حالىقارالىق «التىن التاي – ايماقتى دامىتۋ بايلىعى» گرانتتىق جوباسىنىڭ شەڭبەرىندە بال قالبىرلارىنا جاپسىرما قاعازدار دايىندادى. وسكەمەندە بىرنەشە جىلدان بەرى ءوتىپ كەلە جاتقان حالىقارالىق بال فەستيۆالىندە شەتەلدىك قاتىسۋشىلار وبلىستىڭ قاتون-قاراعاي اۋدانىنان اكەلىنگەن بال ءونىمىنىڭ وزىندىك كەرەمەت ءدامىن تالاي مارتە اتاپ ءوتىپ كەلدى. كورمەگە اپارىلاتىن تاۋارلار ءتىزىمى كەڭەيتىلە تۇسەدى. ونىڭ قاتارىنا قازاق حالقىنىڭ ءسۇت ونىمدەرى, سىيكادەلەر مەن كيىزدەن جاسالعان ءتۇرلى بۇيىمدار كىرەدى. قازاقستان ميلانداعى بۇكىلالەمدىك كورمەگە قاتىسۋعا تىلەك بىلدىرگەن 144 ەلدىڭ قاتارىندا بار. بۇل ءبىزدىڭ ەلىمىز ءۇشىن استانادا وتەتىن «EXPO-2017» كورمەسى الدىنداعى تاجىريبە جيناۋ دا بولىپ تابىلادى. مۇرات ايتقوجا. دەرەك, فوتو: Altaynews.kz.