سۋرەتتى تۇسىرگەن – يگور بۋرگاندينوۆ
فورۋم اياسىندا قوعامدىق كەڭەستەردىڭ IV رەسپۋبليكالىق ءماجىلىسى ءوتتى. وعان مادەنيەت جانە اقپارات ءمينيسترى ايدا بالاەۆا, وڭىرلىك جانە رەسپۋبليكالىق قوعامدىق كەڭەستەردىڭ مۇشەلەرى, ساراپشىلار, حالىقارالىق سەرىكتەستەر مەن ازاماتتىق سەكتور وكىلدەرى قاتىستى.
جيىندا مينيستر قوعامدىق ينستيتۋتتار تۇراقتى دامىپ, ولاردىڭ ءرولى ارتىپ كەلە جاتقانىن اتاپ ءوتتى.
– قوعامدىق كەڭەستەردىڭ ءتيىمدى جۇمىسى كوبىنە سىزدەردىڭ بەلسەندى ۇستانىمدارىڭىز بەن باستاماشىلدىقتارىڭىزعا بايلانىستى. بۇل الاڭدا سىزدەر ۇلتتىق قۇرىلتاي مۇشەلەرى سياقتى جەرگىلىكتى دەڭگەيدە كوتەرىلگەن وزەكتى ماسەلەلەر مەن ۇسىنىستاردى تالقىلاۋعا باستاماشى بولا الاسىزدار. بۇل – ازاماتتاردىڭ پىكىرىن رەسپۋبليكالىق دەڭگەيگە جەتكىزۋدىڭ ءتيىمدى جولى, – دەدى ا.بالاەۆا.
مينيستر حالىقپەن كەرى بايلانىستى نىعايتۋ جانە قوعامدىق كەڭەستەر ينستيتۋتىن زاماناۋي ۇردىستەرگە ساي جەتىلدىرۋ قاجەتتىگىن ايتتى. وسى ماقساتتا ول كەڭەستەردىڭ جۇمىسىندا تسيفرلىق تەحنولوگيالار مەن جاساندى ينتەللەكت مۇمكىندىكتەرىن كەڭىنەن قولدانۋدى ۇسىندى. سونىمەن قاتار ا.بالاەۆا قوعامدىق كەڭەستەردىڭ پارلامەنتتىك رەفورمالارعا بەلسەندى قاتىسۋىنىڭ ماڭىزدىلىعىن ەرەكشە اتاپ ءوتتى.
– پرەزيدەنت اتاپ وتكەندەي, بۇل ماسەلە قوعامنىڭ كەڭىنەن قاتىسۋىن, حالىق پىكىرىن جان-جاقتى تالداۋ مەن زەردەلەۋدى قاجەت ەتەدى. سوندىقتان قوعامدىق كەڭەستەردىڭ كونستيتۋتسيا باپتارىنا تولىقتىرۋلار مەن وزگەرىستەر ەنگىزۋ جونىندەگى ۇسىنىستاردى ازىرلەۋ ۇدەرىسىنە تىكەلەي ارالاسۋى ماڭىزدى دەپ سانايمىن, – دەدى مينيستر.
ا.بالاەۆا قوعامدىق كەڭەستەردىڭ جۇمىس تيىمدىلىگىن ارتتىرۋ جانە قوعامدىق باقىلاۋدى كۇشەيتۋ ماقساتىندا كەڭەستەردىڭ حالىق الدىندا اشىق ەسەپ بەرۋ تاجىريبەسىن ەنگىزۋدى ۇسىندى. ونىڭ ايتۋىنشا, «قوعامدىق كەڭەستەر تۋرالى» زاڭدا بەكىتىلگەن اشىقتىق پەن ايقىندىق قاعيداتتارى تەك قاعاز جۇزىندە ەمەس, ءىس جۇزىندە جۇزەگە اسۋعا ءتيىس.
سونداي-اق مينيستر قوعامدىق باقىلاۋدىڭ تەك جەكەلەگەن ماسەلەلەرمەن شەكتەلمەۋىنە دە نازار اۋدارۋ قاجەتىن اتاپ ءوتتى. ونىڭ پىكىرىنشە, بۇل باعىت پرەزيدەنتتىڭ باستامالارى مەن ۇلتتىق جوبالارىنىڭ («زاڭ جانە ءتارتىپ», «تازا قازاقستان», «ادال ازامات», ت.ب.) ىسكە اسىرىلۋىن جۇيەلى تۇردە مونيتورينگتەۋ مەن ىلگەرىلەتۋگە باعىتتالۋعا ءتيىس. بۇل جۇمىسقا قوعام وكىلدەرىن كەڭىنەن تارتۋ قاجەت.
قازىر ەلىمىزدە 263 قوعامدىق كەڭەس قۇرامىندا 4 مىڭنان اسا بەلسەندى ازامات ەڭبەك ەتىپ جاتىر. كەيىنگى ءۇش جىلدا ولار ازاماتتاردىڭ قۇقىقتارى مەن بوستاندىقتارىنا قاتىستى 9 مىڭنان اسا نورماتيۆتىك-قۇقىقتىق اكتىلەر جوباسىن قاراستىرعان. سونداي-اق 2 100 مەملەكەتتىك ورگان باسشىسىنىڭ ەسەپتەرى تىڭدالىپ, 820 قوعامدىق تىڭداۋ ۇيىمداستىرىلعان. بۇعان قوسا الەۋمەتتىك قورعاۋ, جەر قاتىناستارى, دەنساۋلىق ساقتاۋ جانە باسقا دا ماسەلەلەر بويىنشا 2 مىڭنان اسا ازاماتتىڭ وتىنىشتەرى قارالعان.
ءماجىلىس قورىتىندىسى بويىنشا قوعامدىق كەڭەستەر قىزمەتىنىڭ قۇقىقتىق جانە ۇيىمداستىرۋشىلىق نەگىزدەرىن جەتىلدىرۋگە باعىتتالعان ۇسىنىستار ازىرلەنەدى. بۇل شەشىمدەر الداعى ۋاقىتتا ۋاكىلەتتى مەملەكەتتىك ورگانداردىڭ جۇمىسىندا ەسكەرىلىپ, ودان ءارى رەفورمالارعا دا نەگىز بولماق.
ال «ازاماتتىق فورۋم: ۇسىنىستاردان ناتيجەگە» پانەلدىك سەسسياسىندا ساراپشىلار ەلىمىزدەگى 2020–2030 جىلدارعا ارنالعان ازاماتتىق قوعامدى دامىتۋ تۇجىرىمداماسىن ىسكە اسىرۋدىڭ ءبىرىنشى كەزەڭىنىڭ قورىتىندىلارىن شىعارىپ, X جانە XI ازاماتتىق فورۋمداردا ۇسىنىلعان ۇسىنىستاردىڭ قانشالىقتى جۇزەگە اسقانىن تالقىلادى.
بيىل 2020 جىلى 27 تامىزداعى پرەزيدەنت جارلىعىمەن بەكىتىلگەن تۇجىرىمدامانى ىسكە اسىرۋدىڭ ءبىرىنشى كەزەڭى اياقتالادى. جۇمىس ازاماتتىق قوعامدى دامىتۋدىڭ جەكەلەگەن قىرلارىن قامتيتىن بەس نەگىزگى باعىت بويىنشا جۇرگىزىلگەن.
ازاماتتىق ىستەر كوميتەتىنىڭ توراعاسى گۇلبارا سۇلتانوۆانىڭ ايتۋىنشا, 2020–2025 جىلداردىڭ قورىتىندىسى بويىنشا تۇجىرىمدامانى ىسكە اسىرۋدىڭ ءبىرىنشى كەزەڭى تابىستى ىسكە اسقان.
– قازاقستان 2020–2025 جىلدارى ازاماتتىق قوعام ينستيتۋتتارىن دامىتۋدا ايتارلىقتاي ىلگەرى قادام جاسادى. بىرىنشىدەن, ۇكىمەتتىك ەمەس ۇيىمدار مەن ازاماتتىق باستامالاردىڭ قىزمەتىنە ارنالعان زاڭنامالىق بازا نىعايتىلدى. ەكىنشىدەن, ازاماتتىق بەلسەندىلىكتى, ۆولونتەرلىكتى جانە قايىرىمدىلىقتى قولداۋ شارالارى ىسكە اسىرىلدى. ۇشىنشىدەن, ونلاين-پەتيتسيالار مەن جاڭارتىلعان قوعامدىق كەڭەستەردەن باستاپ ۇلتتىق قۇرىلتايعا جانە كەرى بايلانىستىڭ باسقا دا نىساندارىنا دەيىن ازاماتتار مەن ۇەۇ-نىڭ شەشىم قابىلداۋعا قاتىسۋىنىڭ جاڭا تەتىكتەرى ەنگىزىلدى. سونداي-اق مەملەكەتتىك الەۋمەتتىك تاپسىرىس پەن گرانتتار ارقىلى اۋقىمدى قارجىلاندىرۋ, كادرلاردى دايارلاۋ, ۇەۇ-لاردىڭ كاسىبيلىگى مەن تۇراقتىلىعىن ارتتىرۋ سەكتوردى ەداۋىر نىعايتۋعا مۇمكىندىك بەردى, – دەدى كوميتەت توراعاسى.
ونىڭ ايتۋىنشا, تۇجىرىمدامانىڭ ەكىنشى كەزەڭى قول جەتكىزىلگەن ساندىق ناتيجەلەردى مەملەكەت پەن قوعام اراسىنداعى ساپالى ءوزارا ءىس-قيمىلعا اينالدىرۋعا, ازاماتتىق سەكتوردى مەملەكەتتىڭ تولىققاندى ءارى تەڭ قۇقىقتى سەرىكتەسى رەتىندە ودان ءارى نىعايتۋعا باعىتتالعان.
