ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى (ەكسج) ۇلتتىق جوبانى ىسكە اسىرۋ بويىنشا جوبالىق كەڭسەنىڭ وتىرىسىندا 2029 جىلعا دەيىنگى جاڭعىرتۋ كارتاسىن ازىرلەۋ, ۇلتتىق جوباعا تسيفرلىق تەڭگەنى ەنگىزۋ, حالىقارالىق قارجى ينستيتۋتتارىن تارتۋ جانە اسپاپتاندىرۋدىڭ قامتىلۋى مەن قاجەتتىلىگىن تالداۋ ناتيجەلەرى قارالدى.
كەلەسى جىلى ەل بويىنشا 14 مىڭ شاقىرىمنان استام ينجەنەرلىك جەلىلەردى جوندەۋ مەن 8 مىڭنان استام جابدىقتى اۋىستىرۋعا 1 ترلن تەڭگەدەن استام قارجى قاجەت ەكەنى ايقىن بولدى.
كوممۋنالدىق كاسىپورىنداردىڭ ينۆەستيتسيالىق تارتىمدىلىعىن ارتتىرۋ ماقساتىندا ولاردى ىرىلەندىرۋ بويىنشا جۇمىس جۇرگىزىلىپ جاتىر. مەملەكەتتىك باعالى قاعازدار (مبق) تەتىگى اياسىندا ءتورت وڭىردە جىلۋ جەلىلەرى مەن سۋ تازارتۋ كەشەندەرىن جاڭعىرتۋعا باعىتتالعان 10 قاناتقاقتى جوباعا بولىنگەن 22,5 ملرد تەڭگەنىڭ 47%-ى يگەرىلدى.
«بايتەرەك» حولدينگى دۇنيەجۇزىلىك بانك, ەۋروپا قايتا قۇرۋ جانە دامۋ بانكى, سونداي-اق ەكسيمبانكپەن بەلسەندى ىنتىماقتاستىق ورناتىپ, ولاردىڭ جوبالاردى قارجىلاندىرۋعا دايىن ەكەنىن اتاپ ءوتتى. ونەركاسىپ جانە قۇرىلىس مينيسترلىگى وڭىرلەر بويىنشا «اقىلدى» ەسەپتەۋ اسپاپتارىن ورناتۋ قاجەتتىلىگىن انىقتادى. 3 ميلليوننان استام سۋ ەسەپتەگىش, تاعى سونشا قاراجاتقا ەلەكتر ەنەرگياسىن ەسەپتەگىش جانە 30 مىڭ جىلۋ ەسەپتەگىشىن ورناتۋ جوسپارلانىپ جاتىر.
وتىرىس بارىسىندا قانات بوزىمباەۆ ۇلتتىق جوبا اياسىندا ازىرلەنىپ جاتقان ەلەكتروندى ساتىپ الۋ پلاتفورماسىنىڭ دايىندىق دەڭگەيىن تەكسەرىپ, ونىڭ العاشقى 3 ءمودۋلىن 1 قاراشاعا دەيىن ىسكە قوسۋدى تاپسىردى. سونداي-اق ۆيتسە-پرەمەر ەكسج جوبالارى بويىنشا جىلدار مەن وڭىرلەر بويىنشا قاجەتتىلىكتى ايقىنداپ, دەرەكتەردى وتاندىق وندىرۋشىلەرگە بەرۋدى جانە B2B-كەزدەسۋلەر وتكىزۋدى تاپسىردى.
جوندەۋ جۇمىستارىنا قاجەتتىلىكتەر تۋرالى اقپارات modernization.kz رەسمي سايتىندا جانە مەملەكەتتىك ورگانداردىڭ ينتەرنەت-رەسۋرستارىندا جاريالانادى.
