اباي وبلىسى – اۋىل شارۋاشىلىعىن دامىتۋدا زور الەۋەتكە يە ءوڭىر. ايماقتا 11 مىڭعا جۋىق اگروقۇرىلىم جۇمىس ىستەيدى. بيىل قاڭتار-تامىز ارالىعىندا اۋىل شارۋاشىلىعى ءونىمىنىڭ جالپى كولەمى 221 ملرد تەڭگەگە جەتىپ, رەسپۋبليكا بويىنشا 4-ورىندى يەلەندى. ناقتى كولەم يندەكسى 102,9%-دى قۇرادى. جالپى جينالاتىن ەگىس كولەمى 782,1 مىڭ گەكتار بولسا, ونىڭ 80%-ى ورىلىپ, 265,2 مىڭ توننا استىق باستىرىلدى. سونىمەن قاتار 96,6 مىڭ توننا كارتوپ پەن 101,6 مىڭ توننا كوكونىس جينالدى.
«پرەزيدەنت بيىلعى جولداۋىندا ينۆەستيتسيا تارتۋدىڭ ماڭىزدىلىعىن اتاپ ءوتتى. وسى تۇرعىدا جىل باسىنان اۋىل شارۋاشىلىعىنىڭ نەگىزگى كاپيتالىنا 32 ملرد تەڭگە ينۆەستيتسيا تارتىلدى, بۇل وتكەن جىلدىڭ سايكەس كەزەڭىمەن سالىستىرعاندا 170%-عا جوعارى. وسى باعىتتا 2030 جىلعا دەيىن وبلىسىمىزدا ازىرلەنگەن وڭىرلىك ينۆەستيتسيالىق جوبالارىنىڭ كارتاسىنا سايكەس 197,5 ملرد تەڭگە كولەمىندە 85 ءىرى اگروجوبا ىسكە اسىرىلادى. كەزدەسۋىمىزدىڭ نەگىزگى ماقساتى – اۋىل شارۋاشىلىعى سالاسىنداعى مەملەكەتتىك ساياساتتىڭ نەگىزگى باعىتتارىن ءتۇسىندىرۋ عانا ەمەس, سونىمەن قاتار سىزدەردى تولعاندىرىپ جۇرگەن ناقتى ماسەلەلەردى بىرگە قاراستىرۋ, اشىق ديالوگ ورناتۋ», دەدى وبلىس اكىمى.
كەزدەسۋ بارىسىندا اۋىل شارۋاشىلىعى سالاسىن ءارتاراپتاندىرۋ, ينۆەستيتسيا تارتۋ, وڭدەۋ كاسىپورىندارىن دامىتۋ جانە ەت كومبيناتى قۇرىلىسىنىڭ بارىسى سياقتى وزەكتى ماسەلەلەر تالقىلاندى.
«اباي وبلىسى – جاڭادان قۇرىلعان ءوڭىر. اۋىل شارۋاشىلىق الەۋەتى زور ايماق. وبلىستا ءىرى ەت كومبيناتى سالىنايىن دەپ جاتىر. ول ءۇشىن مال شارۋاشىلىعىن جوعارى دەڭگەيدە دامىتۋىمىز كەرەك. مينيسترلىك تاراپىنان ءتيىستى كومەك جاسالادى», دەدى ا.ساپاروۆ.
اباي وبلىسى
