دەپۋتاتتىڭ ايتۋىنشا, قوسىمشا زەرتتەۋ جانە ءتيىستى ورگاندارمەن وتكىزىلگەن كونسۋلتاتسيالار ناتيجەسىندە كەيبىر بۇقارالىق اقپارات قۇرالدارىندا جاريالانعان ماتەريالداردا ونىڭ دەپۋتاتتىق ساۋالى بۇرمالانىپ تۇسىندىرىلگەنى انىقتالعان.
«رەسمي دەرەكتەرگە سايكەس, بەج جوباسى تولىققاندى ىسكە قوسۋعا دايىندىق كەزەڭىندە تۇر. 15 تامىزدان باستاپ جاساندى ينتەللەكت جۇيەسىمەن بىرىكتىرىلگەن ينتەرنەت-مونيتورينگتىڭ پيلوتتىق جوباسى ىسكە قوسىلدى. ول تاۋلىگىنە 800-گە جۋىق زاڭسىز سايتتى اۆتوماتتى تۇردە بۇعاتتاپ وتىر. بۇعان دەيىن مۇنداي جۇمىستاردى مەملەكەتتىك ورگاندار قولمەن ورىنداپ, ول بىرنەشە اي ۋاقىت الاتىن», دەدى ەرمۇرات باپي.
سونىمەن قاتار دەپۋتات فيسكالدىق ورگاندارمەن كەڭەسۋدەن كەيىن بۇرىن باق-تا جاريالانعان «جۇيە ەنگىزىلۋى ناتيجەسىندە زاڭدى بيزنەس سالىق تۇسىمدەرىن جوعالتادى» دەگەن تۇجىرىمنىڭ دالەلسىز ەكەنىن اتاپ ءوتتى.
«بىرىڭعاي ەسەپ جۇيەسىنىڭ باستى ماقساتى – قازاقستانداعى ويىن بيزنەسى سالاسىندا اشىق ءارى سەنىمدى تسيفرلىق ورتا قالىپتاستىرۋ جانە حالىق اراسىندا قۇمار ويىندارعا تاۋەلدىلىكتى تاراتاتىن زاڭسىز ينتەرنەت-رەسۋرستاردى بۇعاتتاۋ», دەدى ول.
بەج جۇيەسىنىڭ مەملەكەتتىك وپەراتورى – تۋريزم جانە سپورت مينيسترلىگى جانىنداعى «وپەراتور ەسۋ» جشس, ول 100% مەملەكەتتىك قاتىسۋ ۇلەسىنە يە ۇيىم بولىپ تابىلادى. جۇيە ازاماتتاردى زاڭ بويىنشا قۇمار ويىندارعا قاتىسۋعا تىيىم سالىنعان ساناتتاردان (21 جاسقا دەيىنگى تۇلعالار, بورىشكەرلەر جانە ت.ب.) قورعاۋعا جانە اقشانى جىلىستاتۋعا قارسى ءىس-قيمىل زاڭناماسىن ساقتاۋعا باعىتتالعان.
بارلىق دەرەكتەر «ۇلتتىق اقپاراتتىق تەحنولوگيالار» اق ينفراقۇرىلىمىندا ساقتالىپ, جۇيە تولىق مەملەكەتتىك باقىلاۋدا بولادى. سوندىقتان دەرەكتەردىڭ سىرتقا شىعۋ نەمەسە اعىپ كەتۋ قاۋپى جوق.
ەرمۇرات ءباپيدىڭ باستاماسىمەن جۋىق ارادا بۋكمەكەرلىك كومپانيالاردىڭ اينالىمىنان 3% كولەمىندە ماقساتتى اۋدارىم ەنگىزۋ تۋرالى زاڭنامالىق تۇزەتۋلەر قاراستىرىلماق. ونىڭ ىشىندە:
-
1% – «قازاقستان حالقىنا» قوعامدىق قورىنا,
-
1% – «SportQory» سپورتتى دامىتۋ قورىنا,
-
1% – ۇلتتىق وليمپيادا كوميتەتى جانىنداعى قورعا باعىتتالماق.
«بۇل حالىقارالىق تاجىريبەلەرگە سۇيەنگەن شارالار ويىن بيزنەسى سالاسىنداعى اشىقتىقتى, سەنىمدىلىكتى جانە بيۋدجەتتىك تۇسىمدەردىڭ تيىمدىلىگىن ارتتىرۋعا مۇمكىندىك بەرەدى. ەسۋ جوباسى نارىقتى كولەڭكەدەن شىعارىپ, بىرىڭعاي ەرەجەلەر ورناتادى», دەدى دەپۋتات.
سونىمەن قاتار ەرمۇرات باپي «وپەراتور ەسۋ» جانە وزگە دە جوباداعى تاراپتاردىڭ شەتەلدىك سانكتسيالىق ۇيىمدارمەن بايلانىسى تۋرالى بۇرىن ايتىلعان اقپاراتتىڭ شىندىققا جاناسپايتىنىن ناقتىلادى.
«مەن بۇل جوبانىڭ ىسكە اسىرىلۋىن ءارى قاراي دا مۇقيات باقىلاپ, ازاماتتارعا رەسمي دەرەكتەر نەگىزىندە تۇراقتى تۇردە اقپارات بەرىپ وتىرامىن. جاقىن ۋاقىتتا مەملەكەتتىك ورگانداردىڭ رەسمي جاۋاپتارى دا جاريالاناتىن بولادى», دەپ تۇيىندەدى ءماجىلىس دەپۋتاتى.