الماتىدا ينكليۋزيۆتى ءبىلىم بەرۋ جونىندەگى دۇنيەجۇزىلىك كونگرەسس وتەدى

2021 جىلى «ينكليۋزيۆتى ءبىلىم بەرۋ ماسەلەلەرى بويىنشا قر-نىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭىنىڭ قابىلدانۋىمەن ەرەكشە ءبىلىم بەرۋ قاجەتتىلىكتەرى بار بالالار ءۇشىن ءبىلىم بەرۋدىڭ بارلىق دەڭگەيىندە ارنايى جاعداي جاسالا باستادى.

كونگرەسس قر-نىڭ وقۋ-اعارتۋ مينيسترلىگى مەن الماتى قالاسى اكىمدىگىنىڭ قولداۋىمەن وتكىزىلەدى. ءىس-شارانىڭ باستاماشىلارى – ۇلىبريتانياداعى International Forums of Inclusion Practitioners (IFIP) جانە قازاقستانداعى «HOPE» (Help Others Pursue Education) قورى.

كونگرەسس اياسىندا دوڭگەلەك ۇستەل, پلەنارلىق سەسسيالار ت.ب. ۇيىمداستىرىلادى.

ءىس-شارا بارىسىندا ينكليۋزيۆتى ءبىلىم بەرۋدىڭ ءارى قاراي دامۋىنا باعىت بەرەتىن ماڭىزدى حالىقارالىق قۇجات – الماتى دەكلاراتسياسىنىڭ جوباسى تالقىلانادى.

وقۋ-اعارتۋ مينيسترلىگىنىڭ مالىمەتىنشە, كونگرەسستە ءىس جۇزىندەگى تاجىريبەگە, ۇشجاقتى تاسىلگە (پەداگوگيكالىق يننوۆاتسيالار, تەحنولوگيالىق جەتىستىكتەر جانە كورپوراتيۆتىك سەرىكتەستىك), سونداي-اق جاساندى ينتەللەكت پەن جاڭا تەحنولوگيالاردى ەنگىزۋگە ەرەكشە نازار اۋدارىلادى.

وعان 40 ەلدەن 1200-دەن استام دەلەگات قاتىسادى دەپ كۇتىلىپ وتىر. ولاردىڭ قاتارىندا مينيسترلەر, ساراپشىلار, حالىقارالىق ۇيىمدار مەن جەتەكشى ۋنيۆەرسيتەتتەردىڭ, زەرتتەۋ ورتالىقتارىنىڭ جانە EdTech كومپانيالاردىڭ وكىلدەرى بار. الەمدىك كورپوراتيۆتىك كوشباسشىلاردىڭ قاتىسۋى ستراتەگيالىق مۇمكىندىكتەرگە جول اشىپ, قازاقستانعا الەمنىڭ نازارىن اۋدارىپ قانا قويماي, ينۆەستيتسيالار تارتۋعا جول اشادى.