بيىل اباي جەرىندە ەگىن جيناۋ الاڭى 782,1 مىڭ گەكتارعا جەتتى. ونىڭ ىشىندە ءداندى داقىلدار – 296,5 مىڭ گەكتار, مايلى داقىلدار – 339,4 مىڭ گەكتار, كارتوپ – 5,9 مىڭ گەكتار, كوكونىس-باقشا داقىلدارى – 5,2 مىڭ گەكتار جانە جەم-ءشوپ داقىلدارى – 135,1 مىڭ گەكتار. قازىر استىقتىڭ ايتارلىقتاي بولىگى جينالىپ, قويمالارعا جەتكىزىلىپ جاتىر.
اگرارلىق ايماقتاعى ەگىن ناۋقانىنىڭ جاي-كۇيىن اباي وبلىسى اۋىل شارۋاشىلىعى باسقارماسى باسشىسىنىڭ ورىنباسارى ميراس توقتارحانوۆتان بىلگەن ەدىك. ونىڭ ايتۋىنشا, بيىل اگرارلى ايماقتا ەگىن جيناۋ قارقىنى ءتاپ-ءتاۋىر.
«بۇگىنگە دەيىن ءداندى داقىلداردىڭ 132,7 مىڭ گەكتارى ورىلدى, بۇل جالپى القاپتىڭ 44,7%-ىن قۇرايدى. ورتاشا ونىمدىلىك گەكتارىنا 14 تسەنتنەردەن اينالىپ, 189,6 مىڭ توننا استىق باستىرىلدى. ونىڭ ىشىندە بيدايدىڭ 102 مىڭ گەكتارى جينالىپ, 153,6 مىڭ توننادان استام ءونىم الىندى. مايلى داقىلداردىڭ كۇزگى ناۋقانى ەندى باستالدى, ازىرگە 220 گەكتار ورىلدى. ودان 500 توننا ءونىم الىندى. كارتوپتىڭ 2,5 مىڭ گەكتارى جينالىپ, 53,9 مىڭ توننا ءونىم قويمالارعا جەتكىزىلدى. كوكونىس-باقشا داقىلدارىنىڭ دا ناتيجەسى جاقسى. 2,7 مىڭ گەكتاردان 66 مىڭ توننا ءونىم الىندى», دەدى م.توقتارحانوۆ.
ونىڭ سوزىنشە, ەگىن جيناۋ ناۋقانىنىڭ ۇزدىكسىز ءجۇرۋى ءۇشىن اۋىل شارۋاشىلىعى تاۋار وندىرۋشىلەرىنە 23 مىڭ توننا جەڭىلدەتىلگەن ديزەل وتىنى قاراستىرىلعان. جونەلتۋ كەستەسىنە سايكەس 8,5 مىڭ تونناسى شارۋالارعا جەتكىزىلدى.
«بۇگىندە ەگىن جيناۋ جۇمىسىنا 4 مىڭ تراكتور, 2,4 مىڭ كومباين جانە 700 وراق جۇمىلدىرىلعان. جينالعان ءونىمدى ساقتاۋ ءۇشىن وبلىستا جالپى سىيىمدىلىعى 206 مىڭ توننا استىق قابىلداۋ كاسىپورنى مەن ديقانداردا 870,9 مىڭ تونناعا ارنالعان قويما بار. سونىمەن قاتار 2025 جىلعا ارنالعان مينەرالدى تىڭايتقىشتاردى ەنگىزۋ جوسپارى 63,6 مىڭ گەكتار بولعان, ول بۇگىندە تولىق ورىندالدى. ەگىنشىلىك سالاسىن قارجىلاندىرۋ كولەمى ارتتى. «كەڭ دالا» باعدارلامالارى ارقىلى شارۋاشىلىقتارعا 9,5 ملرد تەڭگە كولەمىندە جەڭىلدەتىلگەن نەسيە بەرىلدى. بۇل جۇمىستار وبلىس اكىمدىگىنىڭ تۇراقتى باقىلاۋىندا», دەيدى ول.
اباي وبلىسى
