فوتو: نيكيتا باسوۆ
كوكتەمدە جالاۋى جەلبىرەگەن اۋەسقويلار ليگاسىنا ءار وڭىردەگى ىرىكتەۋدە 277 كوماندا دوداعا تۇسسە, سولاردىڭ اراسىنان ۇزدىك شىققان 20 ۇزدىك كوماندا فينالدىق كەزەڭدە تارتىستى جالعاستىردى. جالپى ليگانىڭ ويىندارىنا 6500-دەن استام اۋەسقوي ويىنشى قاتىستى.
تالدىقورعان قالاسىندا چەمپيوندىق اتاق ءۇشىن وتكەن سايىس اسا تارتىستى ءوربىدى. ورالدىق JelaevNAN جانە الماتىلىق BKS كومانداسىنىڭ ويىنشىلارى فينالدا بارىن سالىپ وينادى. ماتچ 2:2 ەسەبىمەن اياقتالىپ, پەنالتي سەرياسىندا BKS كومانداسى جەڭىسكە جەتىپ, قازاقستان اۋەسقوي ليگاسىنىڭ العاشقى چەمپيونى اتاندى.
قازاقستان اۋەسقوي ليگاسىنىڭ ەرەجەسىنە سايكەس, جەڭىسكە جەتكەن كومانداعا كاسىبي فۋتبولعا شىعۋعا جول اشىلادى. ەندى ولار ۋەفا-نىڭ ايماقتار كۋبوگىندا ەل سەنىمىن ارقالاپ, دوداعا قوسىلادى. ودان بولەك فينالعا شىققان بۇل ەكى كوماندا ەندى 2026 جىلعى قازاقستان كۋبوگى مەن ەكىنشى ليگاعا قاتىسۋ مۇمكىندىگىنە يە بولدى.
التى ايعا سوزىلعان سايىستا ءادىل ويىن كورسەتكەنى ءۇشىن ارنايى «ادال» جۇلدەسى قاراعاندى وبلىسىنان كەلگەن «اباي» كومانداسىنا بەرىلدى. تۋرنيردە ارنايى نوميناتسيا بويىنشا بىرنەشە فۋتبولشىلار ماراپاتتالدى. اتاپ ايتقاندا:
«ۇزدىك سۇرمەرگەن»: ەلامان قالدىبەك («ندفز», تاراز)
«التىن بالا» (ۇزدىك جاس ويىنشى): داۋلەت دوسانوۆ («نايزا», اقمولا وبلىسى)
«ۇزدىك قاقپاشى»: رومان باگاۋتدينوۆ (JelaevNAN, ورال)
«ۇزدىك قورعاۋشى»: الەكساندر كيسليتسىن (RB Arman, پاۆلودار)
«ۇزدىك جارتىلاي قورعاۋشى»: ايدىن مەتاللوۆ (Barqy, سەمەي)
«ۇزدىك شابۋىلشى»: رومان پاۆينيچ (BKS, الماتى)
«ۇزدىك باسشى»: كەنجالى ايداروۆ («ندفز», تاراز)
«شەبەر» (تاجىريبەلى ۇزدىك ويىنشى): داستان ايمانوۆ (Barqy, سەمەي)
ءتۋرنيردىڭ ەڭ ۇزدىك ويىنشىسى: ءالي ساۋرانباەۆ (BKS, الماتى)
فينالدىڭ MVP-ءسى: ىقىلاس ماحامبەتوۆ (JelaevNAN, ورال)
نۇرسۇلتان الىبەكوۆ (پاۆلودار), يلاشبەك ورىنباەۆ (شىمكەنت), ۆيكتور ستاسەنكو (تالدىقورعان) باستاعان قازىلار «ۇزدىك تورەشى» دەپ تانىلدى.
