وتىرىستا سەناتورلار «دامۋشى ەلدەردى ەرەكشە ەسكەرە وتىرىپ, ەڭ تومەن جالاقىنى بەلگىلەۋ تۋرالى كونۆەنتسيانى (131-كونۆەنتسيا) راتيفيكاتسيالاۋ تۋرالى» زاڭدى قاراپ, ماقۇلدادى. تالقىلاۋ كەزىندە ايتىلعانداي, بۇل زاڭدى قابىلداۋ ەلىمىزدىڭ ەڭ تومەنگى جالاقىنى ايقىنداۋعا ارنالعان قولدانىستاعى تاسىلدەرىن حالىقارالىق دەڭگەيدە بەكىتۋ جانە الەۋمەتتىك ديالوگتىڭ قۇقىقتىق بازاسىن نىعايتۋ جولىندا ايرىقشا ماڭىزعا يە.
«دامۋشى ەلدەردى ەرەكشە ەسكەرە وتىرىپ, ەڭ تومەن جالاقىنى بەلگىلەۋ تۋرالى كونۆەنتسيانى راتيفيكاتسيالاۋ تۋرالى» زاڭ ەلىمىزدىڭ حالىقارالىق ەڭبەك ۇيىمىنىڭ مۇشەسى رەتىندەگى مىندەتتەمەلەرىن ورىنداۋ ماقساتىمەن ازىرلەنگەن. كونۆەنتسيا ازاماتتاردىڭ قاجەتتىلىكتەرىن جانە مەملەكەتتىڭ ەكونوميكالىق دامۋ دەڭگەيىن ەسكەرە وتىرىپ, ەڭ تومەنگى جالاقىنى بەلگىلەۋ جۇيەسىن ەنگىزۋدى كوزدەيدى. سونداي-اق ەڭ تومەنگى جالاقى مولشەرىن ۋاقىت وتە قايتا قاراۋ ءراسىمى ايقىندالدى. ماقۇلدانعان زاڭ ازاماتتارىمىزدى الەۋمەتتىك قورعاۋ جۇيەسىن ودان ءارى جەتىلدىرۋگە ءوز سەپتىگىن تيگىزەدى دەپ سەنەمىز», دەدى م.اشىمباەۆ.
وسىلايشا, كەلىسىمدى راتيفيكاتسيالاۋ ەلىمىزدىڭ حالىقارالىق ەڭبەك ۇيىمىنا مۇشە رەتىندەگى حالىقارالىق مىندەتتەمەلەرگە بەيىل ەكەنىن راستايدى ءارى ەڭبەكاقىنىڭ ەڭ تومەنگى دەڭگەيىن بەلگىلەۋ كەزىندە الەۋمەتتىك ادىلەت پەن ەكونوميكالىق نەگىزدەمە اراسىنداعى تەپە-تەڭدىكتى قامتاماسىز ەتەدى.
سەنات توراعاسى ەڭبەك جانە حالىقتى الەۋمەتتىك قورعاۋ مينيسترلىگىن ەڭ تومەنگى جالاقىنى ادامنىڭ قاجەتتىلىكتەرىنە, ونىڭ ءومىر ءسۇرۋ ستاندارتتارىنا سۇيەنە وتىرىپ بەلگىلەۋگە شاقىردى. ول ۆەدومستۆونىڭ ءبىرىنشى ۆيتسە-مينيسترىنە قاراتا مينيسترلىك قاجەت بولعان جاعدايدا ازايتۋ جاعىنا قاراي دەربەس تۇزەتە الاتىن قۇر ماكروەكونوميكالىق كورسەتكىشتەردەن باس تارتۋدىڭ ماڭىزدى ەكەنىن اتاپ ءوتتى.
«سىزدەر ءوز ادىستەرىڭىزگە سۇيەنىپ, ورتاشا جالاقى مەن ەڭبەك ونىمدىلىگىنە باسىمدىق بەرىپ وتىرسىزدار. الايدا بۇل جەردە كونتسەپتۋالدى ءتاسىلدى وزگەرتۋ تۋرالى ءسوز بولىپ وتىر. كوەففيتسيەنتتەردىڭ كومەگىمەن وزدەرىڭىز تۇزەتە الاتىن ماكروەكونوميكالىق كورسەتكىشتەرگە جۇگىنە بەرمەي, ادامنىڭ قاجەتتىلىكتەرىنە, ونىڭ ءومىر ءسۇرۋ ستاندارتتارىنا دەن قويۋ كەرەك. ەڭ تومەنگى جالاقىنى سونىڭ نەگىزىندە بەلگىلەۋ قاجەت. ءبىز كونۆەنتسيانىڭ ءمانىن وسىلاي تۇسىنەمىز», دەدى م.اشىمباەۆ ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اسقاربەك ەرتاەۆقا.
سونىمەن قاتار سەنات وتىرىسىندا دەپۋتاتتار «قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى قازاقستان رەسپۋبليكاسىنان كەلگەن جۇمىسكەرلەردى قاتار مەملەكەتىندە جۇمىسقا ورنالاستىرۋدى رەتتەۋ تۋرالى كەلىسىمدى راتيفيكاتسيالاۋ تۋرالى» زاڭدى قاراپ, ماقۇلدادى. سەنات توراعاسى اتاپ وتكەندەي, زاڭدى قابىلداۋ ناتيجەسىندە قاتار مەملەكەتىنە جۇمىسقا باراتىن ەلىمىزدىڭ ازاماتتارىن قۇقىقتىق جانە الەۋمەتتىك قورعاۋ قامتاماسىز ەتىلەدى.
«قارالعان كەلىسىم قازاقستان ازاماتتارىنىڭ قاتار مەملەكەتىندە جۇمىسقا ورنالاسۋى ءۇشىن قۇقىقتىق نەگىز قالىپتاستىرۋدى كوزدەيدى. وسى ماقساتپەن تاراپتار اراسىندا تۋىندايتىن قاتىناستار جان-جاقتى رەتتەلىپ وتىر. اتاپ ايتقاندا, قاتار مەملەكەتىندە جۇمىس ىستەيتىن جەرلەستەرىمىزدىڭ جول مەن باسپانا شىعىندارى شاقىرۋشى تاراپ ەسەبىنەن وتەلەدى. سونداي-اق ەڭبەك دەمالىسىمەن جانە مەديتسينالىق قىزمەتپەن قامتاماسىز ەتۋ جۇمىس بەرۋشىگە جۇكتەلدى. الداعى ۋاقىتتا بۇل زاڭ قاتار مەملەكەتىندە جۇمىس ىستەيتىن ازاماتتارىمىزدىڭ قۇقىقتارىن تولىق قورعاۋدى قامتاماسىز ەتۋگە ءوز ۇلەسىن قوسادى دەپ سەنەمىز», دەدى سپيكەر.
كەلىسىمگە قازاقستان ازاماتتارىن ىرىكتەۋ, جۇمىسقا قابىلداۋ جانە ورنالاستىرۋ كەزىندە ولاردىڭ قۇقىقتارىن ايقىنداۋ راسىمدەرىن بەلگىلەۋمەن قاتار قوسىمشا رەتىندە قاتار مەملەكەتىندە قازاقستان رەسپۋبليكاسىنان جۇمىسكەرلەردى جالداۋ تۋرالى ۇلگىلىك ەڭبەك شارتى بەكىتىلەدى. بۇل قۇجاتتا جۇمىس بەرۋشىنىڭ قاتار مەملەكەتىنىڭ زاڭناماسىنا سايكەس تۇرعىن ءۇي بەرۋ نەمەسە تۇرۋعا جاردەماقى تولەۋ, جۇمىس ورنىنا دەيىن جانە كەرى قاراي تەگىن كولىكپەن قامتۋ نە كولىك جاردەماقىسىن تولەۋ, مەديتسينالىق قىزمەت كورسەتۋ جانە جىل سايىنعى دەمالىستى قوسا العاندا, جۇمىسكەرلەردى جۇمىسپەن قامتۋ جونىندەگى مىندەتتەرى جازىلادى. بۇل رەتتە قاتاردىڭ جۇمىس بەرۋشىسى ۇلگىلىك ەڭبەك شارتىنا قانداي دا ءبىر وزگەرىستەر ەنگىزۋگە قۇقىلى ەمەس ەكەنىن ايتا كەتكەن ءجون.
