سۋرەت: primeminister.kz
2025 جىلدىڭ 1 قاڭتارىنان باستاپ رەسەيدە كۇشىنە ەنگەن زاڭعا سايكەس شەتەلدىك ازاماتتار كىرۋ جانە شىعۋ سانىنا قاراماستان, جىل ىشىندە 90 كۇننەن اسپايتىن مەرزىمدە تىركەۋسىز رەسەي فەدەراتسياسىنىڭ اۋماعىندا بولا الادى. بۇرىن بۇل مەرزىم ءبىر جىل ىشىندە 180 كۇن بولعان. بۇل شەكتەۋ حالىقارالىق جۇك پەن جولاۋشى تاسىمالىن جۇزەگە اسىراتىن جۇرگىزۋشىلەرگە دە قولدانىلادى. سونىمەن قاتار رەسەي مەن بەلارۋس اۋماعىندا بولۋ جالپى ەسەپكە الىنادى. ويتكەنى اتالعان ەلدەر وداقتاس مەملەكەت سانالادى.
بۇل نورما قازاقستان, ارمەنيا, ازەربايجان, قىرعىزستان, وزبەكستان مەن باسقالاردى قوسقاندا, ۆيزاسىز ەلدەردىڭ ءبىرازىنا قولدانىلادى. سونىمەن قاتار ۇقك شەكارا قىزمەتىندە ناقتىلانعانداي, ەگەر شەتەلدىك ازامات تۇرۋعا ىقتيارحات, رۇقسات نەمەسە ۋاقىتشا تۇرۋعا ءوتىنىش سياقتى رۇقسات قۇجاتىن راسىمدەگەن بولسا, بولۋ مەرزىمى ەسەپكە الىنبايدى.
ەلىمىزدە شەتەلدىك ازاماتتاردىڭ وسىعان ۇقساس تىركەۋسىز بولۋ تالابى – التى اي ىشىندە 90 كۇن. ول حالىقارالىق جۇك جانە اۆتوبۋس رەيسىن ورىندايتىن جۇرگىزۋشىلەرگە قولدانىلمايدى. بۇل حالىقارالىق تاجىريبەگە سايكەس.
وسى جىلى قىركۇيەكتەن باستاپ رەسەي تاراپىنان كولەڭكەلى يمپورتتى انىقتاۋ بويىنشا جۇرگىزىپ جاتقان رەيد جاعدايدى ۋشىقتىرعان. قوسىمشا تەكسەرۋ سالدارىنان كەيبىر وتكىزۋ پۋنكتتەرىندە جۇك كولىگىن تەكسەرۋ ۋاقىتى ارتتى. ءماجىلىس دەپۋتاتى بولاتبەك ناجىمەتدين ۇلى كوشى-قون زاڭناماسىنىڭ جاڭا ەرەجەلەرىنىڭ قولدانىسىنا ءىس جۇزىندە حالىقارالىق تاسىمالداۋشىلار عانا ەمەس, ەاەو ەلدەرىنىڭ ىشىندە جۇمىس ىستەيتىن جۇرگىزۋشىلەر دە كىرگەنىن اتاپ ءوتتى.
بەلگىلەنگەن 90 كۇندىك شەكتىك مەجەدەن اسقان كەيبىرەۋلەر ۇستالدى جانە كوشى-قون زاڭناماسىنىڭ جاڭا نورمالارىن بۇزۋعا بايلانىستى ەلدەن كەتۋ قاجەتتىلىگى تۋرالى حابارلاما الدى. ءبىزدىڭ تاراپ رەسەيلىك ارىپتەستەرىمەن ءتۇرلى دەڭگەيدە كەلىسسوزدەر جۇرگىزىپ جاتىر. جۋىردا سەرىك جۇمانعارين بۇل ماسەلەنى رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكينمەن كەزدەسۋدە اتاپ ءوتتى. ەكى تاراپ تۋىنداعان قيىندىقتى بىرلەسىپ جەدەل رەتتەۋگە دايىن ەكەنىن ءبىلدىردى. ەەك-كە قالىپتاسقان جاعدايدى سىرتقى ساۋداعا كەدەرگى كەلتىرەتىن توسقاۋىل دەپ تانۋ تۋرالى رەسمي ءوتىنىش جولداندى. بۇل ماسەلە 13 قازاندا ەەك الاڭىندا جانە 7 قاراشادا قازاقستان مەن رەسەي اراسىنداعى ىنتىماقتاستىق جونىندەگى ۇكىمەتارالىق كوميسسيانىڭ 26-وتىرىسىندا قارالادى.
