بۇگىندە تسيفرلىق تەحنولوگيانىڭ ادام ءومىرىنىڭ بارلىق سالاسىنا ەنىپ, كۇندەلىكتى كۇيبەڭ تىرشىلىكتى جەڭىلدەتىپ جاتقان يگىلىگى از ەمەس. بىراق ناعىز پروگرەسس – تەحنيكالىق جەتىستىك قانا ەمەس, ادامعا, اسىرەسە ەرەكشە قاجەتتىلىگى بار جاندارعا پايداسى تيگىزۋگە ءتيىس. جۋىردا سەمەي قالاسىنداعى №50 جالپى ورتا ءبىلىم بەرەتىن IT مەكتەپ-ليتسەيىنىڭ 7-سىنىپ وقۋشىلارى ايارۋ راقىمبەكوۆا مەن اقبوتا مۇراتوۆا «Helping Hand App» ءموبيلدى قوسىمشاسىن ازىرلەپتى.
بۇل قوسىمشا كورۋ قابىلەتى تومەن ادامداردىڭ كۇندەلىكتى ءومىرىن جەڭىلدەتۋگە باعىتتالعان. «MIT App Inventor» پلاتفورماسىندا جاسالعان جوبا داۋىستىق حابارلامالار ارقىلى اقپارات بەرىپ, پايدالانۋشىعا كۇندەلىكتى تاپسىرمالاردى ورىنداۋعا كومەكتەسەدى ەكەن. ينتەرفەيسى قاراپايىم, باسقارۋ جۇيەسى ىڭعايلى. تەلەفونعا QR-كود ارقىلى وڭاي ورناتىلادى.
– بۇل جوبا ءبىز ءۇشىن تەك تەحنولوگيالىق تاجىريبە ەمەس. ءبىز ەڭ الدىمەن ادامدارعا پايداسى ءتيسىن دەپ ويلادىق. الداعى ۋاقىتتا قوسىمشانى جەتىلدىرىپ, قولدانىس اياسىن كەڭەيتۋدى جوسپارلاپ وتىرمىز, – دەيدى وقۋشىلار.
جاس ونەرتاپقىشتاردىڭ جەتەكشىسى, ينفورماتيكا ءپانىنىڭ مۇعالىمى اينۇر سارعىزوۆا شاكىرتتەرىنىڭ ىنتاسى مەن جاۋاپكەرشىلىگى جوعارى ەكەنىن ايتادى.
– ولار ويعا العانىن ىسكە اسىرۋ ءۇشىن كوپ ىزدەندى. باعدارلامالاۋدى, ينتەرفەيس قۇرۋدى, دىبىستىق حابارلامالار جۇيەسىن ۇيرەندى. مۇنداي جوبالار بالالاردىڭ ادامگەرشىلىك پەن جاڭاشىلدىقتى قاتار ۇستاۋعا ۇيرەتەدى, – دەيدى پەداگوگ.
مۇنداي يگى باستامالاردى ناسيحاتتاۋ – ەلىمىزدەگى عىلىم سالاسىن دامىتۋعا سەرپىن بەرەتىنى راس. ويتكەنى ءبىز كەيدە بولىمسىز نارسەنى تالقىلاپ, شىن مانىندەگى ىزگى ىستەردى ەلەمەي جاتامىز. ال كىشكەنتاي بولسا دا ءبىر جاڭالىق ويلاپ تاۋىپ, وزگەلەردىڭ ءومىرىن جەڭىلدەتۋگە تالپىنعان بالالاردىڭ ەڭبەگى باعالاۋعا تۇرارلىق.
مەكتەپ قابىرعانسىندا وسىنداي جاڭالىقتار اشۋ ۇشىندە تەحنيكالىق مۇمكىندىك مول بولۋعا ءتيىس. سەمەي قالاسىنداعى بۇل مەكتەپكە KAZ Minerals كومپانياسى جالپى قۇنى 24 ملننان استام قارجىلاي قولداۋىمەن 11 كاسىبي مونتاج كومپيۋتەرى, 5 روبوتوتەحنيكا ستولى, روبوتتىق باعدارلامالاردىڭ سىناق الاڭدارى, ورتاڭعى سىنىپتارعا ارنالعان جابدىقتار, باستاۋىش سىنىپتارعا ارنالعان ارنالعان سىناق الاڭدارى, عىلىمي جوبالارعا ارنالعان 100 ارنايى جيناق, بەس ارنايى باعدارلاماعا ارنالعان نوۋتبۋك, شتاتيۆتەر, كاسىبي جارىق, ميكروفوندار, كاسىبي كامەرا, درون, درون-رەسسينگ جابدىقتارى, ەرەسەك سىنىپتارعا ارنالعان روبوتوتەحنيكانىڭ باستاپقى, قوسالقى جانە قۇراستىرۋشى جيناقتارى سىيعا بەرىلدى.
«بارلىق سىيلىقتى جاستارىنا قاراي بىرنەشە كاسىبي سىنىپتارعا ءبولىپ تاراتۋ جوسپارلانىپ وتىر. مۋلتيمەديا كابينەتىندەگى ءار قابىرعا پودكاستتارعا, مەكتەپ جاڭالىقتارى مەن ايدارلارعا ارنالىپ دايىندالۋدا», دەيدى مەكتەپ ديرەكتورى.
ونىڭ ايتۋىنشا, مەكتەپتە ينفورماتيكانى وقىتاتىن 11 ۇستاز بار. ولار وقۋشىلارمەن قوسىمشا روبوتوتەحنيكا, 3D-مودەلدەۋمەن اينالىسادى. بالالار توپتا جانە وقۋدان تىس دارىستەردە بەلسەندى وقىپ, جاقسى ناتيجە كورسەتىپ ءجۇر. بيىل جوعارى توپتا سايىستارعا قاتىساتىن ەكى كوماندا دايىنداۋ جانە روبوتەحنيكانىڭ باسقا سايىسىنا قاتىساتىن تاعى ەكى كوماندا جاساقتاۋ, سول ارقىلى جارىستاردىڭ حالىقارالىق كەزەڭىنە شىعۋ جوسپاردا ەكەن.
اباي وبلىسى
