فوتو: سۋ رەسۋرستارى جانە يرريگاتسيا مينيسترلىگى
ءوتىنىم قابىلداۋ, كەلىسىمشارت جاساۋ جانە تولەم جۇرگىزۋ ۇدەرىستەرىن اۆتوماتتاندىرۋعا ارنالعان ارنايى بيللينگ جۇيەسىن ازىرلەپ جاتقان سۋ رەسۋرستارى جانە يرريگاتسيا مينيسترلىگى قاراشا ايىندا بيللينگ جۇيەسىن پيلوتتىق رەجيمدە ىسكە قوسۋدى جوسپارلاپ وتىر.
سالا مينيسترلىگىنىڭ مالىمەتىنشە جاڭا جۇيە ىسكە قوسىلعاننان كەيىن «قازسۋشار» رمك سۋ پايدالانۋشىلارمەن ەلەكتروندى كەلىسىمشارتتار جاسايدى, ال تولەمدەر ەكىنشى دەڭگەيلى بانكتەردىڭ ءموبيلدى قوسىمشالارى ارقىلى جۇزەگە اسادى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ ايتۋىنشا كەلەسى جىلدان باستاپ بارلىق كەلىسىمشارت ەلەكتروندى فورماتتا راسىمدەلۋى كەرەك. بۇل تالاپ شارۋا قوجالىقتارىنا, وندىرىستىك كاسىپورىندار مەن باسقا دا سۋ پايدالانۋشىلارعا بىردەي قولدانىلادى.
«تولەم دە تەك قانا ەلەكتروندى تۇردە جۇرگىزىلۋى كەرەك. بۇل بولىنگەن سۋ رەسۋرستارىنىڭ اشىقتىعى مەن ناقتى ەسەبىن قامتاماسىز ەتۋ ءۇشىن قاجەت. بۇرىنعى كەلىسىمشارتتاردى دا جۇيەگە ەنگىزۋ قاجەت», دەدى ن.نۇرجىگىتوۆ.
