دەپۋتات اۋىلدا جۇمىس ىستەيتىن دارىگەرلەرگە قوسىمشا ەڭبەكاقى ەنگىزۋدى ۇسىندى

2024 جىلدىڭ قورىتىندىسى بويىنشا ەلىمىزدە دارىگەرلەر تاپشىلىعى 3 954 ماماندى قۇراعان. سونىمەن بىرگە, ورتا بۋىن مەديتسينا قىزمەتكەرلەرىنىڭ جەتىسپەۋشىلىگى 4 505 ادام دەڭگەيىندە قالىپ وتىر. 

2025 جىلعى 1 قاڭتارداعى جاعداي بويىنشا ەلدىڭ دەنساۋلىق ساقتاۋ جۇيەسىندە شامامەن 275 مىڭ مەديتسينا قىزمەتكەرى جۇمىس ىستەيدى, ونىڭ ىشىندە 83 مىڭنان استامى دارىگەرلەر, ال 191 مىڭعا جۋىعى ورتا مەديتسينالىق قىزمەتكەرلەر.

ەلىمىزدە تەراپەۆت, جالپى پراكتيكالىق دارىگەر, پەدياتر, اكۋشەر-گينەكولوگ, حيرۋرگ مەن انەستەزيولوگ-رەانيماتولوگ كادرلار تاپشى. 

د.تۇرلىحانوۆ سالانى بيۋدجەتتiك قارجىلاندىرۋدىڭ قىسقارۋى دا ماسەلەنىڭ شەشىلۋىنە كەدەرگى بولىپ وتىرعانىن ايتتى. 

«2025 جىلى دەنساۋلىق ساقتاۋ سالاسىنا 2 ترلن تەڭگە قاراستىرىلعان, الايدا 2024 جىلى قارجىلاندىرۋ 2,8 ترلن تەڭگەنى قۇرادى.

ساقتالىپ وتىرعان كادر تاپشىلىعى, دارىگەرلىك قۇرامنىڭ قارتايۋى جانە باستاپقى بۋىنعا تۇسەتىن جۇكتەمەنىڭ ءوسۋى - بۇل دەنساۋلىق ساقتاۋدى دامىتۋ جونىندەگى ۇلتتىق جوبالار مەن باعدارلامالاردى ىسكە اسىرۋدى ايتارلىقتاي باياۋلاتۋى مۇمكىن», دەدى دەپۋتات.

سوندىقتان د.تۇرلىحانوۆ سالاداعى كادر تاپشىلىعى ەڭ جوعارى وڭىرلەردەگى دارىگەرلەر مەن ورتا بۋىن مەديتسينا قىزمەتكەرلەرىنە مەملەكەتتىك قولداۋ شارالارىن قابىلداۋدى ۇسىندى. 

«ماسەلەن سالا ماماندارىنا الەۋمەتتىك جەڭىلدىكتەر بەرۋ, قىزمەتتىك تۇرعىن ۇيمەن قامتاماسىز ەتۋ, كوتەرمە تولەمدەر مەن ماقساتتى دايارلىققا ارنالعان ءبىلىم گرانتتارىن ءبولۋ, سونداي-اق تالىمگەرلىك پەن قايتا دايارلاۋ جۇيەسىن دامىتۋ قاجەت. دەنساۋلىق ساقتاۋ سالاسىن قارجىلاندىرۋ كولەمىن كەزەڭ-كەزەڭىمەن ارتتىرۋ مۇمكىندىگىن قاراستىرۋ, اسىرەسە مەديتسينالىق قىزمەتكەرلەردى ىنتالاندىرۋ, اۋىلدىق جەرلەردە جۇمىس ىستەيتىن ماماندارعا ەڭبەكاقىنىڭ قوسىمشا كوەففيتسيەنتىن ەنگىزۋ جانە سالالىق بيۋدجەتتىڭ قۇرىلىمىندا كادرلىق دامۋعا ارنالعان شىعىستاردىڭ ۇلەسىن كوبەيتۋ كەرەك. قازاقستان رەسپۋبليكاسىنىڭ دەنساۋلىق ساقتاۋ سالاسىن دامىتۋدىڭ 2030 جىلعا دەيىنگى كونتسەپتسياسىنىڭ جوباسىندا كادرلاردى ءبولۋدىڭ ورنىقتى تەتىگىن قۇرۋ جانە تۇراتىن جەرىنە قاراماستان حالىقتىڭ بىلىكتى مەديتسينالىق كومەككە قول جەتكىزۋىن قامتاماسىز ەتەتىن ءموبيلدى مەديتسينالىق بريگادالاردى دامىتۋ كوزدەلسىن», دەدى د.تۇرلىحانوۆ.

مەديتسينادا كادر تاپشىلىعى سەزىلىپ وتىرعان ايماقتار قاتارىندا قوستاناي وبلىسى بار. 2025 جىلدىڭ ءبىرىنشى جارتىجىلدىعىنىڭ قورىتىندىسى بويىنشا وڭىردە كادر تاپشىلىعى 326 ماماندى قۇراعان. ءدال وسىنداي ماسەلەلەر اقمولا, جامبىل, تۇركىستان وبلىستارىندا تىركەلگەن. سونداي-اق جەكەلەگەن اۋداندىق اۋىلدىق جەرلەردە دارىگەرلەرمەن قامتاماسىز ەتىلۋ شتاتتىق دەڭگەيدىڭ 75%-ىنا ارەڭ جەتەدى.