ءىس-شارانىڭ ماقساتى – ماقتا شارۋاشىلىعىنىڭ وڭىردەگى دامۋ تاريحىن, جەتىستىكتەرى مەن جاڭالىقتارىن دارىپتەۋ, جاڭا تەحنولوگيانىڭ قولدانىسىن كەڭەيتۋ جانە «جۇمىسشى ماماندىقتار جىلى» اياسىندا شارۋالارعا قۇرمەت كورسەتۋ.
فەستيۆال اياسىندا ەگىس القابىنا ەكسكۋرسيا, اۋىل شارۋاشىلىعى جانە ماقتا شارۋاشىلىعىنا ارنالعان تەحنيكا كورمەسى ۇيىمداستىرىلىپ, جاڭا اگروتەحنولوگيالار تانىسترىلىمى ءوتتى.
سالتاناتتى شاراعا ارنايى قاتىسقان تۇركىستان وبلىسىنىڭ اكىمى نۇرالحان كوشەروۆ اۋىل شارۋشالىعى ەڭبەككەرلەرىن مەرەكەمەن قۇتتىقتاپ, سالا ۇزدىكتەرىن ماراپاتتادى.
– سىزدەردى «AQ DALA» ماقتا فەستيۆالى سالتاناتتى مەرەكەسىنىڭ اشىلۋىمەن شىن جۇرەكتەن قۇتتىقتايمىن. ماقتا – ءوڭىرىمىزدىڭ باستى داقىلى. توقىما ونەركاسىبىنىڭ نەگىزگى شيكىزاتى عانا ەمەس, مىڭداعان وتباسىلاردىڭ تۇرمىسىن تۇزەپ, اۋىلدىڭ الەۋەتىن كوتەرىپ وتىرعان بەرەكەلى ءونىم. وسى جولدا ماڭداي تەرىن توگىپ جۇرگەن ديقاندارىمىزدىڭ ەڭبەگى – ناعىز قۇرمەتكە لايىق. مەملەكەت باسشىسى بيىل قازاقستان حالقىنا جولداۋىندا اۋىل شارۋاشىلىعىن جاڭا دەڭگەيگە كوتەرۋدى مىندەتتەپ, سۋارمالى جەرلەردى ءتيىمدى پايدالانۋ جانە زاماناۋي تەحنولوگيالاردى ەنگىزۋدى تاپسىردى. شيكىزات وندىرۋدەن تەرەڭ قايتا وڭدەۋگە كوشۋ قاجەتتىلىگىن ەرەكشە اتاپ ءوتتى. ءبىز ماقتانى تەك شيكىزات كۇيىندە عانا ەمەس, دايىن ونىمگە اينالدىرىپ, ءوزىمىزدىڭ توقىما ونەركاسىبىمىزدى دامىتۋ باعىتىندا جۇمىس جاساۋدامىز. بۇگىن ماقتا-توقىما كلاستەرى بويىنشا العاشقى جوبانىڭ ناقتى جۇزەگە اسىرىلۋىنىڭ كۋاسى بولىپ وتىرمىز. اتالعان كلاستەردىڭ جالعاسى رەتىندە, «Turan» ارنايى ەكونوميكالىق ايماعىندا ماقتانى تەرەڭ وڭدەۋ جانە دايىن ءونىمدى ەكسپورتتاۋعا باعىتتالعان كوپسالالى نىساننىڭ قۇرىلىسى جۇرگىزىلۋدە. بولاشاقتا made in Turkestan تىگىن جىپتەرى مەن ماتالارى تانىمال برەندتەردە ساتىلاتىن بولادى. وسى وزىق تاجىريبە اياسىندا وڭىرىمىزدە ينۆەستيتسيا تارتۋ جۇمىستارى جالعاسىن تابادى. وبلىس اكىمدىگى تاراپىنان ءاربىر ينۆەستورعا قولداۋ كورسەتىلىپ, قولايلى جاعداي جاساۋعا ارقاشان دايىنبىز. ءبىزدىڭ باستى ماقساتىمىز – ەڭبەك ادامىنىڭ تۇرمىسىن جاقسارتىپ, اۋىل شارۋاشىلىعى سالاسىن جاڭا دەڭگەيگە كوتەرۋ. سىزدەردىڭ تاباندى ەڭبەكتەرىڭىزدىڭ ارقاسىندا تۇركىستان وبلىسى عانا ەمەس, بۇكىل قازاقستان «اق التىنمەن» تانىلىپ وتىر. وسى ءساتتى پايدالانا وتىرىپ, بارشاڭىزدى وزىق تەحنولوگيالاردى ەنگىزۋ ارقىلى, تابىستارىڭىز بەن وبلىسىمىزدىڭ ەكونوميكاسىنا قوساتىن ۇلەستەرىڭىزدى ارتتىرۋعا شاقىرامىن. وبلىسىمىزدىڭ ماقتا شارۋاشىلىعىن جاڭا بيىكتەرگە كوتەرىپ, ەلىمىزدىڭ اگرارلىق سالاسىن وركەندەتۋ باعىتىندا جۇمىلىپ ايانباي ەڭبەك ەتەيىك. مەرەكە قۇتتى بولسىن! – دەدى نۇرالحان ورالباي ۇلى.
سالتاناتتى شارادا بىرقاتار ەڭبەك ادامدارىنا قر مەملەكەتتىك ناگرادالارى, گراموتالار مەن العىس حاتتار تابىستالدى. ماراپاتتاۋ ءراسىمى ەسترادا جۇلدىزدارىنىڭ قاتىسۋىمەن كونتسەرتتىك باعدارلاماعا ۇلاستى.
تۇركىستان وبلىسىندا 5 ماقتا-توقىما كلاستەرىن قۇرۋ جۇمىستارى جۇرگىزىلۋدە. جوبالاردىڭ وڭدەۋ قۋاتتىلىعى جىلىنا 193 مىڭ توننانى قۇرايدى. ناتيجەسىندە, 7 مىڭنان استام جۇمىس ورنى اشىلادى.
ينۆەستيتسيالىق جوبانىڭ نەگىزىندە وتىرار اۋدانى مەن ارىس قالاسىندا 32 مىڭ گەكتارعا جاڭا تەحنولوگيامەن ماقتا داقىلى ەگىلدى. جوبانىڭ نەگىزگى ماقساتى سۋ ۇنەمدەۋ تەحنولوگياسىن ەنگىزۋ ناتيجەسىندە تۇتىنىلاتىن سۋ كولەمىن 50% پايىزعا ۇنەمدەۋ ارقىلى ونىمدىلىكتى 2-3 ەسەگە ارتتىرۋ. قازىرگى جاھاندىق سۋ تاپشىلىعى جاعدايىندا بۇل وتە ماڭىزدى ءارى دۇرىس شەشىم. جاڭا ءادىس قالىپتاسقان ءداستۇرلى ماقتا ەگۋ تەحنولوگياسىنان الدە قايدا ءتيىمدى. وسى كۇنگە دەيىن ءوڭىر ديقاندارى 1 گەكتار ماقتا القابىنان 25 تست ءونىم نەمەسە 625 مىڭ تەڭگە پايدا تاباتىن بولسا, جاڭا تەحنولوگيانى ەندىرۋ ارقىلى ءدال سول 1 گەكتار القابتان 60 تست-دەن استام نەمەسە 2-3 ەسە كوپ ءونىم مەن پايدا تابۋعا مۇمكىندىگى بار. بۇل مەملەكەت باسشىسىنىڭ وڭ ستراتەگياسىنىڭ ايقىن دالەلى.
مەملەكەت تاراپىنان سۋ ۇنەمدەۋ تەحنولوگيالارىن ەنگىزۋگە كەتكەن شىعىنداردىڭ 80 پايىزىنا دەيىن سۋبسيديالاۋ – شارۋالارعا جاڭا تەحنولوگيانى ەندىرۋ جولىنداعى قولداۋ ءارى ۇلكەن مۇمكىندىك. وسى جىلعا جوسپارلانعان 27 مىڭ گا ورنىنا 59 مىڭ گا جەرگە سۋ ۇنەمدەۋ تەحنولوگيالارى ەندىرىلىپ, جوسپار 2 ەسە ارتىعىمەن ورىندالدى. ناتيجەسىندە, 150 ملن. تەكشە مەتردەن استام اعىن سۋ كولەمى ۇنەمدەلدى.
«Turan» ارنايى ەكونوميكالىق ايماعىندا ماقتانى تەرەڭ وڭدەۋ جانە دايىن ءونىمدى ەكسپورتتاۋعا باعىتتالعان كوپسالالى نىساننىڭ قۇرىلىسى جۇرگىزىلۋدە. تولىق تسيكلدى توقىما فابريكاسىندا ءيىرۋ, ماتا ءوندىرۋ, بوياۋ, وڭدەۋ بويىنشا 8 فابريكانى ىسكە قوسۋ جوسپارلانسا, ونىڭ العاشقىسى ء(جىپ ءيىرۋ فابريكاسى) وسى جىلدىڭ قاراشا ايىندا جۇمىسىن باستايدى. جىلىنا 13 مىڭ توننا ءيىرىمجىپ, 50 ملن. مەتر ماتا, 7 ملن. جيىنتىق توسەك ورىن شىعارۋ كوزدەلۋدە.
ايتا كەتەيىك, بيىل وبلىس شارۋالارى 144,5 مىڭ گەكتارعا ماقتا ەگىپ, باپتاۋدا. ديحاندار جالپى 470 مىڭ توننا ءشيتتى ماقتا جينايدى دەپ كۇتىلۋدە. تۇركىستان وبلىسىندا 25 ماقتا زاۋىتى, 175 ماقتا قابىلداۋ بەكەتى قىزمەت ەتەدى.
