ەڭبەك جولىن 2007 جىلى ەكىباستۇزداعى مەكتەپتە باستاعان قۋانىش التىنجانوۆ 2011 جىلى سينگاپۋرداعى «Problem based learning» دەپ اتالاتىن كۋرسقا قاتىسقان. ءبىر جىلدان سوڭ اعىلشىن ءتىلىن شىڭداۋ ماقساتىندا سولتۇستىك يرلانديانىڭ بەلفاست قالاسىنداعى تىلدىك كۋرسقا بارعان. ال 2013 جىلى «بولاشاق» باعدارلاماسىمەن فينلياندياداعى HAMK ۋنيۆەرسيتەتىندە جوعارى سىنىپتاردا ماتەماتيكانى اعىلشىن تىلىندە وقىتۋ بويىنشا پەداگوگيكالىق تاعىلىمدامادان وتكەن. سول جاقتاعى مەكتەپتەردىڭ تاجىريبەسىن كورىپ, عىلىمي جوباسىن قورعاعان سوڭ ق.التىنجانوۆ 2021 جىلى ءوزىنىڭ تۋعان اۋىلىنداعى مەكتەپكە ورالىپ, «ماتەماتيكا مۇعالىمى» اتانادى.
– ءار بالا قاي جەردە تۋىپ-وسكەنىنە قاراماستان, ساپالى ءبىلىم الۋعا ءتيىس. مەنىڭ دە ماقساتىم سول, اۋىل وقۋشىلارىنا شەتەلدەن العان ءبىلىمىم مەن تاجىريبەمدى ءبولىسىپ, ولاردى باسەكەگە قابىلەتتى تۇلعا ەتىپ قالىپتاستىرعىم كەلەدى. جالپى, شاكىرت جەتىستىگى – مۇعالىم جەتىستىگى عوي. بىردە وقۋشىم حالىقارالىق سايىستان جۇلدەلى ورالىپ, ماعان ەرەكشە العىسىن ايتىپ, «مەن بولاشاقتا ماتەماتيكا مۇعالىمى بولامىن, وعان بۇگىن كوزىم جەتتى. مىقتىلاردىڭ قاتارىنان كورىنگەنىم – ءسىزدىڭ ەڭبەگىڭىز» دەگەن كەزدە ءبىر كۇلىپ, ءبىر جىلاعانىمىز بار ەدى. كەيىن سول وقۋشىم ۇلتتىق بىرىڭعاي تەستىلەۋدەن 50/50 بالل الىپ, ۋنيۆەرسيتەتىن دە ءساتتى اياقتادى. قازىر «بولاشاق» باعدارلاماسىمەن ماگيستراتۋراسىن جالعاستىرىپ جاتىر. مىنەكي, ءبىزدى قۋانتىپ, مارقايتاتىن – شاكىرتتەردىڭ وسىنداي جەتىستىگى عوي, – دەدى ول اعىنان جارىلىپ.
قۋانىش التىنجانوۆتىڭ سوزىنەن ونىڭ كاسىبي ۇستانىمدارى مەن ۇستازدىق جولعا دەگەن ادالدىعى ايقىن اڭعارىلادى. شەتەلدىك تاجىريبە مەن زاماناۋي ءبىلىم بەرۋ ادىستەرىن مەڭگەرگەن بىلىكتى ماماننىڭ ەڭبەگى اۋىل مەكتەپتەرىنىڭ دامۋىنا عانا ەمەس, ەلدىڭ جالپى ءبىلىم بەرۋ جۇيەسىنىڭ ىلگەرىلەۋىنە دە ۇلەس قوساتىنى انىق.
– وقۋشىمەن ءتىل تابىسىپ, ونى تۇسىنە ءبىلۋ – مۇعالىمنىڭ باستى مىندەتى. ساباق بارىسىندا ءبىر بالا: «اعاي, كەشە TikTok-تا ءبىر ۆيدەو كوردىم» دەسە, بىردەن «ونى نەگە كورەسىڭ, ول زيان» دەپ تىيىپ تاستاۋ دۇرىس ەمەس. كەرىسىنشە, قانداي بەينەجازبا ەكەنىن سۇراپ, قاجەت بولسا, دۇرىس باعىت-باعدار كورسەتكەن ءجون. سونداي-اق ۇلگەرىمى تومەن وقۋشىنى جاقسى وقيتىندارمەن بىرگە وتىرعىزۋعا تىرىسامىن. ويتكەنى بالانىڭ ىنتاسى دا, بىلىمگە دەگەن قىزىعۋشىلىعى دا كوپ جاعدايدا ءوز ورتاسىنا بايلانىستى قالىپتاسادى, – دەيدى ول.
ماتەماتيكا مۇعالىمىنىڭ ايتۋىنشا, اۋىل مەكتەپتەرىنىڭ ماسەلەسى دە جوق ەمەس.
– شەتەلدەن العان ءبىلىمىمدى قولدان كەلگەنشە وقۋ ۇدەرىسىندە ۇيىمداستىرىپ جاتىرمىن. الايدا ماتەريالدىق بازانىڭ تومەندىگىنەن كوپ يدەيالاردى ىسكە اسىرۋ مۇمكىن بولماي تۇر. كابينەتتەرىمىز جاڭا ۇلگىدەگى قۇرال جابدىقتارىمەن قامتاماسىز ەتىلسە, وندا وقۋشىلاردىڭ ءبىلىمى شىڭدالاتىنى انىق. ءالى كۇنگە دەيىن بور تاقتامەن جۇمىس ىستەيتىن مەكتەپتەر بار. شىنى كەرەك, 5 جىل بۇرىن الىنعان قۇرالداردىڭ ساپاسى سىن كوتەرمەيدى. سۇرانىس بەرسەك, كوپ جاعدايدا «بيۋدجەتتە قاراجات جوق» دەگەن جاۋاپقا تىرەلەمىز. جاساندى ينتەللەكت دامىعان زاماندا بۇل اۋىل بالالارىنىڭ بىلىمگە دەگەن قۇشتارلىعىن تۇنشىقتىرىپ وتىر دەسەك تە بولادى. الايدا مۇعالىمنەن سۇرانىس وتە جوعارى. مينيسترلىك اۋىل مەكتەپتەرىنىڭ ناقتى پروبلەمالارىن شەشەتىن ۋاقىت جەتتى. روتاتسيادان باستاپ, مۇعالىمدەردىڭ بىلىكتىلىگىن ارتتىرۋ ىسىنە ايرىقشا ءمان بەرىلۋى قاجەت, – دەيدى ق.التىنجانوۆ.
ءيا, اۋىل مەكتەبىنىڭ مۇمكىندىگى تولىق اشىلسا, ءبىلىمدى بالالاردىڭ كوپتەپ شىعاتىنى انىق. قاي وڭىردە قىزمەت ەتسە دە, ۇستازدىڭ باستى ماقساتى – شاكىرتكە ساپالى ءبىلىم بەرۋ. شەتەلدە جيناعان تاجىريبەسىن تۋعان اۋىلىنا ارناپ, جاس ۇرپاققا باعىت-باعدار بەرىپ وتىرعان ق.التىنجانوۆتىڭ ەڭبەگى– ەلگە قىزمەت ەتۋدىڭ, ۇرپاققا ۇلگى بولۋدىڭ جارقىن كورىنىسى دەپ بىلەمىز.
