ماقالامىزدىڭ كەيىپكەرى الماتى قالاسىنداعى №90 مامانداندىرىلعان مەكتەپتىڭ ديرەكتورى, «ى.التىنسارين» اتىنداعى جانە «ەرەن ەڭبەگى ءۇشىن» مەدالىنىڭ يەگەرى, 1-ساناتتى باسشى, شەبەر وقىتۋشى بۇلبۇل راسبەكقىزى بالاعا ءبىلىمنىڭ ءنارىن قۇيىپ, نۇرىن شاشاتىن, كۇش-جىگەر بەرىپ, ءوزىن دە, وزگەنى دە قاناتتاندىرا الاتىن ۇستاز ەڭبەگىن «تاۋ وزەنى» ادىستەمەلىك قۇرالىندا وسىلايشا دارىپتەيدى. بىلىكتى ماماننىڭ وسكەلەڭ ۇرپاققا سانالى تاربيە, ساپالى ءبىلىم بەرۋدەگى 30 جىلدان استام تاجىريبەسى وسى ەڭبەكتە ايقىن كورىنىس بەرگەن.
1992 جىلى جامبىل پەداگوگيكالىق ينستيتۋتىن ءبىتىرىپ, ەڭبەك جولىن نەمىس جانە اعىلشىن تىلدەرى وقىتۋشىسىنان باستاعان بۇلبۇل راسبەكقىزى ماماندارعا اسا قاجەتتىلىك تۋىنداعان جىلدارى اباي اتىنداعى الماتى مەملەكەتتىك ۋنيۆەرسيتەتىن «قازاق ءتىلى مەن ادەبيەتى ءپانىنىڭ وقىتۋشىسى» ماماندىعى بويىنشا ءتامامدايدى. قوسىمشا ءبىلىم بەرۋ ورتالىعى, ءبىلىم بولىمىندە ىستەگەن جىلداردا, سونداي-اق №98 مەكتەپتەگى وقىتۋشىلىق قىزمەتىندە جيناعان تاجىريبەسىمەن شىڭدالدى. كەيىننەن №120 مەكتەپتە ديرەكتوردىڭ وقۋ جانە تاربيە جونىندەگى ورىنباسارى بولىپ ىستەي ءجۇرىپ, قازاق ءتىلى مەن ادەبيەتىن وقىتۋدا تىڭ ىزدەنىستەرىمەن كوزگە ءتۇستى. وسى جىلداردا كاسىبي وسۋگە باستى ءمان بەرگەن بىلىكتى مامان ء«بىلىم بەرۋدەگى مەنەدجمەنت», «مەكتەپتى ءتيىمدى باسقارۋ», «بولاشاقتىڭ بولاشاعى مەكتەبى», «جەكە قارجى جانە بيۋدجەتتەۋ, ينكليۋزيۆتى ءبىلىم بەرۋ ۇدەرىسىن قالىپتاستىرۋ», «شەكسىز مازمۇن: جاڭا مەكتەپتى جوبالاۋ» باعىتىندا ءبىلىمىن جەتىلدىرەدى.
بۇلبۇل راسبەكقىزىنىڭ مەكتەپ جۇمىسىن دامىتۋداعى ەڭبەگى قالاداعى №15 گيمنازيانىڭ باسشىلىعى تۇسىندا جوعارى ناتيجەسىن بەردى. گيمنازيانىڭ باسقارۋ تاجىريبەسى عانا ەمەس, ساپالى ءبىلىم بەرۋدەگى ۇلگىسى قالا مەكتەپتەرىنە كەڭ تارالدى. ەلىمىزدىڭ كوپتەگەن تۇلەگى شەتەل ۋنيۆەرسيتەتتەرىنىڭ گرانتىنا يە بولدى. گيمنازيانى باسقارعان 14 جىلدان استام ۋاقىتتا مەكتەپتەگى مەنەدجمەنتتى دامىتىپ, ءبىلىم وشاعىن ۇزدىكتەر قاتارىنا قوستى. بىلگەنىن وزگەلەرگە ۇيرەتۋدەن جالىقپاعان بىلىكتى باسشى بۇگىنگى كۇنى دە جاس ماماندارعا تالىمگەر بولىپ, كەڭەسىن بەرۋدەن جالىققان ەمەس. №15 گيمنازيا ۇجىمى بىلتىر الماتى قالاسى اكىمىنىڭ 68 ملن تەڭگە گرانتىن جەڭىپ الدى. بۇل قاراجات مەكتەپتىڭ ينفراقۇرىلىمىن جەتىلدىرۋگە جۇمسالىپ, ءبىلىم ورداسىن جاڭا ءبىر بەلەستەرگە جەتەلەدى.
«ديرەكتور – پەداگوگيكالىق, عىلىمي-ادىستەمەلىك, ۇيىمداستىرۋ باسقارۋ مىندەتتەرىن شەشۋگە قاجەتتى جالپى تەوريالىق پاندەر نەگىزىن تەرەڭ مەڭگەرگەن بىلىكتى مامان بولۋعا ءتيىس. ءوز كاسىبىندە جاۋاپكەرشىلىك, تاباندىلىق, قايىرىمدىلىق نەگىزدەرىن باسشىلىققا الادى. كەز كەلگەن مەكتەپ ديرەكتورى بىلىكتى باسشى بولۋعا ۇمتىلۋى زاڭدىلىق. ويتكەنى مەكتەپ جەتىستىگى باسشىنىڭ ىسكەرلىگىنە بايلانىستى. ديرەكتور بىلىكتى ۇيىمداستىرۋشى عانا ەمەس, بۇگىنگى كۇن تالاپتارىنا بەيىم كاسىپ يەسى, مەنەدجەر ۇدەسىنەن شىعۋعا ءتيىس. مۇعالىمنىڭ مىندەتى وقۋشىعا ساپالى ءبىلىم بەرۋ عانا ەمەس, ونىڭ تۇلعا بولىپ قالىپتاسۋىنا ىقپال ەتۋ. وسى ورايدا ءاربىر مەكتەپتىڭ, بىلىكتى ۇستاز, زاماناۋي ديرەكتورلاردىڭ تاجىريبەسى جاس ماماندارعا ونەگە, ۇلگى بولسا دەيمىن. وسى ادىستەمەلىك قۇرالدى جازۋداعى ماقساتىم دا جاس ديرەكتور ارىپتەستەرىمە قولداۋ كورسەتۋ ەدى», دەيدى ول.
بيىلعى وقۋ جىلىندا №90 مەكتەپتىڭ باسشىلىعىنا تاعايىندالعان بۇلبۇل راسبەكقىزى ءبىلىم ساپاسىن ارتتىرۋ باعىتىندا باسەكەلەستىك ورتا قالىپتاستىرۋعا باسىمدىق بەرىپ وتىرعانىن ايتادى. قازىر اتالعان ءبىلىم وشاعىن بىلىكتى كادرلارمەن قامتاماسىز ەتىپ, قولايلى جاعداي جاساۋ باستى نازاردا تۇر. و.جاۋتىكوۆ اتىنداعى رمم, نزم مەكتەپتەرىنىڭ وقۋ باعدارىن زەرتتەپ, وزىق تاجىريبەسىنە نازار اۋدارىپ وتىرعان مەكتەپتە مۇعالىمنىڭ جۇكتەمەسىن ازايتۋ كوزدەلىپ وتىر. قازىرگى تاڭدا بالا تاربيەسىنە وتە كوپ كوڭىل ءبولۋ قاجەت بولىپ وتىرعان جاعدايدا «ادال ازامات – ءبىرتۇتاس تاربيە» باعدارلاماسى بويىنشا مەكتەپتە كوپتەگەن مازمۇندى ءىس-شارا ىسكە اسىپ جاتىر. بالاعا ساپالى ءبىلىم بەرۋمەن قاتار, قاۋىپسىزدىگى باستى نازاردا تۇر. وسى ورايدا تاربيە بارىسىمەن قاتار ءپان مۇعالىمدەرىنە تۇسەتىن سالماقتى ازايتۋ ماقساتىندا دا ءتيىمدى ادىستەر قولعا الىنا باستادى» دەپ اتاپ ءوتتى ديرەكتور. اڭگىمە بارىسىندا سالاداعى تۇيتكىلدى جايتتارمەن بولىسكەن بۇلبۇل راسبەكقىزى تاربيە مەن ءبىلىم بەرۋدە وتكەن عاسىردىڭ 90-جىلدارى جىبەرگەن ولقىلىقتىڭ سالدارىنا قىنجىلىسىن ءبىلدىردى. كوپتەگەن بىلىكتى كادر جۇمىستان كەتىپ, سالاعا مۇعالىمدىككە قاتىسى جوق ماماندار كەلدى. كەيىنگى جىلدارى وسى ولقىلىقتاردى جويۋ ماقساتىندا مەملەكەت تاراپىنان اۋقىمدى باعدارلامالار ىسكە اسا باستادى. «پەداگوگ مارتەبەسى تۋرالى» زاڭ قابىلداندى. مۇعالىمدەردىڭ ايلىعى كوتەرىلدى, قوعامدىق جۇمىستاردان بوساتىلدى. سونىمەن قاتار پەداگوگيكالىق ماماندىقتارعا شەكتى بالل كوتەرىلدى. وسىنداي يگىلىكتى ىستەر بارىسىنا توقتالىپ وتكەن بۇلبۇل راسبەكقىزى «جاقسى وقىپ, جۇرەك قالاۋىمەن مۇعالىمدىكتى تاڭداعان تۇلەكتەردىڭ مەكتەپكە كەلۋىمەن ءبىلىم ساپاسى ارتادى. قازىرگى كەزدە مەكتەبىمىزدە اسىرەسە, ورىس سىنىپتارىندا حيميا, بيولوگيا, ورىس ءتىلى, ينفورماتيكادان, باستاۋىش سىنىپ مۇعالىمدەرى جەتىسپەيدى. ەندىگى كەزەكتە مەكتەپتە قوردالانعان ماسەلەلەر بىرتە-بىرتە شەشىلەتىن بولادى», دەيدى ب.راسبەكقىزى.
الماتى
