پاۆلودار قالاسىنىڭ اكىمدىگى ءمالىم ەتكەندەي, قوعامدىق كولىكتىڭ مارشرۋتتىق جەلىسىن وڭتايلاندىرۋعا قاتىستى ءبىر ايعا سوزىلعان كەشەندى جۇمىس اياسىندا 11 مارشرۋتتى وڭتايلاندىرۋ, 2 ءتيىمسىز باعىتتى جويۋ جوسپارلانعان. قوزعالىس سىزبالارىن تۇزەتۋ كولىكتىك قولجەتىمدىلىكتى, ازاماتتاردىڭ وتىنىشتەرىن تالداۋ, سونداي-اق ناقتى جولاۋشىلار اعىنى مەن مارشرۋتتاردىڭ جۇكتەلۋ دەڭگەيىن باعالاۋ نەگىزىندە جۇزەگە اسىرىلعان. ناتيجەسىندە, جولاۋشىلار وتە از جۇرەتىن, قالالىق بيۋدجەتكە ەلەۋلى جۇكتەمە ءتۇسىرىپ كەلگەن (166 ملن تەڭگەدەن استام) №5, №6, №17 مارشرۋتتار جويىلدى. بۇل باعىتتاردا قوسىمشا وزگە اۆتوبۋستار مەن ترامۆاي مارشرۋتتارى بار.
بۇدان بىلاي قالا ماڭىنداعى №40, 41, 38, 66 مارشرۋتتار تەمىرجول ۆوكزالىنا دەيىن جۇرەتىن بولدى. شەشىم تەمىرجول ۆوكزالى اۋدانىنداعى دامىعان كولىك جۇيەسىن ەسكەرە وتىرىپ قابىلداندى. اۋماقتا جولاۋشىلار اعىنى 60 000 ترانزاكتسياعا وسكەن. №66, 40 مارشرۋتتار ۇزىندىعىنىڭ ايتارلىقتاي قىسقارۋىن ەسكەرە وتىرىپ, جولاۋشىلارعا ءبىر ساعات ىشىندە تەگىن اۋىسىپ ءمىنۋ تەتىگى ەنگىزىلدى. ءبىر ايدا 56 591 ادام تەگىن اۋىسىپ ءمىنۋ قىزمەتىن پايدالاندى.
سونداي-اق تەمىرجول ۆوكزالىنان ۋسولكا شاعىن اۋدانىنا دەيىن جۇرەتىن №66ا باعىتى ەنگىزىلدى. مارشرۋتتاعى ورتاشا جولاۋشىلار اعىنى قازىردىڭ وزىندە 2 مىڭ ترانزاكتسيادان اسادى. قىسقارتىلعان قوزعالىس سحەماسى مەن 14 مينۋتقا دەيىنگى ارالىق-تىڭ ارقاسىندا مارشرۋتتاعى جولاۋشىلار اعىنى ودان ءارى وسۋگە ءتيىس. وسىلايشا, ءتۇرلى باعىتتارداعى قولجەتىمدى رەيستەر سانى ۇلعايتىلىپ, ەكى باعىتتا مارشرۋتتىڭ ىڭعايلىلىعى مەن يكەمدىلىگى ارتقان.
اۆتوبۋس جەلىلەرىن قايتا قاراۋ, اۆتوبۋستار سانىن 262-دەن 252-گە دەيىن قىسقارتۋ ەسەبىنەن مارشرۋتتارعا قىزمەت كورسەتۋگە ارنالعان پايدالانۋ شىعىندارى ايتارلىقتاي تومەندەگەن. جولاۋشىلار اعىنىنىڭ 10%-عا ارتۋى تىركەلگەن (كۇنىنە
169 441-دەن 186 814 ترانزاكتسياعا دەيىن). اكىمدىك وكىلدەرى تاسىمالداۋشىلاردى سۋبسيديالاۋ كولەمىن قىسقارتۋ ەسەبىنەن بيۋدجەت قاراجاتى جىل سايىن 4 ملرد تەڭگەگە ۇنەمدەلەتىنىن جەتكىزدى.
پاۆلودار
