كاسىبي باعدار بەرۋ ماقساتىندا مەكتەپ-ينتەرناتتا وقۋشىلاردىڭ الەۋمەتتىك قولداۋى مەن ماماندىق تاڭداۋىنا, ءبىلىم الۋىنا جانە بولاشاقتا ءوز سالاسى بويىنشا تابىستى جۇمىس ىستەپ, ومىردە ءوز ورنىن تابۋىنا جاردەمدەسۋ باعىتىندا جۇيەلى جۇمىستار اتقارىلىپ وتىر. بۇگىنگى كۇنى مەكتەپتە 180 بالا تاربيەلەنەدى.
پەداگوگ ماماندار ءۇشىن مەكتەپ وقۋشىلارىنىڭ جەتىستىكتەرى, ۇلگەرىم ناتيجەسى باستى نازاردا تۇر. وسى ورايدا مەكتەپ-ينتەرناتتىڭ تۇلەكتەرى دانيار سەرىكبايدىڭ س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنە, رومان ستەپانەتس قازيتۋ-عا وقۋعا ءتۇسۋىن ماقتانىشپەن جەتكىزگەن ديرەكتور باقىتگۇل ەرمەكوۆا بالالاردىڭ دامۋىنا, تۇلعالىق قالىپتاسۋىنا قولايلى جاعدايلار جاسالعانىن جەتكىزدى.
– مەكتەپ-ينتەرناتقا قابىلداۋ پسيحولوگيالىق-مەديتسينالىق-پەداگوگيكالىق كەڭەستىڭ شەشىمىمەن جۇرگىزىلەدى. ءبىرىنشى سىنىپقا قابىلدانعاننان كەيىن بالالار نەگىزگى ورتا ءبىلىم الىپ شىعادى. مەكتەبىمىزدە مەملەكەتتىك ءبىلىم بەرۋ ستاندارتىنان تىس پسيحولوگيالىق-فيزيولوگيالىق ەرەكشەلىكتەرىنە سايكەس ارنايى وقۋ باعدارلاماسىن قولدانۋ تاجىريبەسى جەمىسىن بەرىپ وتىر. ول پەداگوگيكالىق ۇجىمنىڭ ساباقتى قىزىقتى وتكىزۋگە, بالالارعا شابىت سىيلاۋعا بارىنشا تىرىسۋىنىڭ ناتيجەسى دەر ەدىم. ويتكەنى پەداگوگ-پسيحولوگ, لوگوپەد, ياعني ءتىل, دەنە قيمىلى بۇزىلىستارىن تانيتىن ماماندار بالا مەكتەپكە كەلگەن العاشقى كۇننەن باستاپ تۇلعالىق پسيحولوگيالىق-فيزيكالىق ەرەكشەلىكتەرىن زەرتتەۋ بويىنشا جۇمىستار جۇرگىزە باستايدى. ەڭ باستىسى – بالانىڭ دەنساۋلىعىن ساقتاۋ, بويىنداعى بۇزىلىستىڭ كۇردەلىلىگىنە قاراماستان وقۋعا, تاربيەگە باۋلۋ. قازىرگى كەزدە زاماناۋي مۇمكىندىكتەردى قولدانا وتىرىپ, ءبىلىم قۇرالدارى, ەڭبەك دايىندىعى ارقىلى دامۋىنداعى كەدەرگىلەردى تۇزەۋ, قوعاممەن ىقپالداسۋى ءۇشىن الەۋمەتتىك-پسيحولوگيالىق وڭالتۋ, اقىل-ەس جانە فيزيكالىق دامۋى, كوڭىل-كۇي ەركىندىگىندەگى جەتىسپەۋشىلىكتەردى تۇزەتۋ, جەكە وقۋ ءۇردىسى ارقىلى ءبىلىم بەرۋگە ىنتالاندىرۋ, ءاداپتيۆتى مۇمكىندىكتەرىن ارتتىراتىن قۇندىلىقتارىن قالىپتاستىرۋ بويىنشا جۇمىس ىستەلىپ جاتىر, – دەدى ديرەكتور.
مەكتەپ لوگوپەد, پسيحولوگ مامانداردىڭ جۇمىس تيىمدىلىگىن ارتتىرۋ ماقساتىندا مۋلتيمەديالىق قۇرىلعىلاردى قولدانادى. ال كوررەكتسيالىق جۇمىستار بارىسىندا وقۋشىلارعا پسيحولوگيالىق قولداۋ كورسەتىلەدى. لوگوپەدتىك جۇمىستار وقۋشىنىڭ جازۋ, وقۋ بارىسىندا تۋىندايتىن قيىندىقتاردان ارىلۋىنا ىقپال ەتەدى دەسەك, مەكتەپتە بالالاردىڭ ءبىلىم الۋمەن قاتار شىعارماشىلىق داعدىلارعا دا ماشىقتانۋىنا قولايلى مۇمكىندىك جاسالعان. ءبىلىم بەرۋ بارىسىندا قولدانىلىپ جاتقان جاڭا تەحنولوگيالار بالالاردىڭ جان-جاقتى دامۋىنا باعىتتالىپ, وقۋ كابينەتتەرىندەگى ينتەراكتيۆتى تاقتالار قىزىقتى اقپاراتتاردى كەڭىنەن قولدانۋعا مۇمكىندىك بەرەدى.
مەكتەپ ديرەكتورىنىڭ ايتۋىنشا, نەگىزگى سالماق پەداگوگ ماماندارعا ءتۇسىپ وتىر. دەگەنمەن پەداگوگيكالىق قۇرام ءوز بىلىكتىلىك ۇدەسىنەن شىعا وتىرىپ, وقۋ ماتەريالدارىن بالالارعا بارىنشا تۇسىنىكتى, تارتىمدى ەتۋگە تىرىسادى.
زەرتتەۋشى-پەداگوگتەر عازيزا سارگەلوۆا, ليليا ارسانكۋلوۆا, نۇرزيپا بەكباسوۆا بالا وقىتۋمەن قاتار وقۋ-ادىستەمەلىك ماتەريالداردى, تيپتىك وقۋ باعدارلامالارىن ازىرلەۋ مەن اينالىسىپ كەلەدى. مەكتەپ ديرەكتورى باقىتگۇل ەرمەكوۆا اتاپ وتكەندەي, ۇستازدار ەڭبەگىنىڭ ناتيجەسىندە ءبىلىم بەرۋ ءۇردىسى بارىنشا جەتىلدىرىلگەن. مەكتەپ مۇعالىمدەرىنىڭ شەتەلدەردەن جيناعان تاجىريبەسى مەكتەپ ومىرىندە عانا ەمەس, بالالاردىڭ قوعاممەن ىقپالداسۋىندا, پسيحيكالىق-فيزيولوگيالىق باعدارلامالاردى پايدالانۋدا ءتيىمدى قولدانىلىپ كەلەدى. وسى ماقساتتا ديرەكتوردىڭ وقۋ ءىسى جونىندەگى ورىنباسارى گۋليا دارىباەۆا مەن پەداگوگ-پسيحولوگ ۆالەنتينا تيۋرينا حورۆاتيا جانە نيدەرلاند ەلىنە, ال مەكتەپ ديرەكتورى جاپونيا, سينگاپۋر, مالايزياعا ساپارىن اتاپ وتۋگە بولادى.
مەكتەپ-ينتەرناتتا شەبەر پەداگوگ, ەمدەۋ فيزيكالىق باعىت بويىنشا تيپتىك وقۋ باعدارلاماسىنىڭ ازىرلەۋشىسى ناتاليا كەفەردىڭ پەداگوگيكالىق, زەرتتەۋشىلىك قىزمەتى ناتيجەلى ىسكە اسىپ وتىر. بىلىكتى مامان سپورت جانە تۋريزم اكادەمياسىندا ساباق بەرە ءجۇرىپ, كوپتەگەن جىلعى تاجىريبەسىمەن ءبولىسۋدى پەداگوگتىك قىزمەتىنىڭ اجىراماس بولشەگىنە اينالدىرعان. قازىرگى كەزدە دەنە شىنىقتىرۋ سالاسىنىڭ ماماندارىن دايارلاۋمەن دە اينالىسىپ جۇرگەن مامان بالالارمەن جۇمىستا وتە جوعارى شەبەرلىك قاجەت ەكەنىن ايتادى. ال رەسپۋبليكا كولەمىندە جۇزەگە اسىپ جاتقان ء«بىرتۇتاس تاربيە – ادال ازامات» باعدارلاماسى ديرەكتوردىڭ تاربيە ءىسى جونىندەگى ورىنباسارى جانار قۇتتىقاداموۆانىڭ جەتەكشىلىگىمەن ىسكە اسىپ كەلەدى. بۇل باعىتتا مەكتەپىشىلىك شارالار بالالاردىڭ بىرلەسىپ جۇمىس ىستەۋىنە باعىتتالعان.
مەكتەپ ماماندارىنىڭ بيىلعى وقۋ جىلىنداعى كاسىبي جەتىستىكتەرىنە كەلەتىن بولساق, پەداگوگ-زەرتتەۋشى الما مىلتىقباەۆا الماتى قالاسى اكىمىنىڭ «ەڭبەك ادامى – 2025» العىسحاتىنىڭ يەگەرى اتانسا, پەداگوگ-زەرتتەۋشى, لوگوپەدى ءۇمىت ەسەمباەۆا «ارنايى پەداگوگيكا» XVII رەسپۋبليكالىق وليمپياداسى قازىلار القاسىنىڭ قۇرامىنا كىردى. ال سوڭعى ەكى جىلدا مەكتەپتىڭ 23 پەداگوگى «Perkins» حالىقارالىق مەكتەبىندە ءبىلىمىن جەتىلدىرگەن. ونداعى ماقسات – كوپتەگەن بۇزىلىستارى بار بالالارعا ءبىلىم بەرۋدە الدىڭعى قاتارلى پەداگوگيكالىق تەحنولوگيالاردى ەنگىزۋ. قازىرگى كەزدە «Perkins» تاجىريبەسى نەگىزىندە مەكتەپتە رەسۋرستى كابينەت جۇمىس ىستەيدى.
الماتى
