قازىر مۇنايلى ءوڭىر ينۆەستيتسيا تارتۋ بويىنشا جەتەكشى وبلىستاردىڭ قاتارىندا تۇر. بيىل وبلىس دەلەگاتسياسى رەسەي, قىتاي, پاكىستان, گەرمانيا, اقش, ۇلىبريتانيا, يزرايل, قاتار, يسپانيا, يتاليا, اۋستراليا, ليتۆا, وزبەكستان ەلدەرىنىڭ باسشىلارىمەن, ءىرى بيزنەس وكىلدەرىمەن كەلىسسوزدەر جۇرگىزدى. ناتيجەسىندە, 20-دان استام ىنتىماقتاستىق ورناتۋ جونىندەگى قۇجاتتارعا قول قويىلدى. ونىڭ ىشىندە يندۋستريالىق پارك قۇرۋ, جەل جانە گاز ەلەكتر ستانسالارىن سالۋ, جاسىل ەنەرگەتيكا جوبالارى بار.
«وسى كەزگە دەيىن مۇناي ونىمدەرىن شيكىزات كۇيىندە عانا ەكسپورتتاۋمەن اينالىستىق. اسىرەسە ءونىم وڭدەۋ, ءوندىرۋ ونەركاسىبى شەت قالدى. قازىر وڭىردە 599 كاسىپورىن جۇمىس ىستەيدى. ونىڭ 4-ەۋى – ءىرى, 13-ءى – ورتا, 582-ءسى شاعىن كاسىپورىندار. ءوڭىر ەكونوميكاسىن ءارتاراپتاندىرۋ اياسىندا ءىرى جوبالار قولعا الىنىپ وتىر. بىلتىر جىلىنا 6 مىڭ جۇك ۆاگونىن شىعارۋ جوباسى ىسكە قوسىلدى. وڭىردە جالپى قۇنى 44 ملرد تەڭگە قۇرايتىن 11 جوبانى جۇزەگە اسىرۋ قولعا الىندى. ونىڭ 2-ەۋى جۇمىسىن باستادى. بۇعان قوسا, قۇنى 6,5 ترلن تەڭگەگە باعالانعان 5 ءىرى مۇناي-گاز حيميا جوباسى جۇزەگە اسىرىلىپ جاتىر. بۇل جوبالار قۇرىلىس كەزىندە 18 مىڭ جۇمىس ورنىن, ىسكە قوسىلعاندا 3 مىڭ تۇراقتى ورىندى قامتاماسىز ەتەدى», دەيدى س.شاپكەنوۆ.
كومىرسۋتەكتى شيكىزاتى مول وڭىردە «ۇلتتىق يندۋستريالدىق مۇناي-حيميا تەحنوپاركى» ارنايى ەكونوميكالىق ايماعىندا 18 قاتىسۋشى تىركەلگەن. مۇندا ينۆەستورلارعا سالىقتىق, كەدەندىك جەڭىلدىكتەر ۇسىنىلادى. اتالعان ايماقتا جىلىنا 500 مىڭ توننا ءونىم شىعاراتىن پوليپروپيلەن كەشەنى سالىندى. الداعى جىلدارى پوليەتيلەن, بۋتاديەن ءوندىرىسىن ىسكە قوسۋ جوسپارلانىپ وتىر.
اكىمنىڭ مالىمەتىنە سۇيەنسەك, 2025–2029 جىلدارى قۇنى شامامەن 7 ترلن تەڭگەنى قۇرايتىن 46 ينۆەستيتسيالىق جوبا جۇزەگە اسىرىلادى. جوبالار وڭىرگە 6 مىڭعا جۋىق جاڭا جۇمىس ورنىن اشۋعا مۇمكىندىك بەرەدى. سالانى تسيفرلاندىرۋ ماقساتىندا اتىراۋ وبلىسىنىڭ ينۆەستيتسيالىق كارتاسى ازىرلەندى. بۇل گەوپورتال ينۆەستورلارعا ءوڭىر مۇمكىندىگىمەن تانىسۋعا, جاڭا جوبالارعا قاتىسۋعا, ءوز باستامالارىن ۇسىنۋعا جاعداي جاسايدى.
«ۇستاناتىن باستى ماقساتىمىزدىڭ ءبىرى – ازىق-ت ۇلىك قاۋىپسىزدىگىن قامتاماسىز ەتۋ ماقساتىندا يگەرىلمەي جاتقان اۋىل شارۋاشىلىعى جەرلەرىن قايتارۋ, ءتيىمدى پايدالانۋ. 2022–2025 جىلدارى ارالىعىندا جالپى كولەمى 564,3 مىڭ گەكتار جەر مەملەكەت مەنشىگىنە قايتارىلدى. ونىڭ 283,5 مىڭ گەكتارى عانا قايتا اينالىمعا ەنگىزىلىپ, جاڭا جەر پايدالانۋشىلارعا تابىستالدى. بىراق ءالى دە بۇل جۇمىستى جۇيەلەپ, كۇشەيتۋ قاجەتتىگى تۋىنداپ وتىر», دەيدى وبلىس اكىمى.
سەرىك شاپكەنوۆتىڭ مالىمەتىنە قاراعاندا, بيىل 2 ءىرى جوبا ىسكە قوسىلدى. ءبىرىنشىسى – «Dossor Processing Company» كومپانياسىنىڭ قۋاتتىلىعى جىلىنا 48 مىڭ توننا قۇراماجەم وندىرەتىن زاۋىتى. بۇل وندىرىسكە 602 ملن تەڭگە ينۆەستيتسيا سالىنعان. ال ەكىنشى جوبانى «قۋانىش» شارۋا قوجالىعى ىسكە اسىردى. جىلىنا 300 باس مال بورداقىلاۋ الاڭىنىڭ قۇنى – 300 ملن تەڭگە. ەندى 2027 جىلعا دەيىن 48,3 ملرد تەڭگەگە 12 ينۆەستيتسيالىق جوبا ىسكە قوسىلىپ, 458 جاڭا جۇمىس ورنىن اشۋ جوسپارلانىپ وتىر.
«ماڭىزدى جوبالار قاتارىندا «Goldbridge» كومپانياسىمەن قانت زاۋىتىنىڭ قۇرىلىسى بار. «KazGrow Irrigation Systems» كومپانياسى 5,6 گەكتارعا زاۋىت پەن ونەركاسىپتىك جىلىجاي سالادى. بەكىرە بالىعىن وڭدەيتىن 2 زاۋىتتا جىلىنا 700 توننا ءونىم شىعارىلادى. «داۋلەت قۇس» كۇنىنە 250 مىڭ جۇمىرتقا شىعاراتىن فابريكانى جاڭعىرتۋعا 1 ملرد تەڭگە ينۆەستيتسيا سالعالى وتىر. قۇرمانعازى اۋدانى مەن اتىراۋ قالاسىنداعى كوتەرمە ورتالىق بازاسىندا اگروحاب جوبالارى بار», دەپ مالىمدەدى س.شاپكەنوۆ.
اتىراۋ وبلىسى
