كۇنى كەشە عانا مەملەكەت باسشىسىنىڭ قولىنان «قازاقستاننىڭ ەڭبەك سىڭىرگەن ۇستازى» اتاعىن العان مۇقاڭ قاي كەزدە دە قاراپايىمدىلىعىنان تانعان ەمەس. دارىندى بالالارعا ارنالعان مامانداندىرىلعان «دارىن» ينتەرناتىندا پەداگوگ-شەبەر رەتىندە ەڭبەك ەتىپ كەلە جاتقان ۇستاز ءبىرىنشى كەزەكتە وقۋشىلارىنا ءوز بالاسىنداي قارايدى. جۇزىنەن مەيىرىم شۋاعى سەبەزگىلەپ تۇراتىن مۇعالىمگە دەگەن شاكىرتتەرىنىڭ دە ىقىلاس-ءىلتيپاتى زور.
ء«اربىر ۇستاز ءبىرىنشى كەزەكتە ءبىلىم الۋشىلاردىڭ پسيحولوگياسىن مىقتاپ مەڭگەرگەنى ءجون. ۇستاز وقۋشىلارىمەن مىقتاپ ءتىل تابىسا السا, ەكى تاراپ تا جەتىستىككە جەتەدى. بۇل – دالەلدەۋدى قاجەت ەتپەيتىن اكسيوما. مەن قانداي دا ءبىر تابىسقا قول جەتكىزسەم, ونىڭ ءبارى ءبىلىم سالاسىنا ايرىقشا كوڭىل ءبولىپ وتىرعان سالالىق مينيسترلىكتىڭ, وبلىس اكىمدىگى ءبىلىم باسقارماسىنىڭ, ءوزىمنىڭ ۇجىمىمنىڭ باسشىلىعى مەن وقۋشىلارىمنىڭ ارقاسى دەپ بىلەمىن.
پرەزيدەنت قولىنان ماراپات الۋدىڭ ءجونى ءتىپتى بولەك ەكەن. ەرەكشە سەزىم مەن اسەردى باستان وتكەردىم. 25 جىل بويى اتقارعان ەڭبەگىم وسىلايشا اقتالدى. بۇل ماراپات – قوسىمشا جاۋاپكەرشىلىك جۇگىن ارتىپ وتىر. راسىندا دا بۇيىرعان اتاقتىڭ سالماعى اۋىر. ەندى سوعان سايكەس تەرەڭ ىزدەنىس ىزىنە ءتۇسىپ, ناتيجەلى جۇمىس كورسەتۋگە كۇش سالامىن.
سۋ جاڭا وقۋ-اعارتۋ ءمينيسترى جۇلدىز دوسبەرگەنقىزى, ۆيتسە-مينيستر مايرا تۇرعانبايقىزى, ورتا ءبىلىم بەرۋ كوميتەتىنىڭ توراعاسى قانىبەك بەكبولات ۇلى باستاعان ازاماتتاردىڭ بارىمەن جۇزدەسىپ, سۇحباتتاسۋدىڭ ءساتى ءتۇستى. ول كىسىلەر دە قولداۋ ءبىلدىردى. سوندىقتان بارىنە العىسىم شەكسىز», دەيدى ول.
شيرەك عاسىر بويى تىنىمسىز ەڭبەك ەتىپ كەلە جاتقان ۇستازدىڭ قول جەتكىزگەن جەتىستىكتەرى جەتكىلىكتى. باسقاسىن بىلاي قويعاندا, مۇقاڭ جازعان «ماتەماتيكالىق ساۋاتتىلىق», «ماتەماتيكالىق ساۋاتتىلىق بويىنشا ەسەپتەر جيناعى» سەكىلدى وزگە دە بىرنەشە وقۋ-ادىستەمەلىك قۇرالدارى سالا بىلگىرلەرى تاراپىنان لايىقتى دەڭگەيدە ءوز باعاسىن العان. جىلدار بويى «تۇلعانىڭ شىعارماشىلىق قابىلەتتەرىن دامىتۋدا مەتاتانىمدى ماقسات ەتكەن ءتيىمدى وقىتۋ جولدارى» تاقىرىبىندا ىزدەنىپ جۇرگەن ۇستاز بۇل باعىتتاعى جۇمىسىن ءارى قاراي جالعاستىرۋعا بەكىنىپ وتىر. ءوزى دە, شاكىرتتەرى دە رەسپۋبليكالىق, حالىقارالىق وليمپيادالار مەن عىلىمي جوبالار بايقاۋلارىندا تالاي رەت توپ جارعان.
«اقيقاتىندا, «باسقالاردى ۇيرەتە وتىرىپ, ءوزىمىز دە ۇيرەنەمىز» دەگەن ءسوزدى سەنەكا تەككە ايتپاعان. وقۋ ۇدەرىسى كەزىندە مۇنى ءوزىم دە ايقىن سەزىندىم. ءاربىر ءبىلىم الۋشىمەن جەكەلەي جۇمىس ىستەگەن ۇستازدىڭ ءىسى العا باساتىنى داۋسىز. شيرەك عاسىرلىق ءىس-تاجىريبەمدە وسىعان انىق كوز جەتكىزدىم.
تۋراسىن ايتساق, ناشار وقۋشى بولمايدى. تەك الدىڭا كەلگەن بالانىڭ ماتەماتيكاعا دەگەن قىزىعۋشىلىعىن وياتا ءبىلۋ كەرەك. مۇعالىم جاڭاشىلدىققا ۇمتىلماسا, وقۋ ۇدەرىسى كەزىندە ءبىلىم الۋشىنىڭ عىلىمعا دەگەن ماحابباتىن ۇستەمەلەي الماسا, ءبارى بەكەر. جىلدار وتكەن سايىن تاجىريبەمىز تولىسا ءتۇستى. بۇل – سول جىلدارمەن جيناقتالعان تاجىريبەنىڭ ارقاسىندا تۇيگەن ويىم.
جۇمىستى جۇيەلى ىستەۋ ءۇشىن جايلى اتموسفەرا كەرەك. مۇندايدا ۇجىمنىڭ قولداۋىن كۇتەتىنىڭ انىق. سول تۇرعىدان كەلگەندە ءوزىم جۇمىس ىستەيتىن ۇجىمنىڭ باسشىلىعى قاي كەزدە دە قولداۋدان كەندە قالدىرعان ەمەس. ول كىسىلەردىڭ قولپاشتاۋى ماعان قانات بىتىرەدى. وسىنداي ۇجىمدا ەڭبەك ەتىپ جۇرگەنىم دە ءبىر باقىت شىعار», دەيدى ۇستاز.
جانارىنان مەيىرىم نۇرى سەبەزگىلەپ تۇراتىن مۇقاڭنىڭ العا قويعان ماقساتى از ەمەس. ول كوپ ارىپتەسى سەكىلدى جۇمىسقا جۇمىس دەپ قارامايدى, عىلىم دەپ تۇسىنەدى.
جامبىل وبلىسى
