اۋەلى تارازداعى شەراعا ەسكەرتكىشىنە گۇل شوقتارىن قويعان قالامگەرلەر مىڭبۇلاققا اسىقتى. تالاپتىداعى شەراعاڭنىڭ شاڭىراعىنا جەتكەن سوڭ ءارىسى استانا, بەرىسى الماتىدان كەلگەن قالامگەرلەر قايراتكەر-جازۋشى تۋرالى ەستەلىكتەرىن ايتىپ, ەمەن-جارقىن اڭگىمەنىڭ تيەگىن اعىتتى. شەرحان مۇرتازانىڭ مەموريالدىق ۇيىندەگى جازۋشىنىڭ مۇرالارىمەن, تاريحي سۋرەتتەرىمەن تانىستى.
«شەراعانىڭ شەكپەنىنەن شىققان» قالامگەرلەر شوعىرى قازىرگى كەزدە ۇلت رۋحانياتىنىڭ ءبىر-ءبىر بەتكەۇستارىنا اينالعانى ءمالىم. ولار قازاق كوركەمسوزىنىڭ ابىرويىن كوتەرىپ, ادەبيەتتىڭ دامۋىنا ءالى دە ءوز ۇلەستەرىن قوسىپ ءجۇر. سوندىقتان جيىندا شەراعا مەن ول كىسىنىڭ «شەكپەنىنەن شىققان» ادەبيەت وكىلدەرىنىڭ رۋحاني مۇرالارىن دارىپتەۋ, ۇستاز بەن شاكىرت اراسىنداعى تاعىلىمدى بايلانىستى كەيىنگى بۋىنعا ناسيحاتتاۋ ءىس-شارانى ۇيىمداستىرعان رۋحانيات جانە تاريحتانۋ ورتالىعىنىڭ نەگىزگى مىندەتىنە اينالعانداي كورىندى.
ادەبي كەشتى قالامگەر كوسەمالى ءساتتىباي ۇلى جۇرگىزدى. وبلىس اكىمدىگىنىڭ مادەنيەت جانە تىلدەردى دامىتۋ باسقارماسىنىڭ باسشىسى ەرلان ءجۇنىسباي وبلىس اكىمى ەربول قاراشوكەەۆتىڭ قۇتتىقتاۋ حاتىن وقىپ بەردى.
ء«ىس-شارانى ءبىز كوپتەن بەرى جوسپارلاپ, وسى جىلى شەراعانىڭ تۋعان كۇنىنە وراي وتكىزۋدى ءجون كوردىك. الداعى ۋاقىتتا دا بۇل باستامانى داستۇرگە اينالدىرىپ, ۇلى جازۋشىنىڭ تۋعان كۇنىندە مىڭبۇلاقتىڭ تورىندە جىل سايىن وتكىزۋگە نيەتتىمىز» دەلىنگەن قۇتتىقتاۋ حاتتا. سونداي-اق «اۋليەاتا – كىتاپ وقيتىن ءوڭىر» جوباسى اياسىندا «شەراعا شەكپەنىنەن شىققان» قالامگەرلەردىڭ ۇستازدارى تۋرالى تاعىلىمى مول ەستەلىكتەرىن جيناقتاپ, جەكە كىتاپ ەتىپ شىعارعانى جازىلعان.
تالاپتىعا ات باسىن بۇرعان قالامگەرلەرگە قۇرمەت كورسەتىلدى. «شەراعانىڭ شەكپەنىنەن شىققاندار» اتتى ەستەلىك كىتاپ تابىستالدى.
كەش بارىسىندا جازۋشىلىق پەن جۋرناليستيكانى قوس قاناتىنداي سەرىك ەتكەن شاكىرتتەرى – مەملەكەتتىك سىيلىقتىڭ لاۋرەاتى, جازۋشى كادىربەك سەگىزباەۆ, قالامگەرلەر جانات ەلشىبەك, ءامىرحان مەڭدەكە, نۇرعالي وراز, ماعيرا قوجاحمەتوۆا, قايىربەك اسانوۆ, تالعات ايتباي ۇلى, «جالىن» جۋرنالىنىڭ باس رەداكتورى قۇديار ءبىلال, قازاقستاننىڭ ەڭبەك سىڭىرگەن قايراتكەرى, پۋبليتسيست قاينار ولجاي, گۇلزەينەپ سادىرقىزى باستاعان ازاماتتار ەستەلىكتەرىمەن ءبولىسىپ, ورتالىققا جەكە جيناقتارىن تابىستادى.
شەراعا شاڭىراعىنداعى كەشكە كەلگەن شاكىرتتەرى قالامگەر تۋعان اۋىلعا شەرحان مۇرتازا ەسىمىن بەرۋ تۋرالى ۇسىنىس ايتتى. وزگە دە ۇتىمدى يدەيالار اڭگىمەگە ارقاۋ بولدى.
«پۋشكين دۇنيەدەن وزعاندا گوگول قايعىرىپ تۇرىپ: «پۋشكين ءولدى, رەسەي جەتىم قالدى», دەگەن ەدى. ءبىز دە شەراعاڭ باقيلىق بولعاندا جەتىمسىرەپ قالدىق. الداعى ۋاقىتتا ونىڭ مۇراسىن ناسيحاتتاۋ – پارىزىمىز», دەيدى حالىقارالىق «الاش» سىيلىعىنىڭ لاۋرەاتى ءامىرحان مەڭدەكە.
جامبىل وبلىسى,
جۋالى اۋدانى,
تالاپتى اۋىلى
