وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ءبولىم باسشىسى ازات قاپانوۆتىڭ دەرەگىنە قاراعاندا, كوكونىس ونىمدەرىن جيناۋ ءالى جالعاسىپ جاتىر.
«وسى كەزگە دەيىن ەگىستىك القاپتان كوكونىس ونىمدەرىنىڭ 70 پايىزى جينالدى. شارۋالار القاپتان 120 مىڭ توننا ءونىم الدى. بۇل جۇمىس قازان, قاراشا ايلارىندا تولىق اياقتالادى. جەرگىلىكتى شارۋالار كوكونىس ونىمدەرىمەن الدىمەن وبلىس تۇرعىندارىن تولىقتاي قامتاماسىز ەتەدى. كەيىن باسقا وڭىرلەرگە جەتكىزەدى», دەيدى ازات قاپانوۆ.
ونىڭ دەرەگىنە قاراعاندا, تۇراقتاندىرۋ قورىندا 2025-2026 جىلدارى ساقتالاتىن كوكونىس ونىمدەرىنىڭ كولەمىن 50 مىڭ تونناعا جەتكىزۋ كوزدەلگەن. قازىر الەۋمەتتىك ماڭىزى بار تاۋارلار تىزىمىنە كىرەتىن ونىمدەردىڭ باعاسىن رەتتەۋ ماقساتىندا ماۋسىمارالىق كەزەڭگە كەلىسىم شارت جاساقتالعان.
