بىزگە بەلگىلى كوكپاردىڭ كوپتەگەن ءتۇرى بار. اتاپ ايتقاندا: جاپپاي تارتۋ, ۇتىسىپ تارتۋ, دودا كوكپار, اينالما كوكپار, مارە كوكپار, تاقىم تارتىس ت.ب. سونداي-اق كوكپاردىڭ اتالعان تۇرلەرىنە قاتىستى جەكە-جەكە ەرەجەلەرى بولعان نەمەسە كوكپارشىلار ويىن ۇستىندە جاعدايعا قاراي كەلىسىپ الاتىن دا ءۇردىس بار. بىراق بۇل بىرتەكتى ەمەس ءۇردىس ءار ولكەدە ارقيلى تۇرلەرى كەزدەسە بەرەدى.
مىسالى, جاپپاي تارتۋدى الاتىن بولساق, بۇل ويىن تۇرىندە كارى-جاس, ۇلكەن-كىشى دەيتىن شەكتەۋ جوق. بارلىق ادام قاتىساتىن بولعاندىقتان جوعارىداعىداي اتاۋعا يە. كوكپارشىلاردىڭ تاقىم كۇشىن, ەپتىلىگىن, قول قايراتىن تالاپ ەتەتىن بۇل كوكپاردىڭ ەرەكشەلىگى بارلىق وڭىرگە ءتان ەكەندىگىندە.
ۇتىسىپ تارتۋ. ويىنشىلار ەكى توپقا بولىنەدى. ەكى جاقتان ءبىر-ءبىر ادام شىعىپ كوكپاردى تارتادى. كوكپاردان ايىرىلعان نەمەسە ۇتىلعان ادام ويىننان شىعادى. كەي جاعدايدا وزىنە سەنگەن كوكپارشى قارسىلاستارىن جەكە-جەكە سايىسقا شاقىرىپ, ءبىر ءوزى ءبارىن جەڭىپ ويىننان شىعارىپ تاستايتىن كەزدەرى بولعان. ناتيجەسىندە, قارىمى مىقتى, كۇشىنە اتى ساي جىگىت ىرىكتەلىپ جەڭىسكە جەتەدى.
اينالما كوكپار. بۇنى كەي وڭىرلەردە «شاۋىپ تارتۋ» دەپ تە اتايدى. ويىنشىلار كوكپاردى ناقتى مەجەلەنگەن جەرگە (اۋىلعا, جەكە ۇيگە, نىسانالى ورىنعا, ت.ب.) جەتكىزىپ تاستاۋى كەرەك. ەكىنشى جاق ولاردى جىبەرمەي قارسىلىق كورسەتەدى. قارسىلاستارىنان ايلاسىن اسىرىپ, نىساناعا كوكپاردى اپارىپ تاستاعان ادام سىيلىققا يە بولادى.
مارە كوكپار. ويىنعا قاتىسۋشىلار ەكى شەتتەن نىسانا نەمەسە قازاندىق بەلگىلەپ, قاي جەڭگەنى كوكپاردى سول قازاندىققا سالىپ, ۇپاي جينايدى. وسىلاي مەجەلەنگەن ۋاقىتتا قاي توپ كوپ ۇپاي جينايدى, سولار جەڭىسكە جەتەدى. قازىرگى كوكپارشىلار وسى مارە كوكپار تۇرىنەن سايىسىپ ءجۇر.
جالپى, كوكپار ويىنى توپتاسقان جىگىتتەردىڭ بىرلىگى مەن ەپتىلىگىن قاجەت ەتەدى. ەرتەرەكتە كوكپارشىلار اۋىل, اتا, رۋ بولىپ توپتاسىپ, ەكىنشى رۋ, اتا, اۋىلدىڭ ازاماتتارىمەن سايىساتىن. رۋدىڭ ازاماتتارى قارسىلاستارىنان جەڭىلىپ قالماۋ ءۇشىن اركەز دايىندالىپ, ۇنەمى ماشىقتانعان. قازاقتا: «كوكپار تارتقاندىكى, قويان قاققاندىكى» دەپ تەگىن ايتىلماعان.
