قۇرمەت قاراۋىل روتاسىنىڭ سۇيەمەلدەۋىمەن ەكى ەلدىڭ تاريحي مۇراسىنا قۇرمەت بەلگىسى رەتىندە باس شتاب باستىعى − قۇرلىق اسكەرلەرى باس قولباسشىسىنىڭ ءبىرىنشى ورىنباسارى گەنەرال-مايور قۋانىشبەك ۇشتاەۆ پەن فرانتسيانىڭ قازاقستانداعى ەلشىسى سيلۆيان گيوگە فرانتسيا حالقىنىڭ تاۋەلسىزدىگى مەن ۇلتتىق بىرلىگىنىڭ سيمۆولىنا اينالعان شارل دە گولل ەسكەرتكىشىنە گۇل شوقتارىن قويدى.
– سوعىس جىلدارى ميلليونداعان ادام تاعدىرى سىنعا ءتۇستى. وتقا ورانعان مايدان دالاسىندا فرانتسۋزدارمەن بىرگە جاۋعا قارسى جان الىپ, جان بەرىسكەن شايقاستا جەڭىسكە جەتۋگە پارتيزانداردىڭ قوسقان ۇلەسى زور بولدى. بۇگىنگى ماراپاتتاۋ ءراسىمى تەك وتكەنگە تاعزىم عانا ەمەس, باتىرلارىمىزدىڭ ەرلىگىن ۇلىقتاۋ. جاۋىنگەرلەرىمىزدىڭ ەسىمى ۇرپاق جادىندا ماڭگى ساقتالادى, – دەدى گەنەرال-مايور قۋانىشبەك ۇشتاەۆ.
قاندى قىرعىندا 300-دەن استام وتانداسىمىز فرانتسيانىڭ تۋلۋزا قالاسى مەن ونىڭ ماڭىن ازات ەتۋگە بەلسەنە قاتىسقان.
ايدا بالاەۆا: جەڭىس كۇنى – كەلەر ۇرپاققا تاعىلىم بەرەتىن قاسيەتتى كۇن
بۇگىن سول جاۋىنگەرلەردىڭ بەسەۋى, ياعني احمەت بەكتاەۆ, بەكتەمىر بايجانوۆ, نۇرانباي بايمۇراتوۆ, وتەۋالي بەيسەنعاليەۆ, احمەت سۋبالوۆتىڭ بالالارى مەن نەمەرەلەرىن فرانتسيانىڭ قازاقستانداعى توتەنشە جانە وكىلەتتى ەلشىسى سيلۆيان گيوگە فرانتسۋز رەسپۋبليكاسىنىڭ قارۋلى كۇشتەر جانە ارداگەرلەر ءمينيسترى كاترين ۆوترەننىڭ اتىنان 1939-1945 جىلعى ەكىنشى دۇنيەجۇزىلىك سوعىستا فرانتسيانى ازات ەتۋگە شايقاسقانى ءۇشىن «ازات ەتۋ» مەدالىمەن ماراپاتتادى.
– ءۇش جۇزدەن استام قازاقستان ازاماتى فرانتسيا جەرىندە فرانتسۋزدارمەن بىرگە, قاتارلاسا, ەلىمىزدى ازات ەتۋ جولىندا شايقاستى. وسىلايشا, ولار ءوز وتانىنا مىڭداعان شاقىرىم جەردە, ورتاق جاۋعا قارسى بىرىگىپ, قيىندىقتاردى باستان كەشىرىپ, قان توگىپ, ءتىپتى جاندارىن پيدا ەتتى. كەزىندە گەنەرال دە گولل ولارعا قۇرمەت كورسەتتى, ال بۇگىنگى فرانتسيا مۇنى ۇمىتپايدى, – دەلىنگەن فرانتسيا قارۋلى كۇشتەرى جانە ارداگەرلەر ءمينيسترى كاترين ۆوترەننىڭ سوزىندە.
پارتيزان جاۋىنگەرلەردىڭ بالالارى مەن نەمەرەلەرى ەرەكشە تولقىپ, العىستارىن ءبىلدىردى. ۇرپاقتارى بۇل جەڭىستىڭ 81 جىلدىعىندا ەرەكشە سىي بولعانىن ايتادى.
استانادا «وتان انا» مونۋمەنتىنە گۇل شوقتارى قويىلدى
– بۇگىنگى تولقىنىسىمىز ەرەكشە. اكەمىزدىڭ ەرلىگى ۇلىقتالىپ جاتىر. وتە ريزامىز, كوزىمىزگە جاس كەلىپ تۇر. باتىرلار رۋحىنا قۇرمەت كورسەتىپ جاتقان فرانتسياعا, ەلىمىزدىڭ قورعانىس مينيسترلىگىنە العىسىمىز شەكسىز, – دەدى پارتيزان جاۋىنگەر بەكتەمىر بايجانوۆتىڭ ۇلى سىرلىباي بەكتەمىروۆ.
ءىس-شارا سوڭىندا ماراپاتتاۋ راسىمىنە قاتىسقان ارداگەرلەر مەن قوناقتار ەستەلىك سۋرەتكە ءتۇستى.
