ناۋبايحاناشى الەمدەگى قۇرمەتتى ماماندىقتىڭ ءبىرى. نان قادىرىن بىلەتىندەر ناۋبايحاناشىنى دا قادىر تۇتادى. سۆەتلانا يۆانوۆنا وسى سەلوداعى كوپ بالالى وتباسىندا تۋىپ ءوستى. اۋىلداعى جۇمىستىڭ قاي-قايسىسى بولسىن وڭاي ەمەس, بويىڭداعى بار قاجىر-قايراتىڭدى جۇمساپ, تىربانىپ ەڭبەك ەتۋىڭ كەرەك. ول ءۇشىن ارينە, ۇشقان ۇياداعى ءتالىم-تاربيەنىڭ ىقپالى بولاتىندىعى داۋسىز. اكەسى يۆان رەگەدا مال ازىعىن دايىندايتىن تسەحتا ەڭبەك ەتسە, اناسى پراسكوۆيا كونستانتينوۆنا مال فەرماسىندا جۇمىس ىستەدى. وكتيابردىڭ ەلۋ جىلدىعى اتىنداعى مەكتەپتى بىتىرگەننەن كەيىن اگروتەحنيكالىق كوللەدجدە ءبىلىم الدى. وقۋىن اياقتار كەزدە جاس قىزدى تۋعان جەرى قول بۇلعاپ شاقىراتىنداي. ەتەنە تانىس ادامدار دا, بال كۇلكىلى بالالىق شاعى وتكەن, ءوزى ءۇشىن سونداي ىستىق اۋىلداستارى دا ويىنان شىقپاي جۇرەتىن. كوللەدجدى بىتىرگەننەن كەيىن ەش ويلانعان جوق, ەلگە ورالدى. جاس مامانعا سەلوداعى اسحانادا جۇمىس ىستەۋ ۇسىنىلدى. تالاپتى قىزعا جاڭا ماماندىقتى يگەرۋگە تۋرا كەلدى. كەيىن ناۋبايحاناعا اۋىستى. نان ءيىسى كوكىرەگىن قۋانىشقا بولەپ, مەرەيىن وسىرەتىن جەردە ەڭبەك ەتۋ دە قىزىق ەكەن. قابارىپ پىسكەن, ءدامى ءتىل ۇيىرەتىن ناندى ءپىسىرۋ ءۇشىن ەڭ الدىمەن ىنتا كەرەك ەكەن. ىنتا بولسا, پىسىرگەن نانى دا تۇتىنۋشىلاردىڭ كوڭىلىنەن شىعىپ جاتادى.
–بولكە ناندى قولىڭا الىپ ۇستاپ كورەسىڭ, – دەيدى ول, – ەگەر الاقانىڭدى كۇيدىرىپ تۇرماسا پىسكەن, وتتىڭ تابى ناننىڭ بويىنان ءالى كەتپەسە, وندا شيكى. قالىپتان سۋىرىپ العان كەزدە بارلىعى ايقىندالا تۇسەدى.
كورشىلەرى ءالى تاڭعى ۇيقىنىڭ قۇشاعىندا جاتقان كەزدە سۆەتلانا نان پىسىرە باستايدى. قالىپتى جۇمىس ىرعاعى. كۇندە نان ءپىسىرىپ جۇرسە دە ءار كۇن سايىن ءسال-ءپال قوبالجيتىنى بار. قالاي بولار ەكەن دەگەن ءبىر ساۋال جۇرەگىن تولقىتىپ تۇرادى.
سۆەتلانا 1985 جىلى وسى سەلونىڭ تۇرعىنى ۆلاديمير فيليۋكپەن نەكەلەسكەن. بەرەكەلى شاڭىراقتا ەكى ۇل دۇنيەگە كەلدى. ىلكىدەن جالعاسقان ەڭبەكقورلىق ۇلدارىنا دا جۇعىستى بولدى. سەرگەي تەحنيك-مەحانيزاتور, ۆلاديمير قۇرىلىسشى, ۆلاديمير, تيموفەي جانە ارسەني ەسىمدى نەمەرەلەرى كوز قۋانتىپ ءوسىپ كەلە جاتىر.
ء–ار ادامنىڭ الدىنا قويعان ماقسات-مۇراتى بولۋى كەرەك, – دەيدى كەيىپكەرىمىز, – سوندا عانا ءومىرىڭ تەككە وتپەي, مازمۇندى بولماق.
ەل سىيلاعان ەڭبەك ادامىنىڭ پىكىرىنە دەن قويدىق.
اقمولا وبلىسى
