1975 جىلى قازاقتىڭ اياۋلى قىزى, ايگىلى ءانشى, حالىق قاھارمانى روزا باعلانوۆا تورعاي ولكەسىن ارالاپ, كونتسەرت قويادى. سوندا كسرو حالىق ءارتىسىنىڭ جولى ءبىزدىڭ اۋىلعا دا (قوستاناي وبلىسى امانگەلدى اۋدانى قابىرعا اۋىلى) تۇسەدى. اۋىل ازاماتتارى الىستان ات تەرلەتىپ كەلگەن ءانشىنى الدىنان شىعىپ, قۇداداي كۇتىپ الادى. بۇل تۋرالى قازىر جاسى جەتپىستى القىمداعان عالىمجان قۇداباەۆ اقساقال ايتىپ بەردى.
«بىزگە ول كىسى كورشى «اباي» كەڭشارىنان كەلدى. اۋىل باسشىلارى قوجاباي دەگەن جەردە كيىز ءۇي تىگىپ, قارسى الدى. مەن ول كەزدە پوشتادا ىستەيمىن. جاسىم جيىرماعا كەلگەن جىگىتپىن. روزا اپامىزدى الدىنان شىعىپ, گۇلمەن كۇتىپ الدىق. مال سويىلدى. بارىنشا قۇرمەت كورسەتىلدى. قاسىندا ەكى-ءۇش-اق ادام بار. سول جىلدارى ۇجىمشار ورتالىعىنا ەلەكتر جۇيەسى ەندى تارتىلىپ جاتقان ەدى. سوندىقتان جارىق ۇيلەرگە موتورمەن بەرىلەتىن. الدىمەن ول كىسى كەشكۇرىم دالادا كونتسەرت قويدى. وعان اۋىلدىڭ بارلىق تۇرعىنى تايلى-تۇياعى قالماي كەلدى. تۇپ-تۇنىق اسپان. شىلدەنىڭ ماقپال كەشى. دالا ساحناسىندا ءانشى بۇلاقتاي سىڭعىرلاعان اسەم داۋسىمەن حالىق اندەرىنەن باستاپ, ەل ىشىنە كەڭ تاراعان «اق ماڭدايلىم», «ادەمى», «اح, سامارا-گورودوك»-تى تامىلجىتا شىرقادى. تىڭدارمانداردىڭ قۇلاق قۇرىشىن قاندىردى. جاسى ۇلكەن قاريالار وعان ءدان ريزا بولىپ, باتاسىن بەردى. كەلەسى كۇنى كلۋبتا قويدى. وعان كەڭشارداعى ءتورت بولىمشەنىڭ بارلىق ادامى جينالدى. بىزدەن كەيىن روزا اپامىز ۇرپەك اۋىلىنا كەتتى», دەدى ول.
عالىمجان اعامىزدىڭ ايتۋىنشا, سول جىلدارى اۋىلعا ءبىرتۋار كومپوزيتور, حالىق قاھارمانى نۇرعيسا تىلەنديەۆ «وتىرار» وركەسترىمەن, «ياشلىك» توبى جانە ت.ب. بەلگىلى انشىلەر دە كەلىپ, ونەر كورسەتىپتى. مۇنىڭ شەت جاعاسىن ءبىز دە كوردىك. مەكتەپتە وقىپ جۇرگەندە اۋىلعا روزا رىمباەۆا, ماقپال ءجۇنىسوۆا, اقجول مەيىربەكوۆ, ناعيما ەسقاليەۆا سەكىلدى ەسىمدەرى ەلىمىزگە ءمالىم ونەرپازدار كەلگەن ەدى. قازىر مۇنداي جاعداي وتە سيرەك.
ەندى سۋرەتكە توقتالايىق. بۇگىندە روزا باعلانوۆانى ورتا-عا الىپ تۇسكەن ازاماتتاردىڭ ەشبىرى ومىردە جوق. ولاردىڭ ءبارى دە اۋدان, اۋىل كولەمىندە لاۋازىمدى قىزمەت اتقارعان تۇلعالار. الايدا بۇل جادىگەر ايتۋلى ءانشىنىڭ ەل ادامدارىمەن تۇسكەن بەينەسى ارقىلى سول ۋاقىتتىڭ تىنىسىن سەزىندىرەدى.
