ءىس-شارا «جاھاندىق دامۋدىڭ جارقىن كەلەشەگىن بىرلەسە قۇرۋ, باستاپقى ۇمتىلىستارعا ادالدىق» تاقىرىبىنا ارنالدى.
مەملەكەت باسشىسى اسا ماڭىزدى ءارى دەر كەزىندە ۇيىمداستىرىلعان جيىن ءۇشىن قىتاي تاراپىنا ريزاشىلىعىن ءبىلدىردى.
– ءبىز قحر توراعاسى سي ءتسزينپيننىڭ كورەگەن باسشىلىعى مەن اناعۇرلىم ءادىل, ينكليۋزيۆتى ءارى ءتيىمدى حالىقارالىق ىنتىماقتاستىق ورناتۋعا باعىتتالعان كۇش-جىگەرىن جوعارى باعالايمىز. وسى ورايدا قازاقستان گەوساياسي جانە ەكونوميكالىق سىن-قاتەرلەرگە جاۋاپ بەرەتىن قىتايدىڭ جاھاندىق باستاماسىن تولىعىمەن قۇپتايدى, – دەدى پرەزيدەنت.
قاسىم-جومارت توقاەۆ ورنىقتى دامۋ ماقساتتارىنا تەزىرەك جەتۋگە ىقپال ەتەتىن جاھاندىق دامۋ باستاماسىنا (Global Development Initiative) ەلىمىزدىڭ قولداۋ كورسەتەتىنىن جەتكىزدى.
– بۇل قحر توراعاسى سي ءتسزينپيننىڭ تيانتسزيندە وتكەن شانحاي ىنتىماقتاستىق ۇيىمى سامميتىندەگى قىتايدىڭ كەيىنگى ستراتەگيالىق ۇسىنىسىنا – جاھاندىق باسقارۋ باستاماسىنا (Global Governance Initiative) ساي كەلەدى. اتالعان باستاما تۇرلاۋسىز الەمگە وڭ اسەر ەتىپ, كوپتەگەن ەلدىڭ ماقسات-مۇراتىن ايقىن جەتكىزۋىنە كومەكتەسەدى. وسى رەتتە نەگىزگى ءرولدى بىرىككەن ۇلتتار ۇيىمى اتقاراتىن بولادى, – دەدى قاسىم-جومارت توقاەۆ.
بۇل باستاما ەگەمەندىك تەڭدىگىن قامتاماسىز ەتۋ, حالىقارالىق قۇقىق ۇستەمدىگى, كوپجاقتى ينستيتۋتتاردى نىعايتۋ, سونداي-اق ادامداردىڭ يگىلىگى مەن مۇددەلەرىن قورعاۋعا باعىتتالعان الەمدىك ءتارتىپتى ىلگەرىلەتۋ سەكىلدى وزەكتى ماسەلەلەردىڭ شەشىمىن ۇسىنادى.
– جاھاندىق باسقارۋ باستاماسى, ەڭ الدىمەن, تسيفرلىق تەحنولوگياعا, قاۋىپسىز كيبەركەڭىستىككە جانە عارىش كەڭىستىگىنە ءادىل قول جەتكىزۋدى قامتاماسىز ەتەدى. بۇل نورماتيۆتىك-قۇقىقتىق بازا مەن جاساندى ينتەللەكتىنى پايدالانۋدىڭ ەتيكالىق ستاندارتتارىن ازىرلەۋ تۇرعىسىنان وتە وزەكتى. وسى ورايدا قازاقستان قىتايدىڭ جاساندى ينتەللەكت سالاسىنداعى ىنتىماقتاستىق بويىنشا جاھاندىق ۇيىم قۇرۋ جونىندەگى ۇسىنىسىن قولدايدى, – دەدى مەملەكەت باسشىسى.
سونداي-اق پرەزيدەنت جاھاندىق باسقارۋ باستاماسى 150-دەن استام ەل قوسىلعان ء«بىر بەلدەۋ, ءبىر جول» ستراتەگياسىنىڭ مىندەتتەرىمەن ۇندەس ەكەنىن جەتكىزدى.
ءسوز سوڭىندا قاسىم-جومارت توقاەۆ جاھاندىق باستامانى جۇزەگە اسىرۋ اياسىنداعى ىنتىماقتاستىق بۇۇ-نىڭ نەگىزگى ماقساتتارىنا جەتۋگە سەپتىگىن تيگىزەتىنىن اتاپ ءوتتى.
