فوتو: اقوردا
مەملەكەت باسشىسىنىڭ ايتۋىنشا, «حالىق ۇنىنە قۇلاق اساتىن مەملەكەت» قاعيداتى بۇگىندە ناقتى ءىس جۇزىندە جۇزەگە اسىرىلىپ كەلەدى. سونىمەن قاتار ەلدە ينۆەستيتسيالىق داۋلاردى شەشۋگە قولايلى قۇقىقتىق جانە ينستيتۋتسيونالدىق ورتا قالىپتاسىپ جاتىر.
«وسىنىڭ ءبارى «حالىق ۇنىنە قۇلاق اساتىن مەملەكەت» قاعيداتىنىڭ ناقتى ءىس جۇزىندەگى كورىنىسى ەكەنى كۇمانسىز. ەلىمىز سوت جۇيەسى جانە قۇقىق قورعاۋ سالاسىنداعى تۇبەگەيلى رەفورمالارمەن قاتار اۋقىمدى ەكونوميكالىق وزگەرىستەردى جۇزەگە اسىرىپ جاتىر. مۇنىڭ مەملەكەتىمىز ءۇشىن ماڭىزى ايرىقشا. ىسكەرلىك بەلسەندىلىكتى ارتتىرۋ ماقساتىندا, سونىڭ ىشىندە ينۆەستيتسيالىق داۋلاردى شەشۋ ءۇشىن قولايلى قۇقىقتىق ينستيتۋتسيونالدىق ورتا قالىپتاسۋدا. سونىڭ ارقاسىندا سوت شەشىمدەرىنىڭ 80 پايىزىنا جۋىعى ينۆەستورلاردىڭ پايداسىنا شىعارىلىپ جاتىر», دەدى قاسىم-جومارت توقاەۆ.
مەملەكەت باسشىسى: ەلىمىزدەگى سوت تاجىريبەسى ءۇشىن دە بەتبۇرىس كەزەڭى باستالدى
پرەزيدەنت وتاندىق جانە شەتەلدىك ينۆەستورلارمەن كەزدەسۋلەردە بيلىك پەن بيزنەس وكىلدەرىنىڭ ءوزارا اشىق بايلانىس ورناتۋى ماڭىزدى ەكەنىن ايتتى.
«مەن وتاندىق جانە شەتەلدىك ينۆەستورلارمەن كەزدەسۋلەر كەزىندە ۇنەمى مىنا ماسەلەگە ايرىقشا نازار اۋدارامىن: بيلىك جانە بيزنەس وكىلدەرى ءوزارا سىندارلى بايلانىس ورناتۋى كەرەك, ولار وزەكتى تۇيتكىلدەردى اشىق تالقىلاپ, شەشۋ جولدارىن بىرلەسە وتىرىپ ىزدەۋى قاجەت. بيلىكتە وتىرعان لاۋازىمدى تۇلعالارعا تاپسىرمام: ءار داۋلى جاعدايدا مامىلەگە كەلەتىن جولدى ىزدەۋ كەرەك, بىراق بۇل جول زاڭناما جۇيەسىنە نۇقسان كەلتىرمەۋى قاجەت. باسقا سوزبەن ايتقاندا, ءار كەلىسىمنىڭ زاڭدىق شەكتەۋى بولۋعا ءتيىس. اتاپ ايتۋ كەرەك, كاسساتسيالىق سوتتاردى قۇرۋ باستاماسى ءدال وسىنداي جيىننىڭ بىرىندە كوتەرىلگەن بولاتىن», پرەزيدەنت.
ەسكە سالا كەتەيىك, بۇگىن مەملەكەت باسشىسى جاڭا كونستيتۋتسيا ەرەجەلەرىن جۇزەگە اسىرۋ ماقساتىندا بەس كونستيتۋتسيالىق زاڭعا قول قويدى.
