جىل باسىنان بەرى قالادا 21 700 جاس جۇمىسقا ورنالاسقان. ولاردىڭ 15700-ءى تۇراقتى, 6 مىڭى ۋاقىتشا جۇمىسپەن قامتىلىپتى. تسيفرلىق پلاتفورمالاردى دامىتۋ, قىسقا مەرزىمدى كۋرستاردى ىسكە قوسۋ, مانساپ جارمەڭكەلەرىن ۇيىمداستىرۋ, كوميۋنيتي-ورتالىقتار ارقىلى قولداۋ كورسەتۋ, جۇمىس بەرۋشىلەرمەن ءوزارا ارەكەتتەستىكتىڭ جاڭا فورماسىن ەنگىزۋدىڭ ارقاسىندا ءبىرشاما جاس ەكى قولعا ءبىر كۇرەك تاپقان.
قازىر الماتىدا 712 مىڭ جاس بارىن جوعارىدا ايتتىق. ولاردىڭ 442 مىڭى جۇمىس ىستەيتىندەر دە, 280,7 مىڭى – ستۋدەنتتەر, شامامەن 80 مىڭى جوعارى سىنىپ وقۋشىلارى.
- ەكونوميكالىق بەلسەندى جاستاردىڭ سانى – 472,1 مىڭ ادام, ونىڭ ىشىندە 452,6 مىڭى جۇمىسپەن قامتىلعان. ولاردىڭ 396,7 مىڭى جالدامالى جۇمىسشىلار بولسا, 56 مىڭى ءوزىن-ءوزى جۇمىسپەن قامتىعاندار.NEET-جاستاردىڭ ۇلەسى قازىرگى ۋاقىتتا 5,8%. جىل سايىن جوعارى وقۋ ورىندارىن شامامەن 50 مىڭ ادام بىتىرەدى. ولاردىڭ 60–80%-ى الماتىدا قالىپ, وسىندا جۇمىسقا ورنالاسۋعا ۇمتىلادى, – دەيدى جاستار ساياساتى باسقارماسى باسشىسىنىڭ ورىنباسارى الماز كەڭەسباي.
قالا جاستارىن جۇمىسپەن قامتۋ ماقساتىندا قۇرىلعان كارەرا ورتالىعىنا جىل باسىنان بەرى 5 مىڭنان استام جاس جۇگىنگەن بولسا, ولاردىڭ 4 مىڭى جۇمىسقا ورنالاسىپ, قالا اۋداندارىندا «كارەرا كۇندەرى» وتكەن. «جاسىل ەل» جوباسى بويىنشا دا جاز مەزگىلىندە 2,1 مىڭ ستۋدەنت ۋاقىتشا جۇمىسپەن قامتىلعان.
ماسەلەنىڭ شەشىلۋىنە ارناۋلى تسيفرلىق پورتال اۋقىمدى ۇلەس قوسىپ كەلەدى. پورتالدا 3,5 مىڭنان استام جۇمىس بەرۋشى تىركەلگەن, 2,1 مىڭنان استام بوس جۇمىس ورنى بار, قولدانۋشىلار سانى 35 مىڭنان اسقان. وسى پلاتفورما ارقىلى 1,8 مىڭ ادام جۇمىس تاپتى. ولاردىڭ 82%-ى جوعارى ءبىلىمدى بولعانىمەن, 91%-ىنىڭ تاجىريبەسى جوق, بۇل باستاپقى جۇمىسپەن قامتۋدىڭ ماڭىزدىلىعىن كورسەتەدى.
الماتىنىڭ ءار اۋدانىندا ورنالاسقان 11 جاستار كوميۋنيتي-ورتالىعى جۇمىسپەن قامتىپ, قولداپ, دامۋعا سەپتەسەتىن ورىنعا اينالدى. جىل باسىنان بەرى بۇل ورتالىقتارعا 6 مىڭنان استام جاس جۇگىنگەن. 3,9 مىڭى جۇمىس ماسەلەسى بويىنشا, 2,1 مىڭى – پسيحولوگيالىق جانە قۇقىقتىق كومەك الۋ ءۇشىن. 9 اي ىشىندە 1,5 مىڭنان استام ءىس-شارا وتكىزىلىپ, 200 مىڭنان استام ادام جۇمىسقا ورنالاسقان.
سونىمەن قاتار, الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىمەن بىرلەسىپ, جاستاردى جۇمىسپەن قامتۋعا جاردەمدەسۋ بويىنشا كەشەندى جۇمىس جۇرگىزىلىپ جاتىر.
اتالعان جۇمىس اياسىندا ەڭبەك موبيلدىلىگى ورتالىعى ارقىلى تۇراقتى جانە ۋاقىتشا جۇمىسقا 8,4 مىڭ جاس جۇمىسقا ورنالاستى.
بۇدان بولەك, الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى جاستاردى كاسىبي باعىتتاۋ ماقساتىندا «مانساپ كومپاسى» تسيفرلىق پلاتفورماسىن ەنگىزىپ, دامىتىپ جاتىر. ناتيجەسىندە اتالعان پلاتفورما ارقىلى 3,7 مىڭ ادام جۇمىسپەن قامتىلدى.
وسىلايشا, جىل باسىنان بەرى جالپى 21,7 مىڭ جاس جۇمىسقا تۇردى. ونىڭ ىشىندە 15,7 مىڭى تۇراقتى, 6 مىڭى ۋاقىتشا جۇمىسقا ورنالاسقان.
جاستاردىڭ جۇمىسقا ورنالاسۋىنا كەدەرگى كەلتىرەتىن ماسەلەلەردى شەشۋ (تاجىريبەنىڭ بولماۋى, اقپاراتتىڭ جەتكىلىكسىزدىگى, جۇمىس بەرۋشىمەن بايلانىستىڭ جوقتىعى) ءۇشىن جاڭا فورماتتار ەنگىزىلە باستادى. جازدا «New Generation Leaders» اتتى العاشقى كارەرالىق وليمپيادا ءوتىپ, وعان 3 مىڭنان استام ستۋدەنت قاتىسىپ, 70 كوماندا 350-دەن استام شەشىم ازىرلەدى. سونىڭ ارقاسىندا 200 ادام جۇمىس تاۋىپ, 700-ءى بىلىكتىلىگىن جەتىلدىردى.
سونداي-اق, جۇمىسسىز تۇلەكتەردى تىركەپ, ولاردى قالالىق كارەرا ورتالىعىنا باعىتتاۋ ءۇشىن call-ورتالىق تا قۇرىلعان. جاستاردى اقپاراتتاندىرۋ ماقساتىندا ميب جانە پيك-پەن (وسي ي كسك) قىرۋار جۇمىس ىستەلىپ جاتىر, بۇل كوميۋنيتي-ورتالىقتارعا كەلەتىندەر سانىن جىلىنا 400 مىڭنان 600 مىڭ ادامعا دەيىن ارتتىرۋعا مۇمكىندىك بەرمەك.
جاڭادان Career Speed Dating فورماتى دا ەنگىزىلدى. مۇندا جاستار ءوزىن تانىستىرىپ, كومپانيالار سول جەردە وزىنە كەرەك ماماندى تاڭداپ الادى. ءار كوميۋنيتي-ورتالىقتا 5–10 سەرىكتەس جۇمىس بەرۋشى ورنالاسادى. ولار كەڭەس بەرىپ, جۇمىسقا الىپ, جاستاردى ەڭبەك نارىعىنا بەيىمدەۋگە كومەكتەسپەك.
