ناۋرىز مەرەكەسى ورتالىق ازيا حالىقتارىندا بەس مىڭ جىلدان بەرى تويلانىپ كەلەدى. بۇل – تاريحى كونە, ءداستۇرى ماڭگىلىك حالىقتىق مەيرام. قازاق حالقىنىڭ ىنتىماق پەن ىرىس, بىرلىك پەن بەرەكە مەيرامى.
(تاريحتان تابارىك)
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ 2009 جىلعى 24 ساۋىردەگى جارلىعىمەن ناۋرىز ايىنىڭ «21,22,23 كۇندەرى ناۋرىز مەيرامى» بولىپ رەسمي تۇردە بەكىتىلدى.
...ناۋرىز, ناۋرىز, كۇن يگى!
كۇنى يگى جەردىڭ – ءتۇنى يگى.
باۋىرى جىلىپ ناۋات-قار,
بابىمەن عانا ءجىبيدى.
شاشىلىپ ىرىس شاناقتان,
شاقىرىپ ءبىر ءۇي ءبىر ءۇيدى,
شاتتانۋشى ەدى ءبىر يگى!..
مۇقاعالي ماقاتاەۆ
القيسسا
وردام – وتانىم – دارا ساڭلاعىم,
سەندە قاز باستىم, سەندە سامعادىم.
باتىسىم, شىعىسىم,
وڭتۇستىك, سولتۇستىك –
ءتورت قۇبىلا تۇگەلىم,
قازاقستانىم – قاراشاڭىراعىم!
كيىز ءۇي. تۇندىك ءتۇرۋ
جىل جەتتى قايتقان قۇستىڭ قاناتىمەن,
جارىلقاپ سالتاناتتىڭ ساناتىمەن.
جادىراپ جاقسى شۋاق تورگە شىقتى,
جاقسىلىق نۇرىن شاشتى اباتىمەن.
اسپاندا اقشا بۇلتتار قارقاراداي,
التىن كۇن – التىن كومگەن شار تاباداي.
ادامعا قۋات بەرگەن, جاڭا كۇنىم,
اق مارجان ىقىلاسىڭ تارقاماعاي.
كەل, كۇنىم, كەمپىرقوساق ورگەن كۇنىم,
كۇي بولىپ كوڭىلدەرگە ەنگەن كۇنىم.
كوك تاسىن سامارقاننىڭ ەرىتەتىن,
كوڭىلىن كوك ايازدىڭ جەڭگەن كۇنىم.
كەل, كۇنىم, كوكجيەككە كىرگەن كۇنىم,
كىلەمىن كوكورايدان ىلگەن كۇنىم.
كوكتەگى بوزتورعايدىڭ اۋەنىنەن,
كوكتەمنىڭ كىرگەندىگىن بىلگەن كۇنىم.
ناۋرىز, سىرىمدى ايتىپ نازدانايىن,
ناۋىرزەك شۋاعىڭنان ساز باعايىن.
ناقتىلاپ ءبىر تاۋلىكتىڭ سىباعاسىن,
ناقىشتاپ, جولعا ءتۇسىپ, قوزعالايىن.
جەلباۋداعى جىر
نوسەر جاۋار, باتىس بۇرقاپ, جەل سوعار,
كوز جاسىنداي كورىنەدى ولسە قار.
كوكتەم كەلىپ, كەرىلگەندە كوكجيەك,
بۇلا ماۋسىم حالىق ءۇشىن قانسونار.
باسقۇرداعى جىر
كەرەگەگە بايلانادى ىرىس-قۇت,
ماۋجىرايدى ماقپال تۇندە تىنىشتىق.
اسپان مەن جەر قاۋىشادى قۋانىپ,
كۇننىڭ نۇرىن جۇرەكتەرگە تۋىس قىپ.
سىقىرلاۋىقتاعى جىر
اي دەگەن اسپانداعى – بادانا ءمور,
جۇلدىزدار – جاۋھار شەگە, جاڭارا بەر.
سىبىرلاپ سىقىرلاۋىق ءتىل قاتادى,
سۇلۋداي سىلاڭ قاققان سامالا-جەل.
ماڭدايشاداعى جىر
پارقىن بىلگەن پاراساتتى سالتىمنىڭ,
باعاسى بار داستۇرىندە التىننىڭ.
تاڭدايىندا ۇياسى بار بۇلبۇلدىڭ,
ماڭدايىنا جەل تيمەسىن حالقىمنىڭ.
تابالدىرىقتاعى جىر
وڭ اياقپەن اتتاپ كىرسىن ناۋرىز,
جاقسىلىققا قول ۇسىنسىن جانىمىز.
اق مول بولسىن,
امان بولسىن ەلىمىز,
تاڭعى نۇرداي تازا بولسىن ارىمىز.
ءتۇن. استانا
الىپ قالا سامالمەن تىنىستايدى,
اسقاق قولى بيىكتە تۋ ۇستايدى.
الاڭداردىڭ وتتارى سازبەن ويناپ,
اسپان جاققا اۋەنىن دىبىستايدى.
ساعىنىشتىڭ سازدارىن قايتا ورەمىن,
ساعىنعاندا كەلمەسەڭ قايتەر ەدىم؟
سامال بولىپ كەلدىڭ سەن, ناۋرىزىم,
سامعاپ كوككە بارادى «بايتەرەگىم».
شاتتىق كۇيىن تارتادى الاڭدارىم,
شۇعىلاسىن شاشادى باعاندارىم.
شاپاعاتىن تاراتىپ وتانىما,
شۋاعىنا بولەيدى ادامدارىن.
ەل دامىلدا. تاماشا ءتۇن شىرايلى,
ەركەلەگەن باۋلارى – گۇل-شىرايلى.
ەل نازارىن قاراتىپ ءبىر وزىنە,
ەلوردامىز تۇنىمەن تىنشىمايدى.
اسقاق-اسقاق ارشىندى اق جالدارىم,
اق جالدارىم, اياۋلى باق جولدارىم.
استانادان بارادى سالەم الىپ,
اەروپورتتار, ساپارجاي, ۆوكزالدارىم.
شاتتىق ءانى شارشاماي شىرقاتقانىم,
شىندىعىمدى كورسىن دەپ ۇرپاقتارىم.
شۇعىلاسىن تاراتىپ جان-جاعىنا,
شالقىپ جاتىر بۇلاعاي بۇرقاقتارىم.
ناعىز دۋمان تاڭ اتا باستالا ما,
ناقىشىمدى توگەيىن باس قالاما.
نىعمەتىن اللانىڭ قارسى الايىن,
ناۋرىزىم كەپ كىردى استاناما.
ۇركەر اۋعان شاق. الماتى
ارمىسىڭ, الىپ قانات الاتاۋىم,
الپامىس مىنەزى بار دارا تاۋىم.
الىستان اڭساپ, تالىپ ناۋرىز جەتتى,
اق تىلەك, باتا بەرگىن, دانا تاۋىم.
الماتىم, اسىل ۇيام, ءاز شاڭىراعىم,
اياۋلى ابزال مەكەن – بوز شاڭداعىم.
ارايىن ناۋرىزدىڭ سالتاناتتاپ,
اقپا جىر, اعىل-تەگىل ءسوز تاڭدادىم.
بارقىت ءتۇن, ۇركەر اۋعان, بالداي سامال,
بوياۋى ناۋرىزدىڭ قانداي جامال!
ءبۇر جارعان يبا تالدىڭ يباسىنداي,
بويجەتكەن بىلدىرەدى قانداي حابار؟
الماتى – ناۋرىزدا عاشىق قالا,
ارمانعا, العى كۇنگە اسىق قالا.
اقىسىن اسىل تاڭنىڭ بىلگىڭ كەلسە,
اق ساندىق – كوڭىلىڭدى اشىپ قارا.
اقشا بۇلت الاتاۋدى ىقتامايدى,
اسپان دا كۇڭگىرتتىكتى قۇپتامايدى.
اللانىڭ راحىمى جاۋعان كۇنى,
الماتى ابىر-سابىر, ۇيىقتامايدى.
ەلەڭ-الاڭ. تالدىقورعان
جۇماق تاڭ. جۇماق سامال. جۇمباق الەم,
جەتىسۋ سىر ايتادى, تىڭداپ ولەڭ.
جامىراعان بۇلاقتاردىڭ دامىلى جوق,
جىر ايتىپ, سىلدىرايدى شىڭعا كەرەڭ.
جەتىسۋ – جەتى وزەنىن ورگىزەدى,
جاڭانىڭ جاۋھارلىعىن كورگىزەدى.
جاعاسىن قار كومكەرگەن بيىك تاۋلار,
جىلعاعا جىلعا قوسىپ, ەرگىزەدى.
ۇلاردىڭ داۋسى بيىك – اسپان-سىندى,
ۇمتىلىپ, تومەن قاشىپ, تاستار سىندى.
ۇياسىن ۇرپاعى ءۇشىن تاستاپ شىققان,
ۇلىلاپ ۇستاۋ كەرەك جاس بارشىندى.
جەتىسۋ تاڭعا اسىلىپ, اي قارايدى,
جۇلدىزىن ءبىرتىن-ءبىرتىن مايدالايدى.
جاراتقان جاڭا كۇندى بەرە گور دەپ
جارىقتىق تاڭعى نۇردى ايمالايدى.
بوزالا تاڭ. وسكەمەن
ءور التاي, اسقار التاي, اسقان التاي,
ورلىكپەن كەلەر كۇنگە باسقان التاي.
وزەگىن جارىپ اققان قارا ەرتىستىڭ,
ولەڭىن تاسقا جازىپ, شاشقان التاي.
تاڭ بوزاڭ ءىزىن كەسكەن كەشكى ولەڭنىڭ,
ءتاڭىر-اي, ەبىن تاۋىپ, ەسكەرەر كىم؟
تورىنە كەندى التايدىڭ ناۋرىز كەلدى,
توركىندەپ توسكەيىنە وسكەمەننىڭ.
تاڭ كەلدى – سىباعالى كەشەدەن بەك,
تىڭ ىرعاق تىنباي جەتەر كوشەدەن كوپ.
تىرلىگىن وسكەمەننىڭ جاريالاپ,
تىنباعان ءتۇنى بويى ەسەلى ەڭبەك.
جانىمدى ۇسىنامىن دوس دەگەندە,
جاڭا كۇن جارقىلداپ ءبىر كوشتى ولەڭگە.
جاساعان جاقسىلىعى ەلدەن قايتسىن,
جادىراپ ناۋرىز كەلدى وسكەمەنگە.
ءتاڭسارى. سەمەي
ەكپىنى سەكىلدەنىپ كوپ ولەڭنىڭ,
ەرەكشە كوزىندەي بوپ كونەلەردىڭ.
ەرتىستى بويلاپ ۇشىپ جەتتى سامال,
ەجەلگى تىنىسىنداي دەگەلەڭنىڭ.
اقىلدىڭ جەڭىل تارتتى كۇيى تاعى,
الىس كۇن وتكەن سايىن سۇيىتادى.
اعى مول, ءازىز كۇنىم, ۋىزىڭدى,
ابايدىڭ جىرى كەلىپ ۇيىتادى.
قارت قالا, شەجىرەلى, دانا قالا,
قادىرىڭدى ءبىلدىم عوي جاڭا عانا.
قازاقتىڭ ناق وزىندەي قاراپايىم,
قاراپايىم بولعانمەن دارا قالا.
سەمەيىم, سەندە تاتتىم جان ۋىزىن,
سويلەتتىم شاڭ-شاڭ باسقان ءداۋىر ءىزىن.
سىباعاڭ سىيدان بولسىن تاڭسارىدە,
ساتىمەن كەلسىن ساعان ناۋرىزىم.
تاڭەرتەڭ. پاۆلودار
ەرتىستەن ەركە سامال جەل ەسەدى,
ەلىمنىڭ سەكىلدەنىپ كەلەشەگى.
ەرلىكتىڭ مىلتىعى جوق مايدانىندا,
ەڭبەگىڭ ونىمەنەن تەڭەسەدى.
اق قۇرىش اعادى كەپ ناۋامەنەن,
ادامعا جول كورسەتىپ جاڭا بەلەڭ.
اق كۇمىستەي قاقتاعان, بالقىماداي,
اق بۇلاق بوپ تاڭ اتا اعادى ولەڭ.
كوڭىلدەردە بەل الىپ كۇرەسكەر كۇن,
كوكجيەگىن اشادى سىرەسكەن مۇڭ.
كوشەلەرىن ۋاقىتتىڭ جارقىراتىپ,
كوككە سوزدى بويلارىن گرەس-تەرىم.
جاڭا كۇندە جارقىراپ, باعى جانار,
جاقسىلىعى ءبىر ەمەس, تاعى دا بار.
جارقىن ناۋرىز ءاماندا جارىلقاسىن,
جارىق قالا, جاسامپاز پاۆلودار.
كىشى ساسكە. قىزىلجار
تال ساسكە, تامىلجيدى قىزىلجارىم,
تاراتىپ تال بويىنا قىزىل جالىن.
توعايىن اق قايىڭنىڭ ارالاپ ءجۇر,
توي باستاپ ەركە ەسىلدە – قىزىرلارىم.
قارا ورمان – قالىڭ كىتاپ وقىلماعان,
قايىرىپ شىرقاتادى توقىلداق ءان.
قادىرلى ماعجان اقىن ولەڭدەرىن,
قاستەرلەپ ورماندارىم وقىر ماعان.
كوكجيەك بۇلاڭ-بۇلاڭ قىر اسادى,
كوكتەمگى بايتاق دالام سىر اشادى.
كوكتەگى جەرگە قۇشتار, جاۋعىش بۇلتتار,
كوكتەگەن ىرىزدىققا ۇلاسادى.
قىزىلجار – قىزىل وتتاي قايناپ جاتىر,
قىرمىزى قىزىل گ ۇلى جايناپ جاتىر.
قىرانى قارا ورمانىن قاق اينالىپ,
قۋانعان بۇلبۇلدارى سايراپ جاتىر.
ۇلى ساسكە. قاراعاندى
ءومىرلى, كومىرلى دە قاراعاندى,
ءوزىنىڭ تۇلعاسىمەن دارالاندى.
ولكەمنىڭ ومىرتقاسى – قاراعاندى,
ولەڭىم ساعان دەگەن سارالاندى.
ولەڭىم ساعان دەگەن سارالاندى,
وزەككە ۇيالاتتىڭ سان ادامدى.
ءومىر دەگەن كومىر دەپ ۇران تاستاپ,
ولىمگە باس يمەگەن قاراعاندى.
جاڭاارقا, ۇلىتاۋىم, قارقارالى,
جىر-كۇيىن جەڭىستەردىڭ تارتار ءالى.
جاڭعىرتىپ كەلەر ۇرپاق انگە سالىپ,
جاس كۇندى قارسى الۋدا ارقاداعى.
شات كوڭىل. شاپاعاتتى, شۋاقتى ءسات,
شايتانكول شاشىن ورگەن شىراقتى ءسات.
شويىنىن ىنتىماقتىڭ بىرگە قۇيىپ,
شاتتانىپ شىڭعا تارتقان قۋاتتى ءسات.
ءتالتۇس. كوكشەتاۋ
سەكسەن كول كوكشەتاۋدىڭ ساياسىندا,
سامالدىڭ ساكەن سۇيگەن اياسىندا.
«سەرىنىڭ سەرتكە تاققان سەمسەرىندەي»,
ءسوزىم دە باعىشتالدى ساي اسىلعا.
وقجەتپەس وقتان وزىپ, اۋەلەگەن,
ويىندا ور قاراعاي ماۋەلەگەن.
ورماننىڭ ءتۇسىن كورسەڭ تالتۇستەگى,
ورامال سەكىلدەنگەن اۋە دەگەن.
ەركە كۇن. ەلگەزەك جەل جان تەربەگەن,
ەندىگىن كوكشەتاۋدىڭ كوركەمدەگەن.
ەلىكتەي ۇركىپ قاشقان تولقىنداردان,
ەكپىندەپ العا تارتقان جەلكەن كورەم.
كوكشەتاۋ. كوكشە تەڭىز. كوكشە بۇلاق,
كوكتەم بوپ تاۋ باسىنان كەلەم قۇلاپ.
كەۋدەسىن جەلگە توسىپ جاتىر كوكشە,
كەربەز اقىن سەكىلدى ولەڭ قۇراپ.
شاڭقاي ءتۇس. قوستاناي
تىڭ دالا. دارقان دالا, ديقان دالا,
تاپ بۇگىن توپىراعىڭ – قۇيقاڭ قارا.
تەربەتىپ تىرشىلىكتىڭ تال-بەسىگىن,
تالاي كۇن بولار ەندى ۇيقىڭ شالا.
بۇل دالا بۇگىن سايىن, ەرتەڭ التىن,
بەرەكە كۇتىپ جاتىر تۋعان حالقىڭ.
بويىندا قوستانايدىڭ ءدان ۇشادى,
باقىتى بولا بەرسىن ەمەن-جارقىن.
كوكتەم كەپ كوپ تىرشىلىگى وڭايلادى,
كوك بۇرشىك اتىراپتى ورايدى ءالى.
كەۋدەسىن ەلجىرەگەن سامال ءسۇيىپ,
كوكتەمدى قارسى الۋدا توعايلارى.
تال بۇرلەپ, گۇل ءتىرىلىپ, ءوسىپ-ونگەن,
تىرشىلىك ءتىل قاتادى وسى جەردەن.
تولقىنى كوكتەمەنىڭ تولىقسيدى,
تورعايعا سالەم جولداپ وسى جەلدەن.
بەسىن. اقتوبە
توقسان جول, توعىز تاراۋ, سان سالالى,
توبىلعى بۇرلەپ, تولىپ ءان سالادى.
توركىندەپ قارلىعاشتار ۇياسىنا,
توبەسىنە ۇيلەردىڭ تام سالادى.
ەكىندى, ەلەك جاقتان جەل ەسەدى,
ەلەڭدەپ كوڭىل كوكپەن تەڭەسەدى.
ەتەگىن اقتوبەنىڭ گۇل كومكەرىپ,
ەلجىرەپ, ەسكە اپ ءبارىن كەڭەسەدى.
جادىگەرى سەكىلدى مۇراعاتتىڭ,
جاۋھارعا جاسىمنان-اق قۇمار اقپىن.
جاڭا كۇن, جارىلقاعىر, ناۋرىزىم,
جاقسىسىن كوبەيتە گور بۇل الاپتىڭ.
ويىلدان, قيىلدان دا, قيىردان دا,
ورتاعا ناۋرىز جەتتى بۇيىرعاندا.
وتاننىڭ ءبىر وتاۋى – اقتوبەنىڭ,
ولجاسى از بولمايدى جيىلعاندا.
ەكىندى. ورال
اق جايىق, اينالايىن, امانبىسىڭ,
اق تا توك, «سارىارقاداي» ساعامبىسىڭ؟
ات جالداپ كوڭىل-كولدەن ءوتىپ كەلەم,
اشاڭ ءجۇزىڭ اشىلىپ, قارارمىسىڭ.
جانىمنىڭ جاپىراق جايدى ارماندارى,
جارق ەتتى جابىعىپ ءبىر قالعاندارى.
جۇپارىن جان-جاعىمنان بۇرقىراتسىن,
جايىقتىڭ جامىراعان ورماندارى.
ورالىم, وتتى ورالىم, قاسىم سۇيگەن,
ولجاڭ بار كورىكتەنگەن اسىل سىيمەن.
ورىستىڭ ۇلى اقىنى پۋشكين باۋىر,
ويلانىپ, ويعا باتىپ, باسىن دا يگەن.
ۇلى وزەن, جالعاي بەرشى ەسىلۋدى,
ۇلدارىڭ كوپ اڭساعان وسى نۇردى.
ۇلىقتاپ ناۋرىزدى قارسى الا بەر,
ۇمىتپاي وتكەنىڭدى, وسى كۇندى.
اقشام. اتىراۋ
كۇي بولىپ, داۋىلداتىپ, تەڭىز بولىپ,
كوكتەمگى كوك اسپانمەن ەگىز بولىپ.
كوتەرىپ مۇناراسىن جاتىر بايتاق,
كوڭىلدىڭ تاسقىنىمەن ەگىز بولىپ.
اتىراۋ, اتا كۇلدىك, اسىل ايماق,
ارۋانا مىنەزى بار جاسىل ايلاق.
ارعىماق ارمان ءمىنىپ كەلدى ناۋرىز,
اق كوڭىل ىرىزدىعىن باسىبايلاپ.
ايدىنعا شاعىلىسىپ شۋاق سىندى,
الىستان جەتكەن شاۋىپ بۇلاق ءسىڭدى.
ارايى مىڭ بوياۋدىڭ استاساتىن,
اقشامدا اتىراۋىم جۇماق سىندى.
مۇنايدان مىڭ بايلىق بوپ تارادى ۇعىم,
مولشىلىق قازىناسى – دالا بۇگىن.
ماڭ دالا قاراڭعىدا قالماسىن دەپ,
مۇنارالار باسىندا جانادى كۇن.
نامازدىگەر. ماڭعىستاۋ.
ماڭعىستاۋ اسپان استى – مۇراجايىم,
مۇنان سەن تاريحىڭدى سۇرا ءدايىم.
مىڭ عاسىرلىق وتكەنىن تاسقا جازعان,
ماڭ دالا ۇلاندارى بۇل ادايىم.
تەڭىزى تەنتەك مىنەز, ابىل-سىندى,
تولقىنى اققۋ شايقار قاۋىرسىندى.
تامشالى سىر ايتادى تامشىداي عىپ,
تىلەگى بەكەت-اتا قابىل-سىندى.
تەڭ ۇستاپ ءان مەن كۇيدى – ەل ونەرىن,
تانىتقان تەرەڭدىگىن, ورەلەرىن.
تۋلارىن تىنىشتىقتىڭ جەلبىرەتىپ,
تارتادى بولاشاققا كەمەلەرىم.
عاجايىپ, قانداي مەزگىل نامازدىگەر,
عالامعا اللا نۇرىن سەبەزگىلەر.
عيبرات ايتار ماڭگى اۋليەلەر,
عىلىمىن دۇنيەنىڭ قاعاز بىلەر.
كەش. قىزىلوردا
سىر بويى, اق سامالى داريانىڭ,
سويلەيدى قوبىز بولىپ قاريا-كۇن.
سۋرەتى كوك اسپاننىڭ سۋ بەتىندە,
ساۋمالى قانىپ ىشكەن سان ۇيانىڭ.
سىر ەلى – ۇلى دارقان, قىزى باتىل,
سۇلەيدەن ءسوز جەتەدى – ۇزىك اقىل.
سارناعان قورقىت بابام قىل قوبىزى,
سەرىنىڭ تالاي ۇلى ءىزى جاتىر.
سىر ەلى توقشىلىقتى, اق كۇرىشتى,
سىر ەلى ىنتىماقشىل, باقتى, ىرىستى.
ساۋىردە ادامزاتتىڭ ارمانىن اپ,
ساعىمدى بايقوڭىردان شاتتىق ۇشتى.
سىر ەلى, ءسۇيدىم مەن دە ءبىر قىزىڭدى,
سىرعا ساپ, كەتتىم الىپ جۇلدىزىمدى.
سىباعاڭ مولدان بولسىن ناۋرىزدا,
سۇيە بەر بەيبىت تاڭدى, كۇن قىزۋدى.
ءىڭىر. تاراز
تارازىم, تاريحىڭدى تاراتامىن,
تۇلعاڭدى تاۋ مىنەزدى جاراتامىن.
تاۋاريح نامازىنداي كۇمبىرلەگەن,
تاس كۇمبەز شەجىرەڭدى ساناتامىن.
ارمىسىڭ, كونە قالا – جاڭا قالا,
ايشىعى تىرەۋ بولعان باعاناعا.
ايشاسى ۇلگى بولعان عاشىقتارعا,
اجارى ايداي بولعان سامالادا.
سان بوياۋ ارلەپ جاتىر ءىڭىرىڭدى,
سۇلۋلىق سيپاتتايدى بۇگىنىڭدى.
ساعىمعا كومگەن جىلدار اداستىرسا,
ساعان مەن ارناپ كەلەم جۇگىنۋدى.
ارىدەن كەلە جاتقان ماقالىڭ بار,
الديلەپ, قاستەرلەگەن وتانىڭ بار.
ءاز ناۋرىز اعىن قۇيىپ, ىرىمداسىن,
اۋليە دەگەن قالا اتاعىڭ بار.
ىمىرت. شىمكەنت
شىرايلى, شىن كۇمىستىڭ ورنەگىندەي,
شىرىندى, پاتشا-ءجۇزىم داندەرىندەي.
شىمكەنتىم – شىمىلدىعى سۇلۋلىقتىڭ,
شىرقالعان شاندوز ءشامشى اندەرىندەي.
كۇنى ىستىق – وزدەرىنىڭ پەيىلىندەي,
كوڭىلى انالاردىڭ مەيىرىندەي.
كورىنگەن كوك اسپاننىڭ جۇلدىزدارى,
كادىمگى جاراتقاننىڭ كورىگىندەي.
شەجىرە جازۋىنداي شۇبىرتپالى,
شىرايى – شىن كوڭىلدىڭ عۇرىپتارى.
شاتىرىن ناۋرىزدىڭ شالقي تىككەن,
شىمكەنتىم قانداي سۇلۋ ىمىرتتاعى.
اسپان دا ىقىلاستىڭ سەرىگىندەي,
ابىزدىڭ ايتارى كوپ ومىرىندەي.
اق دەگەن قاي كەزدە دە قادىرلى عوي,
اق ماقتا – وڭتۇستىكتىڭ كوڭىلىندەي.
تۇندىك ءتۇسىرۋ
ناعىز – دۋمان اي, تولادى دالا قۇستارعا,
نىعمەت پەيىلى جول اشىپ جاڭا اعىستارعا.
نازارى سەكىلدى جاراتقان يەمنىڭ –
ناۋرىز, قوش كەلدىڭ, كەڭ بايتاق قازاقستانعا!
داستارقان جايۋ
وتتان شىقتى التىن جامبى – تابا نان,
پەيىلىمەن مارحاباتتى انادان.
اق مول بولسىن!
ورتا تولسىن, قازاعىم,
تىلەگىنەن تەك جاقسىلىق تاراعان.
قۇرت, ىرىمشىك, ۋىز جانە بالقايماق,
ءدامىن تاتىڭ ناۋرىز ءدامىن تاڭدايعا اپ.
قوزىقۇلاق باۋىرساقتى شاشايىق,
ىرىس الدى – ىنتىماققا بارعاي باق.
بەسىك تەربەتۋ
تەڭىز كەشتىك, تاۋ كوتەرىپ, قالا ساپ,
دالا, قالا ەگىز ۇعىم – دانا شاق.
بەسىگىڭدە تەربەلەدى تىنىشتىق,
بەيقام ۇيىقتا, بالالىق شاق – بولاشاق.
ءاز ناۋرىز, ءازيز كۇنىم – ەسىمىڭ,
كەڭ اشىلسىن دۇنيەگە ەسىگىڭ.
قولدارىما قۋات بەرشى, جاساعان,
تەربەتۋگە قازاقستان بەسىگىن.
قايىرلى ءتۇن, قازاق ەلى!..
تاڭ اتىپ كەلەدى
جاڭا تاڭ جارىلقاسىن!
جاڭا كۇن جالىنداسىن!
جاڭا جىر ارىنداسىن,
جاقسىلىق جاڭىلماسىن,
جاڭا نۇر جايناعاسىن,
جارقىراپ اي قاراسىن,
جالىنداپ كۇنىم ك ۇلىپ,
جۇرتىمدى ايمالاسىن!
قايىرلى تاڭ, قازاق ەلى!
وتەگەن ورالباي ۇلى,
اقىن, پرەزيدەنت سىيلىعىنىڭ لاۋرەاتى.
