سۋرەتشىنىڭ كەنەبىندە الماتى وبلىسىنىڭ ەڭ كوركەم ءارى نازىك تابيعي ايماقتارى — قايىڭدى مەن كولساي كولدەرىنەن باستاپ, شارىن شاتقالى مەن ىلە الاتاۋىنا دەيىنگى تۇمسا تابيعات بەينەلەنگەن.
قىلقالام يەسى كورەرمەندى تەرەڭ ويعا تارتاتىن بىرەگەي توپتاماسىن تابيعي ايماقتاردىڭ جاپپاي تۋريزم سالدارىنان قالاي وزگەرىپ جاتقانىن ءوز كوزىمەن كورگەننەن كەيىن جازا باستاعان. كولساي, ەسىك, شارىن جانە ۇلكەن الماتى كولىنە جاساعان ساپارلارى وعان شابىت بەرىپ قانا قويماي, ەكولوگيالىق ماسەلەلەرگە كوركەمدىك تۇرعىدان ءۇن قاتۋعا تۇرتكى بولىپتى. سول اسەرلەردىڭ ناتيجەسىندە جازىلعان كەنەپتەگى كەسكىندەمەلەر — سۋرەتشىنىڭ جاستىق شاعىندا كورگەن تابيعات اياسىنداعى ەستەلىكتەرى مەن جان دۇنيەسىنە تىنىشتىق سىيلاعان, قورعاپ قالعىسى كەلەتىن ەرەكشە مەكەندەرگە دەگەن ساعىنىشىنىڭ كورىنىسى.
ونەرتانۋشىلاردىڭ پىكىرىنشە, «مەنىڭ ءۇيىم» كورمەسى بەلگىلى ءبىر ماعىنادا جاڭا كەزەڭنىڭ, قايتا ورلەۋدىڭ سيمۆولى رەتىندە قاراستىرىلادى. ەكسپوزيتسياداعى ءاربىر تۋىندى — پەيزاج عانا ەمەس, تابيعاتقا قۇرمەتپەن جانە ساقتىقپەن, سانالى تۇردە قاراۋعا شاقىراتىن ۆيزۋالدى ۇندەۋ. كورمەدە ۇسىنىلعان بىرنەشە كەسكىندەمە حالىقارالىق دەڭگەيدە تانىلىپ, لوندوندا وتكەن بەدەلدى Golden Talent بايقاۋىندا جۇلدەلى ورىن العان.
«كورمەنىڭ ماقساتى — ونەر مەن ەكولوگيالىق بەلسەندىلىكتى بىرىكتىرىپ, كورەرمەندى كوركەم بەينەنىڭ كۇشى ارقىلى تابيعاتقا قامقور بولۋعا شابىتتاندىرۋ. مەنىڭ ونەرىم – مەنىڭ ءومىرىم. كارتينالارىمداعى جارقىن رەڭكتەر – مەنىڭ ومىرگە دەگەن كوزقاراسىمدى, كوڭىل-كۇيىمدى جەتكىزەدى. تابيعاتتى ايالاۋ بارشاعا ورتاق پارىز»,-دەيدى كورمە اۆتورى.
