اشم: سيىر ەتى باعاسى وزىندىك قۇن مەن ەت ساپاسىنا بايلانىستى قالىپتاسادى

ۆەدومستۆونىڭ مالىمەتىنشە, 1 كگ ەتتىڭ ورتاشا وزىندىك قۇنى شامامەن 2 800–3 100 تەڭگەنى قۇرايدى. كوتەرمە ساۋداداعى 15% ۇستەمەاقىنى قوسقاندا, باعا 3 400–3 500 تەڭگە دەڭگەيىندە قالىپتاسىپ وتىر.

سالىستىرمالى تۇردە, كورشىلەس ەلدەردە سيىر ەتى الدەقايدا قىمبات: وزبەكستان مەن تاجىكستاندا – 6 500 تەڭگەگە دەيىن, رەسەيدە – 8 500 تەڭگەگە دەيىن, قىتايدا – 8 000 تەڭگەگە دەيىن, تۇرىكمەنستاندا – 9 000 تەڭگەگە دەيىن, ال تۇركيادا – 13 000 تەڭگەگە دەيىن جەتەدى.

مينيسترلىك ەتتىڭ بولشەك باعاسى تەك وزىندىك قۇنعا عانا ەمەس, سونىمەن قاتار ساناتىنا, تاعامدىق قۇندىلىعىنا, مالدىڭ سەمىزدىگىنە جانە قايتا وڭدەۋ تاسىلىنە بايلانىستى ەكەنىن اتاپ ءوتتى. مىسالى, ءبىر تۇتاس ءىرى قارا مال ەتىنىڭ ءتىرى سالماعىنان تەك 50–60%-ى عانا ەت رەتىندە ساتۋعا جارامدى. ونىڭ ىشىندە 15–20%-ى پرەميۋم ساناتتاعى بولىكتەر (فيلە, ريباي, جامباس ەتى), 40–45%-ى ورتا دەڭگەيلى, 25%-ى تومەنگى دەڭگەيلى ەتكە تيەسىلى. ال سۇيەك, ماي جانە جارامسىز قالدىقتار 15–20%-دى قۇرايدى.

اشم وكىلدەرى جوعارى ءمارمارلى, جۇمساق قۇرىلىمدى پرەميۋم ەت قىمبات بولاتىنىن, ال مايى از كەسىندىلەر ارزانداۋ ساتىلاتىنىن ءتۇسىندىردى.

مينيسترلىك نەگىزسىز باعانىڭ ءوسۋىن تەجەۋ ءۇشىن جۇيەلى شارالاردى جالعاستىرىپ جاتىر. ولاردىڭ قاتارىندا:

• بورداقىلاۋ الاڭدارى مەن شارۋاشىلىقتاردى جەڭىلدەتىلگەن نەسيەلەۋ,

• ەت وڭدەۋ كاسىپورىندارىن سالۋ جانە جاڭعىرتۋ,

• باعانى تۇراقتاندىرۋ ماقساتىندا فورۆاردتىق ساتىپ الۋ مەن ينتەرۆەنتسيالار جۇرگىزۋ بار.

سونداي-اق ءونىم وتكىزۋ تىزبەگىنىڭ بارلىق كەزەڭدەرىندە باسەكەلەستىك زاڭناماسىنىڭ ساقتالۋىنا باقىلاۋ كۇشەيتىلەدى.

اۋىل شارۋاشىلىعى مينيسترلىگى جاعدايدى تۇراقتى باقىلاۋدا ۇستاپ, اكىمدىكتەرمەن جانە مۇددەلى قۇرىلىمدارمەن بىرلەسىپ جۇمىس جۇرگىزىپ جاتقانىن حابارلادى.